Долоодугаар ангиасаа үерхэж, зургаан хүүхдийн аав ээж болсон тэдний хайрын түүх

"Анхны хайр бүтдэггүй" гэж хүмүүс ярьдаг бол бидний хайр бүтэхээр зогсохгүй наймуулаа болж. Долоодугаар ангид байхдаа нөхөртэйгөө үерхэж, хүн амьтны хөлөөс дөлж уулзаж, нэгэндээ хайрын захиа бичсээр арван жилээ төгссөн. Бид хоёр албан ёсоор айл гэр болоод 20 жилийн нүүр үзэж, зургаан хүүхдийн аав ээж болсон сайхан амьдарч байна" хэмээн ярих түүнийг П.Уранжаргал гэдэг. Тэрбээр алдарт эхийн I одонгоо гардахаар Дорнод аймгийн Баян-Уул сумаас нөхөр зургаан хүүхдийн хамт Төв талбайд ирээд байхад нь уулзаж цөөн хором ярилцсан юм.

Видео:

Түүний нөхрийг Д.Идэрмөнх гэдэг. Тэд нэг сум, нэг голын хоёр. Бүр нэг гудамжинд тоглож өссөн анхны хайрууд. Энэ тухай Д.Идэрмөнх "Би наймдугаар анги, манай хүн долоодугаар ангид байхдаа үерхэж, нөхөрлөж эхэлсэн. Тэр цагаас одоог хүртэл хамт байна. Эхнэрээ багаас нь мэднэ. Жаахан хүүхдүүд гудамжинд тоглож байх үедээ ханьдаа дурлаж байсан. Тухайн үед долоо, наймдугаар ангийн хүүхдүүд хүмүүсээс их ичиж санаа зовно. Одоогийнх шиг утас, харилцаа холбоо байсангүй. Захиа бичиж л ойлголцдог байлаа.

-Та хоёр гэр бүл болоод 20 жил болж байгаа гэсэн. Энэ хугацаанд жаргал, зовлон зөндөө л тохиолдсон байх. Таны сэтгэлд тод үлдсэн хамгийн жаргалтай үеэ дурсвал?

-Хамгийн сэтгэлд тод дурсамж гэвэл Хүслэн охин минь бидэнд ирсэн үе. Гурван сайхан хүүтэй байсан. Дөрөв дэх хүүхдээ охин байгаасай гэж манай гэр бүл үнэхээр их хүссэн. Тийм учраас бидний хүслийг биелүүлж ирсэн охиндоо Хүслэн гэж нэр хайрласан. Тэр үе л сэтгэлд их тод дурсамж болон үлдэж.

-Сайхан ханыхаа тухай дурсан яривал. Өөрөөсөө зургаан амь тасалж, дөрвөн хүү, хоёр охин төрүүлсэн байна?

-Бахархаж, талархахгүй байхын аргагүй хүн бол миний хань. Өдий зэрэгтэй сайхан амьдарч байгаа маань миний эхнэрийн л "буян" гэж боддог. Хүн ханиа зөв сонговол бусад нь болдог юм шиг.

-Анхны хайраа амьдрал болгож зургаан сайхан хүүхдийн аав ээж болсондоо үргэлж баярладаг-

Д.Идэрмөнхийнх Баян-Уул сумандаа амьдарч тэмээнээс бусад малыг өсгөн үржүүлдэг байна. Тэд гол усандаа ажилч хичээнгүйгээрээ "нэртэй" ажээ. Анхны хайраа амьдрал болгож, хөдөлмөр яваа тухайгаа эхнэр П.Уранжаргал "Анхны хайраа амьдрал болгож зургаан сайхан хүүхдийн аав ээж болсондоо үргэлж баярладаг. Өөрсдийн амьдралаараа үр хүүхдэдээ үлгэрлэнэ гэж боддог.

-Саяхан алдарт эхийн I одонгоо зүүгээд гараад ирлээ. Ямар мэдрэмж төрдөг юм байна?

-Алдарт эхийн I одонгоо сумынхаа ЗДТГ руу ороод л авчхаж байсан юм. Энэ удаа нутгаасаа зорьж ирж төрийн тэргүүнээсээ одон гардах сайхан мэдрэмж байдаг юм байна.

-Зургаан сайхан үрийн ээж хүн. Үр хүүхдүүддээ юуг захиж, хэрхэн хүмүүжилдэг вэ?

-Өнөр өтгөн, олуулаа бужигнах сайхан байдаг. Хүүхдүүд эхнээсээ том болоод ачаа хөнгөрч л байна. Том хоёр хүү маань эхнээсээ найз охинтой болсон ээжээ гэж байна. Би огт үгүйсгэдэггүй. Гол нь зөв үерхэж нөхөрлөөрэй миний хүүхдүүд гэдэг. Ер нь хүүхдүүдтэйгээ аль болох чөлөөтэй ярилцахыг хичээдэг.

Б.АЗЖАРГАЛ

Өөрийн сэтгэгдлээ илэрхийл

Share Tweet