Алтны бизнест нэр холбогдсон Я.Билэгдэмбэрэл саатуулагдаж, Б.Ганхуяг шүүгдэхэд бэлэн болжээ

Өнгөрөгч долоо хоногт зарим хэвлэл мэдээллийн хэрэгслээр Экологийн цагдаагийн албаны тасгийн дарга асан, хошууч Я.Билэгдэмбэрэлийг АТГ-аас хойшлуулшгүй ажиллагааны хүрээнд саатуулсан тухай мэдээлэл цацагдсан.

Түүнийг албан тушаалаа урвуулан ашиглаж бусдад давуу байдал олгож, хахууль авсан байж болзошгүй хэрэгт холбогдуулан шалгаж буй аж. Тодруулбал, Сэлэнгэ аймгийн Ерөө сумын цагдаагийн байгууллагын хамгаалалтад авсан талбайд “нинжа” нарыг оруулан, удаа дараа хахууль авсан гэж буруутгаж буй гэх.

Я.Билэгдэмбэрэлийн араас Сэлэнгэ аймгийн цагдаагийн газрын дарга асан, дэд хурандаа Б.Ганхуяг, Экологийн цагдаагийн албаны дарга асан, хурандаа Ш.Цогбаатар нарын нэр зүй ёсоор дуулддаг.

Тэдний нэр хууль бус алт олборлолттой холбогдоод багагүй хугацаа өнгөрсөн байна.

Нэгдүгээрт, Сэлэнгэ аймгийн, Ерөө Бугант сумын нутаг "Бугант 16" гэх газрыг цагдаагийн хамгаалалтад авсан нэрийдлээр төрийн болон хууль хяналтынхан өөрсдөө алт ухах, бизнес хийх сүлжээ үүсгэсэн гэх нутгийн иргэдийн хардлага 2022 онд гарч байв. Цахим орчинд энэ тухай хөвөрч байсан удаатай.

Хоёрдугаарт, Хууль бусаар алт ухаж, Ерөө голийг бохирдуулж, байгаль сүйтгэгч “нинжа” иргэдийн хэргийг дарж, шан харамж авч хөрөнгөжсөн гэх хэргийн тухай нутгийн иргэд мэдээллэсэн гэгдэж буй.

Гуравдугаарт, Ш.Цогбаатарын даалгавраар Б.Ганхуяг, Я.Билэгдэмбэрэл нар ажилласан гэх.

Чухам аль нь ч бай хууль бус алт олборлолт, авлигын хэрэгтэй холбогдох аж. Өнгөрөгч оны сүүлээр тэдэн дээр нэмээд Сэлэнгэ аймгийн Засаг дарга Н.Лхагвадоржийн ч нэр дуулдаж байв. Гэхдээ өдгөө Я.Билэгдэмбэрэлийн л нэр ганцаараа үлдэн цагдан хоригдож, шалгуулж эхлээд байна.

Я.Билэгдэмбэрэлийн хувьд: Экологийн цагдаагийн албанаас гарчихсан тэрбээр ДХИС-д ажиллаж байгаа. Өдгөө Шүүхийн шийдвэрийн гүйцэтгэх 461-т нотлох баримтад үндэслэн АТГ-аас саатуулж, мөрдөн шалгах ажиллагаа явуулж буй аж.

Б.Ганхуягийн хувьд: Өнгөрсөн өвөл цэргийн байнгын тэтгэвэрт суусан. Мандал сумын цагдаагийн даргаар ажиллаж байхад Сэлэнгэ аймгийн цагдаагийн газрын даргаар тус аймгийн Засаг дарга Н.Лхагвадорж татаж байж.

Сэлэнгэ аймгийн Цагдаагийн газрын удирдах албан тушаал хашиж байхдаа албан үүрэг, бүрэн эрхийн байдлаа урвуулан ашигласан гэх хэрэгт буруутгагдаж, шүүгдэх гэж буй. Өнгөрөгч Наймдугаар сарын 22-нд АТГ шүүхэд шилжүүлэх саналтайгаар прокурорын байгууллагад хүргүүлсэн билээ.

Ш.Цогбаатарын хувьд: Экологийн цагдаагийн албаны даргаар ажиллаж байгаад тэтгэвэртээ гарчихсан. Тэрбээр, Дорнод аймгийн Дашбалбар суманд үйл ажиллагаа явуулдаг Хятадын хөрөнгө оруулалттай “Шинь Шинь” ХХК-иас авлига авдаг байж болзошгүй гэх хэрэгт нэр холбогдон бичигдэж байв.

Өмнө нь хүргэсэн Сэлэнгийн дарга нар "Бугант-16"-г хамгаалалтад авсан нэрийдлээр ухаж, алтны сүлжээ үүсгэсэн үү нийтлэлийг ЭНД дарж уншина уу.

Энэ мэдээнд өгөх таны үнэлгээ

Хуваалцаарай Жиргээрэй