Дорнодод 56 настай эрэгтэй есөн настай охинд бэлгийн хүчирхийлэл үйлдсэн хэрэг гарчээ

Дорнод аймагт 56 настай эрэгтэй есөн настай охинд бэлгийн хүчирхийлэл үйлджээ.

Бид тус хэргээс сэрэмжлүүлэх зорилгоор болсон үйл явдал, шүүх хурлын процессыг тоймлон хүргэж байна.

Есөн настай охинтой хүч хэрэглэн бэлгийн харьцаанд орохыг завдсан тус хэрэг 2024 оны дөрөвдүгээр сарын 28-29-нийг шилжих шөнө болжээ. Улмаар охины биед хөнгөн гэмтэл учирсан болох нь шүүх шинжилгээний дүгнэлтээр батлагдсан байна.

Иймд прокурорын байгууллагаас Эрүүгийн хуулийн 12.1 дүгээр зүйлийн 4, 11.6 дугаар зүйлийн 2 дахь хэсэгт тус тус заасан гэмт холбогдуулан яллах дүгнэлт үйлдэж шүүхэд хүргүүлсэн байна.

Шүүхээс бага насны хүүхдэд бэлгийн хүчирхийллийн шинжтэй үйлдэл гаргасан тус этгээдэд 12 жил нэг сарын хорих ял оноосон байна.

Насанд хүрээгүй хүүхдэд бэлгийн хүчирхийлэл үйлдэхийг завдсан 56 настай эрэгтэйн хувьд бүрэн дунд боловсролтой, тракторчин мэргэжилтэй. Дорнод аймагт эхнэр хүүхдийн хамтаар амьдардаг байжээ. 17 жилийн өмнө бусдын эд хөрөнгийн хулгайлах хэрэг үйлдэж хоёр жил нэг сар хорих, нэг сарын тэнсэх ял авч байжээ.

Холбогдсон хэргийн хуулийн заалт - Эрүүгийн хуулийн 12.1 дүгээр зүйлийн 4 дэх хэсэг, 11.6 дугаар зүйлийн 2 дахь хэсэгт

12.1 дүгээр зүйл. Хүчиндэх

4.Энэ гэмт хэргийг бага насны хүүхдийн эсрэг үйлдсэн; энэ гэмт хэргийн улмаас хохирогч нас барсан бол арван хоёр жилээс хорин таван жил хүртэл хугацаагаар, эсхүл бүх насаар хорих ял шийтгэнэ.

11.6 дугаар зүйл. Хүний эрүүл мэндэд хөнгөн хохирол санаатай учруулах

2.Энэ гэмт хэргийг энэ хуулийн 10.1 дүгээр зүйлийн 2 дахь хэсэгт заасан хүндрүүлэх нөхцөл байдалтайгаар үйлдсэн бол дөрвөн зуун тавин нэгжээс хоёр мянга долоон зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас зургаан сар хүртэл хугацаагаар зорчих эрхийг хязгаарлах ял шийтгэнэ.

О.УНДРАЛ

Энэ мэдээнд өгөх таны үнэлгээ

Хуваалцаарай Жиргээрэй