Дээд лиг: Талбайд ч, гудамжинд ч тамирчдын үүрэх хамгийн хүнд ачаа бол ёс зүй, сахилга бат

30 дахь удаагийн сагсан бөмбөгийн дээд лигийн тэмцээн эхлээд хэдхэн хоног өнгөрч байна. Гэсэн ч шинэ улирлын эргэн тойронд сонирхолтой цөөнгүй үйл явдлууд өрнөсөөр буй. Үүний нэг нь "SG Apes" багийн тоглогч А.Базаргүр багаасаа гарах хүсэлтээ өгсөн явдал байв.

Эл үйл явдлын дараа багийн эзэн О.Мөнхжин түүнийг явуулах эсэхийг багийн удирдлагууд шийднэ хэмээгээд байсан ч эцэстээ тоглогчийн гэрээг зах зээл дээр нээлттэй худалдахаар болсноо зарласан. Ингээд А.Базаргүр Л.Наранбаатар эзэнтэй “Сэлэнгэ Бодонс” багтаа 450 саяын гэрээ байгуулж нэгдсэн. Тухайн бүрэлдэхүүнд багтмагцаа тэр эхний тоглолтоо хуучин багийнхаа эсрэг хийж 80:72-ын харьцаатай ялалт байгуулсан. Тэр багаа ялалтад хүрэхэд чухал нөлөө үзүүлэв. Товчхондоо үүргээ биелүүлсэн.

Энэ тоглолт спорт сонирхогч, лиг үзэгчдийн өндөр хүлээлт дор явагдаж зарим асуудлуудыг ч дагууллаа. Жишээлбэл А.Базаргүрийг “ТЛЖ” багийн залуу тамирчныг согтуудаа зодсон гэх шуумыг хуучин багийнх нь эзэн О.Мөнхжин дэгдээснээр олны анхааралд өртөж, хоёр талцуулаад байна. Үүнд “Сэлэнгэ Бодонс”-ын эзэн Л.Наранбаатар ч хариу тайлбар хийсэн. Гэхдээ түүнд энэ удаа хариуцлага тооцохгүй.

Харин энэ асуудлын ард спорт дагасан хүмүүжил, тамирчны сахилга бат, ёс зүйн асуудал яригдаж таарна. Угтаа өрсөлдөөн мөн боловч аль ч спорт болох болохгүйн хэм хэмжээ, хязгаарлагдах орон зайд баригдаж байх ёстой. Үлгэрлэн дуурайдаг, дагаж хөгждөг шинэ залуу үеэ ч бас мэдэрч байх учиртай. Ялангуяа лигийн тамирчдын үүрэх ёстой хамгийн том ачаа бол энэ. Хэрэв тэд нуруугүй байж, тавтиргүй энэ мэт аашилсаар байвал лигт болоод уг спортынхоо өнөөгийн хөгжилд гацаа үүсгэнэ гэсэн үг. Тиймээс талбайд ч, гадаа гудамжинд ч тэд үүргээ ухамсарлаж явах хэрэгтэйг А.Базаргүрийн кэйс сануулав.

Д.УЛСАА

Энэ мэдээнд өгөх таны үнэлгээ

Хуваалцаарай Жиргээрэй