А.Баяржаргал: Зориг, эрсдэл гарган 9.3 тэрбумын асуудлын эзэн би гэдгийг зарлая

Зургаан дансаар нь 9.3 тэрбум төгрөг эргэлдсэн гэх А.О-г нэг сарын хугацаатай цагдан хориод байгаа. А.О нь “Ноорог” медиагийн ажилтан бөгөөд, нийт байгууллагын ажилчдыг хамтатган шалгаж, техник хэрэгслийг нь хураан нэгжсэн асуудал анхаарал татаж буй.

Тэгвэл А.О-гийн төрсөн ах А.Баяржаргал энэ талаар мэдэгдэл хийжээ. Тэрбээр цахим мөрийтэй тоглоомын “Торгоны зам” клубийн эзэн гэж өөрийгөө танилцууллаа. Цаашлаад, сар бүр тэднээс 75  сая төгрөг авч, үйл ажиллагааг нь хэвийн явуулж ирсэн ЦЕГ-ын Кибер гэмт хэрэгтэй тэмцэх хэлтсийн алба хаагчид бийг дурдсан юм.

А.Баяржаргал “Миний дүү А.Очбаяр 2-3 жил хэвлэх үйлдвэрт ажилласан. Дараа нь “Ноорог”-т ажилд ороод удаагүй байгаа юм билээ. Дүүгийнхээ дансыг онлайн мөрийтэй тоглоомд 6-7 сарын хугацаанд ашигласан, үүгээр 9.3 тэрбум төгрөг орж бас гарч байсан нь үнэн.

Юуны өмнө “Торгоны зам” клуб болон “Ноорог” гэдэг газарт ямар нэг хамаарал байхгүйг албан ёсоор хэлж байна.  2009 онд миний бие их сургуулиудаар лекц уншдаг, үзэл бодлоо нээлттэй илэрхийлдэг, нийгмийн идэвхтэй байсан. Тэр үед үзэл бодол нэгдсэн залуус жагсаал цуглаан хийхээр санаачилж, уриа лоозонгоо хэвлүүлж байхад цагдаа нар барьсан байдаг. Маргааш нь залуусын бүхий л итгэл үнэмшил нурсан байв. Өнөөдөр “Ноорог”-ийн залуус ч бас битгий мохоосой гэсэндээ энэ мэдэгдлийг хийхээр шийдлээ, өөрийгөө зарлахаар боллоо.

Манай аав ээж хоёрыг, хоёр дүүг, дансаа хэрэглүүлж байсан хүмүүсийг яллагдагчаар татсан. Гэтэл би энд байж байна. “Торгоны зам”-ын эзэн, мөрийтэй тоглоом зохион байгуулсан хүн нь би. Эсвэл би шалгагдаж байгаагаа мэдэхгүй явна уу. Би өөрөө, миний хамаг техник хэрэгсэл, дата энд байна. Манай ээж 60 гарсан хүн үйлчлэгч хийдэг. Манай аав хорт хавдартайгаа сүүлийн дөрвөн жил тэмцэж яваа. Монголын цагдаагийн байгууллага, ХЗДХЯ манай аав ээж хоёрыг мөрийтэй тоглоом зохион байгуулах чадамжтай гэж үзээд байх шиг.

Эхнэр бид хоёр Истанбул хотод ажиллаж, амьдарч байсан. Цар тахлын үеэр лайв хийж, бараа зардаг болсон. Нэг удаа ачаа маань каргогоор алга болсон. 100 гаруй хүнд 45 сая төгрөгийн өрөнд орсон. Энэ нөхцөл байдлаас гарахын тулд “Хос тамга” гэж цахим мөрийтэй тоглоомын газарт би админаар, эхнэр тогоочоор ажилд орсон байдаг. Тэнд найман сар орчим ажилласан.

Нэг өдөр, “Хос тамга”-ын дансыг СХД-ийн нэр бүхий цагдаа барилт хийж, холбогдсон. “Дахиад цааш нь данс барьж үзүүлэх үү?” гэсэн зүйлийг хэлж, залгасан. Улмаар удирдлагуудтай нь тохиролцсон. Жил гаруйн хугацаанд хамтарч ажилласан сураг бий. Тэр хүний нэр ус, хэдэн төгрөг авдаг байсан бүх мэдээлэл надад бий.

“Хос тамга”-т ажиллаж байхдаа би өөрийгөө стрийм хийж чаддаг, боломжийн гайгүй ярьдаг юм байна гэдгээ олж хараад, өөрөө клуб нээе гэж шийдсэн.

Манай клуб ажиллаад, 3 сарын дараа нэг дансан дээр барилт хийсэн. Ингээд бид “Энэ хүртэл яваад больё” гэж шийдсэн. Аав ээж рүү цагдаагаас ч залгаад эхэлсэн. Яг энэ мөчид Кибер гэмт хэрэгтэй тэмцэх хэлтсийн цагдаагаас “Танай ажил цаашаа явж болно, ашгаа ч сайн ол” гэсэн. Тэр хүнтэй найман сарын хугацаанд хамтарч ажилласан, 400-гаад сая төгрөгийг өгсөн байдаг.

2023 оны 10-11-р сарын үед цахим мөрийтэй тоглоомын маш олон клуб зогсож байсан. Харин манай клубийн нэг л данс барилтад орж, бусдаар өнчин ишигний хохиролгүй давж гарсан. Тэр хүн байсан учраас бид энэ давлагааг давж гарсан гэж ойлгуулдаг.

2024 оны 2-3-р сарын үед тухайн хүн авдаг орлогоо нэмэгдүүлэхийг хүссэн шиг. Зохиомол байдал үүсгэж, данс барихаа нэмж, “Өгдөг мөнгөө өсгөх юм бол асуудал гайгүй үргэлжилнэ” гэж дундын хүнээр дамжуулан хэлж эхэлсэн. Маш их хэмжээний мөнгө хүссэн. Тэр хүнийг амьдруулахын тулд бид бүгдээрээ ажиллах нөхцөл байдал үүссэн. Иймд өөр хүнийг олж цаашаа ажилласан байдаг. Тэр хүнтэйгээ одоогоор 10 сар орчим хамт ажиллаж байна. Эхлээд сард 50 саяыг өгдөг байсан. Сүүлдээ 75 болгож өсгөсөн. Сар бүрийн 20-нд өгдөг. “Ноорог”-ийн залуустай холбоотой асуудал дэгдсэнээр тэр хүнд мөнгө төлөөгүй эхний сар нь болж байна.

Хүмүүс үл итгэж магадгүй. “Торгоны зам” клубийн ард эздээс нь илүү ашиг олдог нууц ноёнтон байдгийг нотлох үүднээс сонсгох бичлэг ч байна. “Жэжү, Тайланд руу нийт гурван хэсэг алба хаагчид очин шалгалт хийж байна. Та нарын байгаа газар биш биз дээ?” гэх мэтээр бичиж байсан зурвасууд нь байна.

Энэ салбарт зуу зуун цахим мөрийтэй тоглоомын газрууд байгаа. Яагаад өнөөдрийг хүртэл байгаад байна вэ. Ганцхан шалтгаан бол цахим орчинд үйлдэгдэж байгаа гэмт хэргийг зогсоох ёстой хүмүүс нь өөрсдөө ашиг сонирхол бий болгож, хамтарч ажилладагт байгаа юм. Монголын мөрийтэй тоглоомын ертөнцийн хамгийн том ашиг хийдэг эзэн нь Кибер гэмт хэрэгтэй тэмцэх хэлтэс өөрөө. Өнөөдөр би өөрийгөө илчилж, бүх юмаа тайлбарлаад суугаа боловч миний ард нэр нүүрээ нуусан Кибер гэмт хэрэгтэй тэмцэх хэлтсийн ажилчид надаас илүүг олж байгаа.

Биднээс мөнгө авдаг гурван цагдаад хандаж нэг удаа хэлж үзсэн. 75 сая төгрөг бага биш, барилтад орсон дансаа чөлөөлж болохгүй юу гэж. “Бид юу ч хийхгүй байх нь л ийм үр дүнтэй шүү. Ажлаа хийж эхэлбэл л та нарын ажил зогсоно шүү” гэсэн. Олзны ихийг хүртсэн мөртлөө хөшигний ард үлдэх гээд байгаа тэр хүмүүсийг илчилнэ. Цахим мөрийтэй тоглоомын салбарт байгаа мянга мянган залуусыг төлөөлөн дуугарах болно.

Эцэст нь, А.Баяржавхлан хийсэн гэм нүглээ цайруулах гэсэнгүй. Цаг нь болохоор хувь тавилангаа эр хүн шиг угтах болно” гэлээ.

Г.САНСАРМАА

Сэтгэгдлээ илэрхийл

Share Tweet