ТОЙМ: Зүсээ хувиргасан Д.Наранхүү баригдсанаар, Ш.Раднаасэд сандарч, Т.Аюурсайхан “бийлэгжүү”, Б.Ганхуяг “мэдээлэл тээгч” гэдгээ зарлав

Өнгөрч буй долоо хоногт улстөрийн тогоонд өрнөсөн онцлох үйл явдлуудыг тоймлон хүргэж байна.

-Зүсээ хувиргасан Д.Наранхүү баригдаж, зүгээ буруулахыг Ш.Раднаасэд хичээв-

Өнгөрөгч долоо хоногийн хамгийн том дуулианы эзэн Дамбадаржаагийн Наранхүү гэгч байв. Тэрбээр нүүрсний хэрэг шалгагдаж эхлэх үеэр буюу 2022.12.09-ний өдөр Монгол Улсын хилээр гарч зугтжээ. Энэ нь “Эрдэнэс тавантолгой” ХК-ийн Гүйцэтгэх захирал асан Б.Ганхуягийг баривчлагдсаны яг маргааш гэсэн үг аж. Улмаар БНХАУ-ын Шанхай, Макао зэрэг бүс нутгуудаар зорчин, царай төрхөө хувиргажээ. Нүүр хувиргах мэс засалд орж, хятад иргэдийн нэр дээр байр түрээслэн ашиглаж байсныг /2023.09.15/-ны өдөр саатуулагдаад байна.

Дамбадаржаагийн Наранхүүгийн хувьд Ш.Раднаасэдийн бие төлөөлөгчөөр ажиллаж байсан гэгдэх боловч тийм тодорхой кейс гарч ирээгүй. Харин Ш.Раднаасэд Д.Ариунболд нар Говь-Алтай аймагт хамт ажиллаж, албан байгууллагуудад автомашин, малчдад өвс тэжээл, бэлэн мөнгө зэрэг бэлэг сэлт тараах үер Д.Наранхүү тэдний төлөөлөл байдлаар хэд хэдэн удаа ажилласан түүхтэй.

Мөн УУХҮ-ийн сайд, ШШГЕГ-ын дарга асан, Бригадын генерал Д.Загджавтай ойрын харилцаатай байсан хийгээд Очирваань эмнэлгийн захирал гэдэг нь дэлгэгдэв. “Эрдэнэс тавантолгой” ХК-ийн Гүйцэтгэх захирлаар Д.Ариунболдыг ажиллах хугацаанд 10 компаниар нүүрс зөөсөн гэгдэж буй.

Энэ өдрүүдэд түүнийг АТГ-ынхан болон ХЗДХ-ийн сайд Х.Нямбаатар авч ирэхээр ажиллаж буй. Хурууны хээ нь таарч буй ч гадаад паспортын нүүр зураг зөрсөн байдалтай байгаа тухай манай сайт анх мэдээлж байсан билээ.

Хятадад саатуулагдсан Д.Наранхүү нь Ш.Раднаасэд, Д.Ариунболд нарын "нүүрсний" найз байжээ нийтлэлийг ЭНД дарж уншина уу.

Хоёр дахь нь УИХ-ын гишүүн асан Т.Аюурсайхан, "Эрдэнэс Тавантолгой" ХК-ийн захирал асан Б.Ганхуяг нарт холбогдох хэргийн урьдчилсан хэлэлцүүлэг байлаа. Тэдний шүүх хуралдааныг энэ сарын 28-ны 14.00 цагт товлосон юм.

Урьдчилсан хэлэлцүүлгийн үеэр ил болсон хэд хэдэн зүйлийг задалж харцгаая.

-Т.Аюурсайханы баахан хөрөнгө ил болж бийлэгжүү нэгэн гэдгээрээ алмайруулав-

Нэгдүгээрт, УИХ-ын гишүүн асан Т.Аюурсайхан асар бийлэгжүү нэгэн гэдэг нь тодорхой болов.

• 2007 оноос 2015 оны хооронд нийт 30 удаа гадаад улс руу зорчихдоо эрэгтэй брэндийн костюм оруулж ирж, худалдаалдаг бизнесээрээ 50 мянган ам.долларын хадгаламжтай болжээ.
• Ааваас нь өвлөгдөн ирсэн, өөрөө ч нэмж цуглуулсан өндөр үнэ бүхий маркны цуглуулгаараа 2017-2021 оны хооронд 44 мянган ам.доллар, 34.5 мянган еврогийн орлого олжээ.
• 2017 онд нэр бүхий УИХ-ын гишүүдтэй Чили болон Перу улсад зорчихдоо хоёр ширхэг номин чулуу хилээр оруулж ирж. Жижгээр нь өөртөө хөөрөг, томыг нь н.Даваажав гэх хүнээр дамжуулан БНХАУ-ын иргэнд 30 мянган ам.доллароор худалджээ.
• Турк улсаас бизнес хийх гэж ирсэн хуурай, ах дүүгийн харилцаатай хүмүүстээ байр түрээсэлж, 33 мянган ам.доллар авсан. 2012 онд Туркд зочлон очихдоо 50 мянган ам.доллар гээд нийт 100 мянган ам.долларыг гар тээшээр Монгол Улсын хилээр оруулж иржээ.

Тэр ерөөс брэндийн костюмны, маркны, үнэт чулууны наймаачин, байр түрээслэгч бизнесмен аж. Ингэж ариун цагаан хөдөлмөрөөрөө хөрөнгөтэй болж түүгээрээ алтан морь цутгуулж, морины жүчээ барьсан болж таарав. Гэхдээ тэр брэндийн костюм, үнэт чулуу, өндөр үнэлгээтэй маркуудаа хэрхэн авсан эх үүсвэрээ шалгуулах, тайлбарлах хэрэгтэй болох нь.

-Б.Ганхуяг нүүрсний хулгайн асар их мэдээлэл тээгч гэдгээ зарлав-

Хоёрдугаарт, Б.Ганхуяг нүүрсний хулгайн тухай асар их мэдээлэл тээгч боловч, түүнийгээ хэлэхгүй нуугч гэдэг ойлголт

Өмнөх урьдчилсан хэлэлцүүлгээр тэр ардаа хамгаалалттай мэт асар чанга дуугарч чадсан. Эдийн засаг хөгжлийн сайд Ч.Хүрэлбаатарыг Солонгосчуудад орд зарсан тухай хүртэл цухуйлгаж, үг дайсан.

Харин сүүлийнх дээр нь тэр нэгэн хачирхалтай эргэлт хийсэн. Тодруулбал, түүний “Нүүрсний" гэх хэргийг илрүүлэхэд туслалцаа үзүүлэх, мэдээлэл өгөх, чиглэлээр хамтран ажиллъя. Хамтран ажиллах хүнээр намайг тогтоож өгч, намайг болон ар гэр, хамаатан садныг минь хамгаалалтад авч өгнө үү" гэх хүсэлт.

Энэ бол “Би одоо л ам нээе, надад их мэдээлэл байгаа” гэх мессеж байх боломжтой. Есөн сар ганцаараа хоригдчихсон түүний шүүхээр орохын өмнөх үг.

-“60 тэрбум”-ын схемийн автор Т.Бадамжунай буюу Т.Аюурсайханы өмгөөлөгчийн үг -

Гуравдугаарт, сайд асан Т.Бадамжунайгаар дамжуулж "60 тэрбум"-ын схемийг хэрэгжүүлсэн байх боломжтой, ноцтой сэжүүрийн үзүүр Т.Аюурсайханы өмгөөлөгчийн үгнээс цухуйв.

Нэгэн цагт МАН-ын албан тушаалын хуваарилалт, санхүүжилтийн захиран зарцуулалтын ерөнхий менежер явсан гэгддэг хүн бол Т.Бадамжунай.

“Т.Бадамжунай гуай 2018 оны хавар "Эрдэнэс тавантолгой" компанийн гүйцэтгэх захирлын асуудлаар Б.Ганхуяг, Т.Аюурсайхан хоёр миний хувийн оффист ирж уулзаж байсан гэдгийг хэлдэг. “Хувийн зүгээс дүүгээ дэмжих талаас нь бодоорой” гэж Б.Ганхуяг хэлсэн. Т.Аюурсайхан, Б.Ганхуяг нарын хэн нь билээ намайг Ерөнхий сайдад хэлж өгөөрэй гэж мэдүүлэг өгсөн байсан” гэдэг Т.Аюурсайханы өмгөөлөгчийн үг.

Нэхэн санавал, 2018 онд тухайн үеийн Ерөнхий сайд гэдэг нь одоогийн Ерөнхийлөгч У.Хүрэлсүх. ЭТТ ХК-ийн захирлаар ажиллаад жил хүрээгүй Д.Ариунболдыг авч хаяад, Б.Ганхуягийг тавьж байсан түүх бий.

Нэг дороос | Т.Аюурсайхан, Б.Ганхуяг нарын хэргийг шүүхэд шилжүүлж, энэ сарын 28-нд товлолоо нийтлэлийг ЭНД дарж уншина уу.

Энэ мэдээнд өгөх таны үнэлгээ

Хуваалцаарай Жиргээрэй