АТГ-ын Мөрдөн шалгах хэлтэс өнгөрсөн долоо хоногт гэмт хэргийн шинжтэй 17 гомдол, мэдээлэл хүлээн авч, нийт 107 гомдол, мэдээллийг шалгав. Үүнээс 11 гомдол, мэдээлэлд хэрэг бүртгэлтийн хэрэг нээж, 11 гомдол, мэдээлэлд хэрэг бүртгэлтийн хэрэг нээхээс татгалзах, 4 гомдол, мэдээллийг харьяаллын дагуу шилжүүлэх саналтайгаар прокурорт шилжүүлсэн бөгөөд одоогоор 81 гомдол, мэдээллийг хянан шалгаж байна.
Түүнчлэн эрүүгийн 726 хэрэгт мөрдөн байцаалтын ажиллагаа явуулснаас өнгөрсөн долоо хоногт 8 хэргийг шүүхэд шилжүүлэх, 4 хэргийг хаах саналтай прокурорт хүргүүлж, 1 хэргийг нэгтгэн шалгаж байна.
Мөрдөн шалгах ажиллагаанд одоогоор 713 хэрэг шалгагдаж байна. Өнгөрсөн долоо хоногт гэмт хэрэг гарахад нөлөөлсөн шалтгаан, нөхцөлийг арилгуулахаар мөрдөгчийн 3 мэдэгдэл бичиж холбогдох байгууллагуудад хүргүүлжээ.
Шүүхэд шилжүүлэх саналтайгаар прокурорын байгууллагад хүргүүлсэн хэргүүдийг дурьдвал,
- Ховд аймгийн Жаргалант сумын III сургуулийн удирдах албан тушаалтан “Г” нь бусдаас хахууль авсан гэх;
- Зэвсэгт хүчний Тээврийн хяналтын албаны ажилтан “Б” нь ажлын байрны тодорхойлолтод заасан чиг үүргээ хэрэгжүүлэхдээ бусдаас хахууль авсан гэх;
- Хөвсгөл аймаг дахь Цагдаагийн газрын алба хаагч “Э” нь албаны чиг үүргээ хэрэгжүүлээгүйн хариуд бусдаас хахууль авсан гэх;
- Баян-Өлгий аймгийн Бугат сумын удирдах албан тушаалтан “Ж” нь албан тушаалаа урвуулан ашиглаж бусдад хууль бус давуу байдал олгосон гэх;
- Баянхонгор аймгийн удирдах албан тушаалтан “Б”, “О”, “И” нар хахууль өгөгчийн ашиг сонирхлын үүднээс албаны чиг үүргийн хувьд гүйцэтгэх ёсгүй үйлдлийг хийж бусдаас 100,000,000 төгрөгийг хахуульд авсан гэх хэргүүд багтжээ.
Б.БАЯРТ
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.