Таван настай А.Хангай: "Хонгороо"-гоо унаад цэцэрлэгтээ явах нь хамгийн гоё

"Хонгороо" гэх морио өвөл, зун гэлгүй тэжээж хавартаа унаж цэцэрлэгтээ явдаг таван настай А.Хангай хүүтэй цөөн хором ярилцлаа. Тэрбээр Дундговь аймгийн Дэлгэрхангай сумын Сургуулийн өмнөх боловсрол буюу цэцэрлэгийн сурагч. Тэднийх өвөлдөө сум суурин бараадаж зундаа хөдөө гардаг байна.

А.Хангай сумын төвийн хашаандаа "Хонгороо" тэргүүтэй морьдоо тэжээнэ. Өвлийн хүйтэн гэлгүй өглөө бүр "Хонгороо"-гоо эмээлж унаад аавыгаа дагууд цэцэрлэгтээ мордоно. Орой Хангайг аав "Хонгороо" хоёр нь яг цагтаа цэцэрлэгийн үүднээс тосно.

Видео:

"Аав ээж хоёрыг гаргачихъя. Тэгвэл би гоё ярьж чадна" эгч ээ гэх хэвлүүхэн түүний бичлэгийг манай уншигчид цахим сүлжээнээс үзсэн байж магад. Өмссөн дээл, жанжин малгай, хэвлүүн яриа гээд хэзээний том хүн аятай.

-"Танай нутагт хур бороо элбэг оров уу, сайхан зун болж байна уу" гэж бид хоёрын яриа эхэлсэн юм.

-Бороо орсон, ороод нууртай болсон. Сайхан зусаж байна. Зуншлага сайхан. Би хөөргөө гаргаад ирье. Танд тамхилъя. Надад бүр хоёр хөөрөг байгаа.

-Аавтайгаа хамт адуунд хэр явж байна. Адуунд явах гоё байна уу?

Адуугаа эрээд их хол явсан. Эцэст нь олсон, адуунд явах дуртай. Манай адуунууд ийш, тийшээ их хол явчихдаг. Араас нь явах гэж их ядарна. Харин ишигнүүд нь гайгүй, ойр бэлчдэг.

-Танайд хэдэн төрлийн мал байдаг вэ. Чи нэрлэж чадах уу?

-Тэмээ байхгүй. Үхэр, ямаа, хонь, адуу бий. Үхрээ саасан, ямаагаа саагаагүй. Саасан сүүгээрээ сүүтэй цай, тараг хийж уудаг. Харин гүүгээ саагаад айраг гаргана. Тараг идэхээр цагаан болно. Шүд нь бас цагаан болно. Айраг уухаар мөн цагаан, том болдог.

Фото:

-Чамд "Хонгороо" гээд морь байдаг гэсэн. Хэзээнээс морь унаж сурсан юм бэ. Хурдан морь унаж уралдах бодол бий юу?

-Найман настай болохоороо хурдан, догшин морь унаж чадна. Надад хар, алаг, бор зээрд зүстэй морьд байгаа. Би "Хонгороо"-гоо унаад цэцэрлэгтээ явах нь хамгийн гоё байдаг.

-Маш сайн унадаг дугуй жолооддог юм байна лээ. Хэзээ тэгж сурсан юм бэ?

-Надад хоёр дугуй байгаа. Нэгийг нь хөдөө, нөгөөхийг нь сумын төвд унадаг. Хүүхдийн баяраар би улаан дугуйгаа унаад түрүүлсэн. Бас сумын наадмаар хүүхдийн барилдаанд барилдаж түрүүлнэ гэж бодож байгаа.

-Хангай хөдөө очиж өвөө, эмээдээ яаж тусалдаг гэлээ?

-Худаг, усан дээр хонь ямааг нь хорьж өгч тусалдаг. Өөр зөндөө их тус хүргэдэг. Одоо ингээд ярих зүйл маань болсон. Та надад KFC шарж өгөх үү. Тэгвэл би сайн ярьж чадна. /гэж бид хоёрын яриа инээдэв болж дууссан юм./

Б.АЗЖАРГАЛ

Өөрийн сэтгэгдлээ илэрхийл

Share Tweet