Узбекистан: Хуриман дээрээ сүйт бүсгүйгээ цохисон залууг шүүх хурал болов

Хуримынхаа үеэр сүйт бүсгүйнхээ толгой руу хүчтэй нударсан сүйт залууд шүүх шийтгэл ногдуулаагүй байна. Сүйт бүсгүйн нэхэмжлэл болон түүний гэр бүлийнхнээс ямар нэгэн өргөдөл, гомдол ирээгүй тул шүүгч ийм шийдвэр гаргасан гэж тус улын “Gazeta.uz” мэдээллээ.

Харин захиргааны хэргийн шүүх дээр өнөөх сүйт залуу сүйт бүсгүй болон түүний ар гэрийнхнээс уучлалт гуйж, дахин ийм танхай балмад үйлдэл гаргахгүй гэдгээ амласан байна.

“Би биеэ барьж чадалгүй түүнд гар хүрсэн. Бидний хоорондын үл ойлголцол арилж, хуримын баяраа цааш үргэлжлүүлсэн. Би сүйт бүсгүйгээсээ уучлалт гуйсан. Дахиж ийм зүйл болохгүй” хэмээн сүйт залуу шүүхийн өмнө мэдүүлсэн байна.

Сүйт бүсгүйн ээж мөн хүргэн нь тэднээс уучлалт гуйсан гэдгийг баталсан байна. Мөн хүргэний талын хамаатан садан ч бүгд уучлалт гуйсны дараа тэд хурим найраа үргэлжлүүлсэн гэж хэлэв.

Залуу хос жилийн өмнө сүй тавьж, энэ оны тавдугаар сарын 10-нд гэрлэлтийн бүртгэлийн газарт өргөдлөө өгсөн ч гэрлэлтийн гэрчилгээг нь зургадугаар сарын 15-нд буюу хуримаа хийснээс нь хойш ес хоногийн дараа өгсөн аж.

Сүйт залуу нь сүйт бүсгүйнхээ толгойн дундуур хүчтэй цохиж буй дүрс бичлэг олон нийтийн сүлжээгээр тарж, хэвлэл мэдээллийн хэрэгслүүдээр цацагдсаны дараа цагдаагийн байгууллагаас сүйт залууг “Жижиг танхай” гэсэн зүйл ангиар захиргааны хэрэг үүсгэн шалгаж эхэлсэн аж. Энэ зүйлд зааснаар залууг 15 хоног баривчлан саатуулах эсхүл мөнгөн торгууль ногдуулдаг юм байна.

Тэдний хурим зургадугаар сарын 6-нд Сурхандарье гэх газар болсон ба баярын үеэр гэрлэж буй хосын найз нөхөд нь тэдэнд зориулж хөгжилтэй тоглоом зохион байгуулж байсан юм. Тоглоомонд сүйт бүсгүй нь түрүүлж, азтан болоход сүйт залуу нь гэнэт уурлаж, түүний толгой руу цохисон юм.

Эх сурвалж: Canews

Энэ мэдээнд өгөх таны үнэлгээ

Хуваалцаарай Жиргээрэй