Чуулган | Д.Занданбат, Г.Дөлгөөн нарыг үүрэгт ажлаас нь чөлөөллөө

УИХ-ын чуулганы өнөөдрийн /2023.12.28/ нэгдсэн хуралдааныг нэг дороос хүргэж байна.

НЭМЭЛТ: 11.45 цаг

Ерөнхий аудитор Д.Занданбат, Монголбанкны Тэргүүн дэд ерөнхийлөгч Г.Дөлгөөн нарыг чөлөөллөө. Тодруулбал,

УИХ-ын чуулганы нэгдсэн хуралдаанаар эхлээд Монголбанкны Тэргүүн дэд Ерөнхийлөгч Г.Дөлгөөний үүрэгт ажлаасаа чөлөөлөгдөх тухай хүсэлтийг хэлэлцлээ. Түүний хүсэлттэй холбогдуулан нууц санал хураалт явууллаа.Улмаар хуралдаанд оролцсон гишүүдийн олонх нь дэмжсэн тул Г.Дөлгөөнийг үүрэгт ажлаас нь чөлөөлөв.

Үргэлжлүүлэн Монгол Улсын Ерөнхий аудитор Д.Занданбат үүрэгт ажлаасаа чөлөөлөгдөх тухай хүсэлт гаргасныг хэлэлцсэн юм. Тэрбээр "Ирэх 2024 оны УИХ-ын сонгуульд нэр дэвшихээ илэрхийлсэн тул хуульд заасны дагуу ажлаас чөлөөлөгдөх хүсэлтээ гаргаж байна" гэжээ. Хуралдаанд оролцсон нийт гишүүдийн олонх нь түүнийг чөлөөлөхийг дэмжлээ.

НЭМЭЛТ: 10.30 цаг

-УИХ-ын сонгуулийн санал хураалтыг 2024.06.26-ны лхагва гарагт явуулна-

“Монгол Улсын Их Хурлын 2024 оны ээлжит сонгууль товлон зарлах, санал авах өдрийг тогтоох тухай” Улсын Их Хурлын тогтоолын төслийн өнөөдөр хэлэлцлээ. Өмнө нь уг төслөөр хоёр удаа завсарлага өгсөн. Тиймээс өнөөдөр санал хураалт явуулсан юм. Санал хураалт явуулахад УИХ-ын 46 гишүүнээс 26 нь дэмжсэн.

Ингэснээр УИХ-ын ээлжит сонгуулийн санал хураалтыг 2024 оны зургаадугаар сарын 26-ны Лхагва гарагт явуулах тогтоолын төсөл батлагдлаа.

Энэ өдөр бүх нийтээрээ амрах хуулийн заалттай. 

ЭХЛЭЛ: 09.30 цаг

-УИХ-ын чуулганы 2023 оны "отгон" хуралдаан өнөөдөр болно-

Хуваарь ёсоор долоо хоног бүрийн пүрэв, баасан гарагт УИХ-ын чуулганы нэгдсэн хуралдаан болдог. Тэгвэл өнөөдөр 2023 оны хамгийн "отгон" хуралдаан болно. Өнөөдрийн хуралдаанаар дараах асуудлуудыг хэлэлцэхээр төлөвлөжээ.

• Татварын мэргэшсэн зөвлөх үйлчилгээний тухай хуульд нэмэлт, өөрчлөлт оруулах тухай хуулийн төсөл /Улсын Их Хурлын гишүүн Д.Цогтбаатар 2022.10.05-ны өдөр өргөн мэдүүлсэн, эцсийн хэлэлцүүлэг/
• Хүүхэд хамгааллын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд /Засгийн газар 2023.10.13-ны өдөр өргөн мэдүүлсэн, анхны хэлэлцүүлэг, үргэлжилнэ
• Ургамлын эрүүл мэнд, ургамал хамгааллын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд /Засгийн газар 2023.11.29-ний өдөр өргөн мэдүүлсэн, хэлэлцэх эсэх,үргэлжилнэ/
• “Монгол Улсын Их Хурлын 2024 оны ээлжит сонгууль товлон зарлах, санал авах өдрийг тогтоох тухай” Улсын Их Хурлын тогтоолын төсөл /үргэлжилнэ/
• “Монгол Улсын шүүх эрх мэдлийн хөгжлийн бодлого батлах тухай” Улсын Их Хурлын тогтоолын төсөл
• “Монгол Улсын 2024 оны төсвийн тухай хууль батлагдсантай холбогдуулан зарим байгууллагын цалингийн хэмжээг шинэчлэн тогтоох тухай” Улсын Их Хурлын тогтоолын төсөл
• “Төсвийн тогтвортой байдлын зөвлөлийн гишүүний цалингийн хэмжээг тогтоох тухай” Улсын Их Хурлын тогтоолын төсөл

Маргааш Үндэсний эрх чөлөө, тусгаар тогтнолоо сэргээн мандуулсны 112 жилийн ойн баярын өдөр. Бүх нийтээр амрах юм.

У.УЯН

Энэ мэдээнд өгөх таны үнэлгээ

Хуваалцаарай Жиргээрэй