Хамтран амьдрагч эмэгтэйгээ хардсаны улмаас хамт байсан залууг нь зодож хөнөөжээ

Сонгинохайрхан дүүрэгт архи согтууруулах ундаа хэрэглэсэн үедээ хамтран амьдрагч болох А гэх эмэгтэйг хардсаны улмаас хамт байсан залууг нь зодож хөнөөсөн хэрэг гарсан байна.

Тус гэмт хэргийг үйлдсэн Н шүүхэд "...талийгаач, хамтран амьдрагч А нар нэг оронд орчихсон, шалдан хэвтэж байсан. Түүнээс нь болж би уурлаад талийгаачтай маргалдсан. Гэтэл талийгаач надад чамаас өмнө би А-тай амьдарч байсан юм гэж хэлэхээр нь би заамдаж аваад шанаа тус газар нь хоёр удаа цохиод гараад явсан. Өөр хэлэх зүйл алга” хэмээн мэдүүлсэн байна.

Хүний амь насыг хөнөөсөн уг үйлдэл нь шүүгдэгчийн болоод гэрчүүдийн мэдүүлэг, шүүх шинжилгээний дүгнэлт, хэргийн газрын дүгнэлт зэргээр нотлогджээ.

Улмаар шүүх байгууллагаас хүний амь насыг санаатайгаар хөнөөсөн хэмээн үзэж Эрүүгийн хуулийн 10.1 дүгээр зүйлийн 1 дэх хэсэгт зааснаар шүүгдэгч Г.Н-д арван жилийн хугацаагаар хорих ял оноожээ.

Холбогдох хуулийн заалт: Эрүүгийн хуулийн 10.1 дүгээр заалт. Хүнийг алах

1.Хүнийг алсан бол найман жилээс арван таван жил хүртэл хугацаагаар хорих ял шийтгэнэ.

2.Хүнийг:

• 2.1.онц харгис хэрцгийгээр;
• 2.2.олон хүний амь бие, эрүүл мэнд, эд хөрөнгөд хохирол учруулж болох аргаар;
• 2.3.захиалгаар;
• 2.4.өөр гэмт хэргийг нуун далдлах, хялбарчлах зорилгоор;
• 2.5.өөртөө, бусдад эдийн, эдийн бус ашигтай байдал бий болгох зорилгоор;
• 2.6.хоёр, түүнээс олон хүнийг;
• 2.7.хохирогчийн биеэ хамгаалж чадахгүй, жирэмсэн болохыг мэдсээр байж;
• 2.8.гэр бүлийн хүчирхийлэл үйлдэж;
• 2.9.эрхэлж байгаа ажил, албан үүрэгтэй нь холбогдуулж өөрийг нь, түүний ойр дотны хүнийг;
• 2.10.зохион байгуулалттай гэмт бүлгийн гишүүн зохион байгуулалттай гэмт үйл ажиллагааныхаа явцад;
• 2.11.бүлэглэж;
• 2.12.эрүүдэн шүүж;
• 2.13.цус, эд, эрхтнийг авах зорилгоор;
• 2.14.үзэл бодол, арьсны өнгө, үндэс, угсаа, шашин шүтлэг, бэлгийн, хүйсийн чиг баримжаагаар нь үзэн ядаж алсан бол арван хоёр жилээс хорин жил хүртэл хугацаагаар, эсхүл бүх насаар нь хорих ял шийтгэнэ.

3.Бага насны хүүхдийг алсан бол арван хоёр жилээс хорин таван жил хүртэл хугацаагаар, эсхүл бүх насаар нь хорих ял шийтгэнэ.

О.УНДРАЛ

Энэ мэдээнд өгөх таны үнэлгээ

Хуваалцаарай Жиргээрэй