Гурван жилийн хугацаанд 723 алба хаагч, цагдаа нар ажлын үеэрээ гэмтэл авч хохирчээ

Өнгөрсөн гурван жилийн хугацаанд 723 алба хаагч албан үүргээ гүйцэтгэх явцдаа машинд мөргүүлэх, бусдад зодуулах зэрэг байдлаар биедээ гэмтэл авч, хохирсон байна.

Гэмтэж, хохирсон алба хаагчдын дийлэнх нь дуудлага мэдээллийн дагуу хэргийн газарт очиж, иргэдтэй шууд харьцдаг эргүүлийн офицер, эргүүлийн цагдаа, хэсгийн байцаагч, хэсгийн төлөөлөгч, хэсгийн цагдаа, зохицуулагч, цагдаа зохицуулагч, цагдаа жолооч, сум, баг, хороо хариуцсан цагдаа зэрэг алба хаагчид юм.

Статистик мэдээллээс авч үзэхэд хууль сахиулагчийг эсэргүүцэх гэмт хэргийн 82 хувийг иргэд согтуугаар үйлдсэн байна.

Тухайлбал, Хан-Уул дүүргийн нутаг дэвсгэрт энэ оны зургаадугаар сарын 7-8-нд шилжих шөнө 00 цагийн орчим согтуугаар тээврийн хэрэгсэл жолоодож явсан иргэн "Н" нь алба хаагч “Ц”-ийн  тавьсан хууль ёсны шаардлагыг эсэргүүцэж, нүүрэн тус газарт нь 4-5 удаа мөргөж, танхайрсан зэрэг гэмт хэрэг, зөрчлийн шинжтэй мэдээлэл бүртгэгдээд байна.

"Төрийн албан хаагчийг хууль сахиулах чиг үүргийг хэрэгжүүлэх явцад тавьсан хууль ёсны шаардлагыг хүн, хуулийн этгээд биелүүлээгүй, эсхүл биелүүлэхгүй байхыг уриалсан, үйл ажиллагаанд нь саад учруулсан, хүч хэрэглэхгүйгээр эсэргүүцсэн, доромжилсон үйлдэлд  Зөрчлийн тухай хуулийн 15.2 дугаар зүйлд заасны дагуу хоёр зуун тавин нэгжтэй тэнцэх хэмжээний төгрөгөөр, хуулийн этгээдийг хоёр мянга таван зуун нэгжтэй тэнцэх хэмжээний төгрөгөөр торгоно" гэж хуульчилсан байдаг.

Харин хууль сахиулагчийг албан үүргээ биелүүлэхтэй нь холбогдуулан хүч  хэрэглэсэн, хүч хэрэглэхээр заналхийлж эсэргүүцсэн үйлдэлд Эрүүгийн хуулийн 23.1 дүгээр зүйлд заасны дагуу эрүүгийн хариуцлага оногдуулах хуулийн зохицуулалттай байдаг.

Тиймээс иргэдийг цагдаагийн алба хаагчийн хууль ёсны тавьсан шаардлагыг биелүүлэх, үйл ажиллагаанд нь саад учруулахгүй байхыг ЦЕГ-аас хүсэж байна.

Энэ мэдээнд өгөх таны үнэлгээ

Хуваалцаарай Жиргээрэй