"Spinning"-ээр хичээлдэг Ж.Алтанцэцэг: Би өөрийгөө өндөр настай гэж боддоггүй. Дөнгөж л 70 гарч байна

"Би өөрийгөө 70 гарсан настай хүн гэж огт боддоггүй. Заримдаа насаа мартаад, саравчтай малгай өмсөөд л зээ нартайгаа хөлбөмбөг тоглоод гүйчихдэг. Холоос хараад ирсэн хүүхдүүд "яана эмээ байсан байна шүү дээ" гэж гайхаад байдаг юм. Хүн хөгширч биш хөшиж үхдэг гэдэг нь үнэн байх шүү" хэмээн ярих түүнийг Ж.Алтанцэцэг гэдэг.

Видео:

Тэрбээр 70 насыг давж яваа нэгэн. Түүний өглөө ихэнхдээ 05:00 цагаас эхэлнэ. Орноосоо босоод дасгалаа хийхээ хэзээ ч мартахгүй. 07:00 цагаас "Spinning"-дээ ирж дугуй жийнэ. Нарны эртэд босож залуустай хамт сайхан хөгжим сонсож, дугуй жийх нь Ж.Алтанцэцэгийн амьдралын нэг хэсэг, дадал болжээ. Түүнтэй ярилцсан ярилцлагаа хүргэж байна.

-Өдөрт 10 мянган алхам алхана. Нүхтийн ам өгсөж ууланд гараад Баянзүрхийн товчоогоор ороод ирдэг байлаа-

-Таны насны хүн тогтмол, тууштай "Spinning"-ээр хичээллэнэ гэдэг амар биш байх. Энэ их дуу чимээнээс та төвөг шааж ядрахгүй юу?

-Үгүй шүү. Огт ядрахгүй. Дуу ер нь гоё шүү дээ. Би зураач хүн, залуу байхдаа олон цагаар дуу сонсоод зураг зураад суудаг байлаа. Дуу их хань болдог эд. Энд бол өглөө нарны эртэд залуустай сайхан хөгжим сонсоод эрч хүчтэй дасгал хийх нь сайхан байдаг юм. Огт залхаж ядрахгүй. Хүмүүс ихэвчлэн илүүдэл жингээ хасах гэж "Spinning" хийдэг. Би бол булчингаа чангалах зорилгоор 10-20 минут л жийдэг юм. Өдөр болгон ирж бас чадахгүй байна, сүүлийн үед. Гэхдээ орхилгүй, боломжоороо ирдэг.

-Эмэгтэй хүний насыг асуудаг гэдэг. Гэхдээ таны насыг асууж мэдмээр санагдаад байна л даа?

-Нэмэх 70 нь настай гээд л ойлгочих /инээв/. Намайг жаахан байхад аав ээжийн 50, 60 хүрсэн найзууд их ирнэ. "Нас явж өглөө шүү" гээд л ярьдаг байсан. Тухайн үед юун сүртэй юм дээ гэж боддог байлаа. Гэтэл нэг мэдсэн би өөрөө 50 насыг давчихсан байдаг байгаа. Цаг хугацаа хурдан байгаа биз. Хүн өөртөө ариг гамтай байх хэрэгтэй. Нөгөө "нас бол тоо" гэдэг шиг. Хүүхэд байхад л манай аав, ээж бид нарыг өөртөө хайртай, "арчаатай" бай гэж сургасан. Би ч ач зээ нартаа тэгж сургадаг.

-Хүн "хөгширч биш хөшиж үхдэг" гэж ярьдаг. Энэ үгний жишээ нь та юм шиг ээ. Таны үзэж туулснаар хөдөлгөөн амьдрал хэр хэрэгтэй юм байна?

-Хэрэгтэй байлгүй яах вэ. Хөдөлгөөн хийхгүй бол хөл өвчин орчихдог. Сонин шүү. "Spinning"-ээс гадна ууланд их алхана. Хүн ер нь эцсийн эцэст байгаль дээрээ л очдог амьтан юм байна. Хүн байгаль хоёр хүйн холбоотой гэдэг нь үнэн. Манай хотхон дотор хус мод байдаг юм. Түүнийг очоод хоёр талаараа 10 минут орчим тэвэрчихээр энерги, эрч хүч нэмэгдээд сайхан болчихдог.

-Хэр их алхдаг вэ?

-Өдөрт 10 мянган алхам алхана. Тэр тусмаа ууланд алхах дуртай. Урин дулаанд бол уулнаас салахгүй шүү дээ. Багаасаа л ууланд алхаж, зураг зурдаг байсан болохоор ууланд яагаад ч юм "амьтай" байдаг. Нүхтийн ам өөд өгсөж ууланд гарч явсаар Баянзүрхийн товчоогоор ороод ирдэг байлаа.

-Богд ууланд ан амьтантай их таарах уу?

-Туулай, хэрэм, буга, зэрлэг гахай гээд л... Тэр байтугай чонотой хүртэл таарч байсан. Залуу ч байсан болохоор айдасгүй байсан хэрэг. Зэрлэг гахай бүр хөөж үзсэн. Бараг барихын даваан дээр өтгөн ой рүү яваад орчихсон.

-Өндөр өсгийтэй гутал өмссөн харагдсан. Та мисс шиг л алхаж байна лээ?

-Би 60 жил өсгийтэй гутал өмсөж байна. Хүүхэд байхад хөл дээр яс ургаснаас болоод өндөр өсгийт өмсөх хэрэгтэй болсон. 10 настайгаасаа өмссөн болоод ч тэр үү хөлд эвтэйхэн амар байдаг. Ууланд хүртэл өндөр өсгийтөө өмсөөд явдаг байсан. Өндөр лүү гарахдаа бол пүүз өмсөнө. Харин буухдаа өсгийтэй гутал өмсөөд буучихдаг л байсан юм. Пүүз өмсөж байгаад өндөр өсгийт өмсөхөөр хөл амраад явчихдаг. Багаасаа өмссөн болохоор тэр байх. Ууланд алхахад түшигтэй өсгийтэй гуталтай явах пүүзнээс илүү нь хөлд амар байдаг юм.

Б.АЗЖАРГАЛ

Өөрийн сэтгэгдлээ илэрхийл

Share Tweet