Хоёр шатны шүүхэд давж заалдсан ч банк иргэнд ялагдаж, зээл олгосны шимтгэлийг буцаан төллөө

Зээлийн үнийн дүнгийн нэг хувиар шимтгэл авсан банкаа шүүхэд өгсөн иргэн ялжээ. Улмаар нэг хувийн шимтгэлээ буцаан авахаар болсон байна.

Иргэн Г.Ариунаа "Голомт банк"-ийг шүүхэд өгсөн бөгөөд зээлийн үнийн дүнгийн нэг хувиар шимтгэл төлөх гэрээний тохиролцоо хууль зөрчсөн эсэх тал дээр Дээд шүүхээс шийдвэр гаргажээ. Хэргийн талаар доор дэлгэрүүлэн бичье.

Банкууд зээл олгохдоо зээлийн үнийн дүнгийн нэг хувьтай тэнцэх хэмжээний шимтгэлийг зээлдэгчээс авдаг билээ. Иргэн Г.Ариунаа үүнийг хууль зөрчсөн, зээлдэгчийн эрх ашгийг илт зөрчсөн, нэг хувийн шимтгэлийг үндэслэлгүй тогтоон, суутгаж авдаг гэж үзсэн байна.

Иргэний хууль, зээлийн үйл ажиллагааг нарийвчлан зохицуулсан хуулиар "зээлийн хүү гэдэг нь мөнгөн хөрөнгийг ашигласны хариу төлбөр буюу үнэ юм" гэжээ. Өөрөөр хэлбэл зээлийн хүүд шимтгэл багтдаггүй. Түүнчлэн зээлийн бодит өртөг гэдэгт хүү, шимтгэл, хураамж, бусад нэмэлт зардал багтдаг.

Хяналтын шатны шүүхээс тухайн банкийг зээлийн үйлчилгээ үзүүлэхдээ шимтгэл тогтоож буй нь банкны үйл ажиллагааны хууль зөрчөөгүй хэмээн үзжээ. Харин хариуцагчаар төлүүлж буй шимтгэлийн хэмжээ үндэслэлтэй, бодит зардалд нийцсэн байх ёстой бөгөөд талууд зээлийн гэрээнд шимтгэлийн хэмжээг нэг хувь гэж тохирсон ч яагаад нэг хувь эсвэл түүнээс доош байх эсэх талаар хариуцагч "Голомт банк" ХК шүүхэд баримт гаргаж өгөөгүй ажээ.

Товчхондоо бол уг хэрэгт банк нь зээлийн бүтээгдэхүүний ямар шалгуураар шимтгэл тогтоосон талаарх баримтыг шүүхэд гаргаж өгөөгүй учраас шимтгэлийг буцаан гаргуулж, нэхэмжлэгчид олгохоор болсон байна. Улмаар иргэн Г.Ариунаа нэг хувийн зээлийн шимтгэлд төлсөн мөнгөө эргүүлэн авахаар болжээ.

Дээрх мэт гэрээний маргаанд зээлийн шимтгэлийн талаар шүүхэд нэхэмжлэл гаргах хөөн хэлэлцэх хугацаа нь Иргэний хуульд заасанчлан гурван жилийн хугацааг хамаарна гэж шүүх дүгнэжээ.

Энэ мэдээнд өгөх таны үнэлгээ

Хуваалцаарай Жиргээрэй