Ц.Пүрэвтүвшин: “Эрдэнэт” үйлдвэрийн 49 хувийг Сингапурын компани руу шилжүүлээгүй

"Монголын зэс" корпорациас өнөөдөр Төрийн өмчийн бодлого, зохицуулалтын газарт тодруулга хүсэх тухай албан бичиг хүргүүлэв. Учир нь, УИХ-ын гишүүн Л.Оюун-Эрдэнэ “Эрдэнэт” үйлдвэрийн 49 хувийг Сингапурын компанид шилжсэн гэх мэдээллийг өгөөд  байгаа юм. Уг мэдээлэл ор үндэсгүй гэдгийг "Монголын зэс" корпораци мэдэгдэж,  үүнд албан ёсны тодруулга, тайлбар өгөх хүсэлтийг ийнхүү Төрийн өмчийн бодлого, зохицуулалтын газарт өгч буйгаа тодотголоо.

Ц.ПҮРЭВТҮВШИН: СТАНДАРТ БАНКНЫ ӨР 125 САЯ АМ.ДОЛЛАРТ ХҮРСЭН

Энэ үеэр сэтгүүлчдэд "Монголын зэс" корпорацийн гүйцэтгэх гүйцэтгэх захирал Ц.Пүрэвтүвшин “Төрийн өмчийн бодлого зохицуулалтын газар хүсэлт өгч байна. Үүнд, “Эрдэнэт” үйлдвэрийн 49 болоод 51 хувь 100 хувь Монголын талд бүртгэлтэй байгаа. “Эрдэнэт” үйлдвэрийн ТУЗ-ийн долоон гишүүн болон ерөнхий захирал нь төрөөс томилогдсон хүмүүс байгаа. Ийм тохиолдолд бид ямар нэгэн худалдаа хийх, гадаадын компанид зарах хэлцэл хийгээгүй. Манай компанийн зүгээс “Эрдэнэт” үйлдвэрийн 49 хувийн хувьцааг бид анх худалдаж авахдаа гадаадын ямар нэг компанид худалдах ямар ч сонирхол, зорилго байгаагүй.

Цаашид ч тийм зүйл болохгүй, Монголын ард түмэн үр шимийг нь хүртэнэ гэж боддог. Сингапурын компани руу шилжүүлэх гэж байгаа асуудал огт биш. Тухайн бичигт миний нэр дээр байгаа компани, өөрийнхөө компани руу шилжүүлэх процесс байсан. Харамсалтай нь УИХ-ын гишүүд таслан зогсоолоо. Бидний хувьд “Эрдэнэт” үйлдвэртэй холбоотой "Стандарт" банкны асуудал 2016 онд шийдэгдсэн бөгөөд тухай үед  нийт өр төлбөр 95 сая ам.доллар байсан бол өнөөдөр 125 сая ам.доллар буюу 300 гаруй тэрбум төгрөг болсон. “Стандарт” банктай холбоотой 300 гаруй тэрбум төгрөгийн төлбөр төлөх Английн Арбитрын шийдвэр гарсан байгаа. Удахгүй энэ шийдвэрийг албадан гүйцэтгэнэ.

Энэ нөхцөлд “Эрдэнэт” үйлдвэрийн аль нэг хувьцаа эзэмшигч нь гадаадын хөрөнгө оруулалттай буюу Сингапурын хөрөнгө оруулалттай компани байсан бол тухайн үед шинэ нөхцөл байдал илрэх буюу Арбитрын шүүхийн шийдвэрийг дахин авч үзэх нөхцөл үүсэх байсан. Сингапур бол олон улсын томоохон Арбитрын шүүх байдаг бөгөөд Английн Арбитрын шүүхийн шийдвэр дахин авч үзэх боломжтой цорын ганц улс нь Сингапур  байсан. Сингапурын хөрөнгө оруулалттай компани байвал дансыг нь хаах, Арбитрын шийдвэрийг албадан гүйцэтгэхгүй байх боломж байсан. Энэ зорилгоор 300 тэрбум төгрөгийг бууруулах зорилгоор хийх гэж байсан.

 Харамсалтай нь энэ ажиллагаа УИХ-ын нэр бүхий гишүүдээс бол хойшилж байх шиг байна. "Стандарт" банктай  холбоотой шийдвэр нааштай гарах боломж бүрдэх бүрт улстөрчид энэ асуудлыг зориуд гацаадаг. УИХ-ын гишүүн Л.Оюун-Эрдэнэ манай компанийн ажилтан н.Номиндарь  гэдэг хүний нэр дээр шилжүүлсэн гэсэн мэдээллийг өгсөн. Тухайн бичигт байгаа тэр хүн нь манай компанийн итгэмжлэгдсэн төлөөлөгч байсан. Энэ хүн Улсын бүртгэлийн газарт бичиг хүргүүлэх үүрэгтэй хүн. Төрийн түшээ хүн ийм худлаа мэдээлэл тарааж байгаад харамсч байна” гэсэн мэдээлэл өглөө.

М.МӨНХБААТАР: УИХ-ЫН ЗАЛУУ ГИШҮҮД УЛС ТӨРИЙН ЭРХ АШИГТ НИЙЦСЭН МЭДЭГДЭЛ ХИЙЛЭЭ

Түүнчлэн "Монголын зэс" корпорацийн Удирдах зөвлөлийн дарга М.Мөнхбаатар “Хоёр хүн шүүхээр маргаантай байвал нөгөө талдаа ямар нэг байдлаар өөрийнхөө өмгөөлүүлэх, хуулийн процессоо эсрэг талын үйлчлүүлэгчдээ хэлдэггүй. Гэтэл өнөөдөр УИХ-ын залуу гишүүд улс төрийн эрх ашигт нийцсэн мэдэгдэл хийлээ. “Стандарт” банкны асуудал дээр эдгээр гишүүд яагаад дугарахгүй байгаа юм бэ. “Эрдэнэт” үйлдвэрийн 51 хувь нь төрийн өмчид байгаа. Гэтэл төрийн өмчит компани нь 300 орчим тэрбум төгрөгийн алдагдалд орох гэж байхад яагаад дугарахгүй байгаа юм бол. Татвар төлөгчдийн мөнгийг бууруулах, байхгүй болгохын төлөө бид ажиллаж байсан. Монгол Улсын иргэний болон захиргааны хэргийн шүүх дээр бид ялсан.

Гэтэл өнөөдрийг хүртэл шүүхийн шийдвэр биелүүлэхгүй байна. Энэ бол улс төрийн зорилготой байгаад байна. Тэр бичиг манай компани болон Улсын бүртгэлийн ерөнхий газарт хүргүүлсэн хоёрхон хувь байсан. Энэ мэдээлэл Улсын бүртгэлийн ерөнхий газраас тараагдсан. Ердөө хоёр л хувь байсан. Өнөөдөр хууль эрх зүйн хувьд Засгийн газар бие даан шийдвэр гаргах боломжгүй. Өмнө нь Монгол Улсын Засгийн газар “Хан ресурс” компанитай маргалдаж байсныг санаж байгаа байх. Бас л 400 орчим сая ам.долларын асуудал яригдаж байсан.

Энэ үед Берлинд буусан Монгол Улсын 100 хувь өмчит “МИАТ” компанийн онгоцыг хурааж авах нөхцөл байдал үүсч байсан. Ийм нөхцөл байдлыг үүсгэхгүйн төлөө ажиллаж байсныг өнөөдөр байхгүй болголоо. Үүнийг цаашдаа хэрхэн зөв тийш нь хандуулах вэ гэдэг дээр ажиллах ёстой байтал жижиг улс төр хийснээс болж ийм нөхцөл байдалд хүргэлээ. Хууль зүйн хувьд шинэ нөхцөл байдал үүсэх боломж байсан” гэж онцоллоо.

Г.ИТГЭЛ

Энэ мэдээнд өгөх таны үнэлгээ

Хуваалцаарай Жиргээрэй