Өмнөд Солонгос: Онц ноцтой хэргийн сэжигтний хувийн мэдээллийг зөвшөөрөлгүйгээр дэлгэнэ

Өмнөд Солонгос улсын парламент өчигдөр буюу аравдугаар сарын 7-ны өдөр онц хүнд гэмт хэргээр баривчлагдсан сэжигтнүүдийн зургийг зөвшөөрөлгүйгээр ил болгох хуулийн төслийг баталлаа.

Үндэсний ассамблей уг хуулийн төслийг 215:0 саналаар дэмжсэн байна.

Уг хуулийн төслийг баталснаар гэмт хэрэг үйлдсэн этгээдийн сүүлийн 30 хоногийн дотор авахуулсан зургийг олон нийтэд ил зарлах эрх зүйн үндэслэлтэй болж байгаа юм. Түүнчлэн, хэрэв хэрэгтэн тав хүртэлх хоногийн дотор хэргээ хүлээвэл түүний зургийг олон нийтэд дэлгэхгүй байх зохицуулалтыг хуульд тусгасан байна.

Өмнө нь хууль сахиулах байгууллагууд сэжигтний зургийг авахын өмнө зөвшөөрөл авах шаардлагатай хууль эрх зүйн саад бэрхшээлээс болж иргэд, олон нийтийн мэдэх эрхийг зөрчдөг байсан хэмээн Хууль зүйн яамнаас нь мэдэгдэв.

Ингэснээр шинээр баталсан хуулийн төслийг 15 хоногийн дотор ерөнхийлөгч Юн Сук Ёол зарлах юм. Харин хууль батлагдсанаас хойш гурван сарын дараа хэрэгжиж эхлэх ажээ. Мөн хуульд нэмэлт өөрчлөлт оруулж, сэжигтнүүдийн нэр, зургийг цахим орчинд ил болгох хүрээг нь өргөжүүлэхээр төлөвлөсөн байна.

Хуулийн төсөл батлагдахаас өмнө зөвхөн эрүүгийн хэргийн шүүх хурал нь болоогүй сэжигтнийг цагдаагийн байгууллагын шийдвэрийн дагуу илчлэх боломжтой байсан юм. Тэгвэл ийнхүү шинэ журмын дагуу сэжигтэн, яллагдагч, шүүгдэж буй хүмүүсийг олон нийтэд илчлэхээр боллоо. Товчоор бол мөрдөн байцаалтын шатанд байгаа бүх эрүүгийн хэргийг хамруулна гэсэн үг.

Ташрамд дурдахад, хуулийн төслийг эрх баригч нам болон Засгийн газар өнгөрсөн зургаадугаар сард боловсруулж, парламентдаа өргөн барьсан байна.

Н.АННА

Энэ мэдээнд өгөх таны үнэлгээ

Хуваалцаарай Жиргээрэй