СОНГУУЛИЙН АНИР: Х.Баттулга, Д.Дагвадорж нарыг тандаж, Н.Ганбямба, Б.Энхбаатар нарыг голж мэдэх МАН

Сонгинохайрхан, Хэнтийн нөхөн сонгууль аравдугаар сарын 10-нд товлогдсон учир намууд нэр дэвшигчдээ есдүгээр сарын 10 гэхэд тодруулах учиртай. Чуулган завсарлаад төрийн ордон, ордонг тойрсон улс төрийн яриа нам гүмд автсан өдрүүд үргэлжилж байна. Харин гишүүд нутаг нугаараа амарч, айраг цагаа эргүүлж яваа. Гэвч хөшигний ард нөхөн сонгуулийн асуудал хамгийн хурцаар яригдаж буй. МАН-аас Сонгинохайрхан, Хэнтийн нөхөн сонгуульд ямар хүмүүсийн нэр яригдаж, хэн хэн амбиц гарган зүтгэж байгааг хүргэж байна.

-СОНГИНОХАЙРХАН: Х.БАТТУЛГА, Д.ДАГВАДОРЖ НАРЫН НЭР ДЭВШИХ ЭСЭХЭЭС ШАЛТГААЛЖ ӨРСӨЛДӨГЧ ТАВИНА-

Сонгинохайрханы тойрогт одоогоор МАН-аас тус дүүргийн Засаг дарга Н.Алтаншагайн нэр яригдаж байна. АН-аас чухам хэн нэр дэвшихээс шалтгаалж өрсөлдөгчөө тавих үндсэн тактиктайгаар анирдан хүлээж байгаа юм. Намын тамгаа атгах нүүдэлтэйгээр Х.Баттулга эл нөхөн сонгуульд орж ирнэ гэгдэж буй. Мөн Асашёрюү Д.Дагвадорж ч нэр дэвших амбицтай. Тэд нэр дэвшчихвэл МАН Н.Алтаншагайг тэдний өөдөөс тавиад барах уу гэдгээ дахиад бодно гэсэн үг.

Н.АЛТАНШАГАЙ: Түүнийг нөхөн сонгуульд сойж, цаашлаад нэр дэвшигчээр зүтгүүлж буй хүн бол Хотын мээр Д.Сумъяабазар. Н.Алтаншагайг дүүргийн Засаг дарга болгосон хүн ч тэр. 2020 онд дүүргийн иргэдийн төлөөлөгч болоод ирэхэд нь аравдугаар сард Засаг даргаар томилсон байдаг. Нийслэлийн МАН-ын улс төрийн ажилтнаас ажлын гараагаа эхэлж, хотын намын хорооны дэд дарга хүртэл ажилласан. Ерөнхийдөө намд зүтгэдэг хурган дарга нарын нэг юм.

Түүнчлэн Сонгинохайрханд Д.Сумъяабазарын хүн гэгддэг хотын орлогч Ж.Сандагсүрэн, Н.Энхбаярын хүү Э.Батшугар, С.Мөнхчулуун нар өрсөлдөхөөр горилж суугаа юм.

-ХЭНТИЙ: Н.ГАНБЯМБА, Б.ЭНХБААТАР НАРЫГ ЭХНИЙ ЭЭЛЖИНД ТООЧИГЛОЖЭЭ-

Н.ГАНБЯМБА: Нөхөн сонгууль бүрээр Н.Ганбямбын нэр зоолттой яригддаг. Тэрбээр хүүгээ Монголбанкны арилжааны банк хариуцсан дэд захирлаар томилуулах тохироотойгоор Засаг даргын суудлаа өгч байсан гэгддэг. Одоогийн нөхөн сонгуульд ч өөрийгөө зүтгүүлэх амбицтай. Аймгаа хэдэн жил атгасан болохоор нам өөрийгөө боломжийн нэр дэвшигч гэж үнэлдэг. Гэхдээ намын томчуул түүнийг тоох эсэх нь эргэлзээтэй ч, хүчтэй өрсөлдөгч болж чадна гэдэгтэй нь маргаж чадахгүй байгаа.

Б.ЭНХБААТАР: У.Хүрэлсүхийн туслахаас МИАТ-ийн дэд даргаар томилогдож, улмаар Ц.Анандбазараас 500 сая төгрөгийн авилга авсан гэх хэрэгт шалгагдсан нэгэн. Сайн ахын нөлөөгөөр хэргийг нь АТГ замхруулсан ч, сонгогчид тийм амархан мартахгүй. Нэгэн үес МАН-ын Хүний нөөцийн асуудал эрхэлснээр Ерөнхийлөгчийн сонгуулийн цикл хугацаанд огцомхон өндрөө авч, эдүгээ намынхаа Нарийн бичиг болтлоо томорсон. Хэнтийд ахынхаа нөмөр нөөлөг дор зүтгэх магадлалтай хүний нэг болж байна.

-САНААРХАГЧДЫН БҮЛЭГ: Д.ГАНТУЛГА, Л.БАТЖАВ НАР “БИЕЭ ТООЖ” ЗҮТГЭНЭ-

Ц.ИДЭРБАТ: Хэнтий аймгийн засаг дарга. МАН-ын төв штаб дотроо ч тэр Хэнтийн нөхөн сонгуульд ялах магадлалаар Ц.Идэрбатыг нэрлэж байгаа аж. Гэвч яг тулахаар Л.Оюун-Эрдэнийн гэхээсээ илүү У.Хүрэлсүхийн нөлөө эл тойрог дээр хүчтэй ажиллахаар байгаа нь нууц биш. Тэр гол нь Ц.Идэрбатыг дэмжих үү гэдэг эргэлзээ байгаа юм.

Д.ГАНТУЛГА: Олон нийт ч, намынхандаа ч эс тоогдох тэрбээр өөрийгөө тоож нэр дэвших амбиц гаргаж яваа залуусын нэг. Д.Амарбаясгаланд ч, намынхаа томчуулд ч агсам тавьж буй гэх. Тэрбээр хэцүү нэртээс батлан даалтаар суллагдаж, намаас өгсөн байранд чимээгүйхэн хэдэн сар болоод эдүгээ ил гарч, Хэнтийн сонгуулиар амьсгалах болов. Гэвч эцсийн мөчид түүнийг МАН нэр дэвшүүлэхгүй гэдэг нь өнөөдрийн өдрүүдэд ил уншигдахаар логик юм.

Л.БАТЖАВ: Өөрийгөө голохгүй зүтгүүлж яваа хүмүүсийн нэг. Нөхөн сонгуульд зүтгэсэн нь анхных биш. 2020 оны УИХ-ын сонгуульд бие дааж нэр дэвшихээр зэхэж тойрогтоо маш их хөрөнгө мөнгө хаясан ч МАН-д элсэн, У.Хүрэлсүхэд дагаар орсон. Тухайн үедээ У.Хүрэлсүхийн тойргоос сайн дураараа зайлж, замыг нь засах замаар МАН-д худалдагдсан гэгдэж байв. Бүр ХЗДХ-ийн дэд сайдаар шагнуулна ч хэмээгдэж явлаа. Гэвч У.Хүрэлсүх МАН-ын үнэмлэх гардуулаад, хөшигний ард амласан томхон суудлаа мурьсан гэгддэг. Муриулсан Л.Батжав дахин гарч ирж, “Шавар” хаана.

Энэ мэдээнд өгөх таны үнэлгээ

Хуваалцаарай Жиргээрэй