Сурвалжилга: Автобус ч суулгадаггүй, Яармаг, Толгойтоос алхаж ирдэг ядуу хүмүүсийг “Бодьзул” төв 21 жил хооллож байна

-30-40 хэм хүрч хүйтэрч, жавар тачигнасан хүндхэн өдрүүд үргэлжилж байна. Хөдөө малчид хүнд өвлийг туулж билгийн тооллоор хаврын эхэн сартай золгосон ч цас ханзарч нүд гарах яагаачгүй байна. Харин нийслэлд өглөө, оройдоо жавар тачигнаж, хүүхэд хөгшидгүй зутруухан. Гэлээ ч орон гэртэй хүмүүст эд хүйтэрч буй энэ өдрүүд тийм ч хүнд ачаа, зовлон биш.

Ингэж хэлж байгаагийн учир нь орон гэргүй хүмүүсийн тухай бодол юм. Ядаж л өвлийн гурван сар хаана толгой хорогдож, хоноглож, яасхийж хоол ундаа болгоцгоодог бол гэх бодол. Бидний зарим хэсэг нийтийн унаа, орц хонгил, булан тохойгоо хүртэл тэднээсээ харамлана. Гэхдээ энэ хэний ч буруу биш. Тэд л буруу амьдарсан гэх нийтлэг дүрээрээ бид урагшилж яваа.

Тэгвэл сайн нь олон гэх амны билиг ч тэдэн рүү бас чиглэдэг аж. Өөрөөр хэлбэл, орон гэргүй гэх тодотголтой хүмүүст сэтгэл дэвсэж, орон зайдаа оруулж, тэднээс юу ч хүсэлгүйгээр халуун хоол цай өгч, хувцсыг нь сольж, эмнэлэгт хэвтүүлж, эм тан өгч 21 жилийн турш буян үйлдэж буй "Бодь Зул" төрийн бус байгууллагын халамжийн төвийг бид сурвалжиллаа.

-2003 оноос хойш зорилтот бүлгийн хүмүүст халуун цай, хоол үнэгүй өгч байна-

Энэ халамжийн төв "Дулма Лин" хийдийн хашаанд буюу хотын хамгийн их хүн амтай Баянзүрх дүүрэгт байрладаг. 2003 оноос хойш Монгол дахь Их Хөлгөний уламжлалыг хадгалах төвийн тэргүүн Зопа Ринбүчигийн санаачилгаар орон гэргүй, нэн ядуу, орон нутгийн харьяалалгүй хүмүүст ажлын таван өдөр халуун хоол, цай өгч эхэлжээ.

Үүнээс хойш өдгөө 21 жилийг үдэж байна гэв. Тус халуун шөлний газарт өдөрт дунджаар 40-50 орон гэргүй хүн ирж халуун хоол үнэгүй идээд явдаг. Эдгээр орон гэргүй хүмүүс ажлын таван өдөр ирэх бөгөөд зарим тохиолдолд бямба гарагт ирүүлдэг байна. Ингэхдээ өгөх хоолны хэмжээнд хязгаар тогтоодоггүй, болж өгвөл цадах хүртэл хэмжээнд нэмж өгдөг гэдгийг тус төвийнхөн хэллээ.

Мөн орон гэргүй иргэд ихэвчлэн харьяалалгүй байдаг тул эмнэлэгт хэвтүүлэх боломжгүй. Тиймээс харьяалалтай болгох, эмнэлэгт хэвтүүлэх, эм тариа авч өгөх, эмчийн үзлэгт хамруулах зэргээр туслаж байна.

-Нэн ядуу гэх тодотголтой айлуудад өдөр бүр үнэгүй хоол хүргэж, ахуйн амьдралд нь тусладаг-

Бодьзул ТББ "Халуун шөл" төслөөс гадна "Идээн өглөг" нэртэй хүмүүнлэгийн төслийг давхар хэрэгжүүлдэг. Энэ төсөл тухайн дүүрэг болон хорооны нэн ядуу гэх тодотголтой айл өрхүүд рүү чиглэдэг. Тодруулбал, хүнд өвчтэй, хэвтрийн, өндөр настай, өрх толгойлсон, ажил эрхэлдэггүй 35 айлд халуун хоол, цай, аарцыг хүргэж өгдөг юм байна.

Ингэхдээ тав хоногийн гурван өдөрт нь нэгдүгээр хоол буюу шөл, талх, мантуу, үлдсэн хоёр өдөр нь бууз, хуушуур зэрэг хоёрдугаар хоол хүргэдэг. Мөн ахуйн хэрэглээний зүйлс болоод өмсөх хувцас зэргээр хангадаг гэсэн юм. Онцолбол, энэ төв тэднээс юу ч авдаггүй бөгөөд хүсдэггүй. Бүх зүйлийг өрөөлийн сайн сайхны төлөө гэдэг хэдхэн үгэнд багтааж, өдийг хүртэл болгосоор иржээ. Тэд менежер, нийгмийн ажилтан, гурван харуул, ахлах болон туслах тогооч, үйлчлэгч гэсэн бүтцээр төвөө бүрдүүлдэг. Харуулууд ээлжээр ажилладаг учир өдөрт таван хүн л өдрийн бүх ажлаа амжуулдаг.

-70 настай ч өглөөнөөс орой хүртэл өрөөлийн төлөө зүтгэх С.Дуламсүрэн-

Бид тус төвийн тогооч С.Дуламсүрэнтэй ярилцсан юм. Түүний хувьд тэтгэвэрт гарснаасаа хойш энэ төвд тогоочоор ажиллажээ. Одоо 70 нас хүрч буй.

Тэрбээр, "Зорилтот бүлгийн гэгддэг энэ хүмүүс маань их өрөвдөлтэй. Энэ дунд эмэгтэй хүн, хүүхэд ирэх ч тохиолдол байсан. Ихэнх нь өвчтэй, зовлонтой. Бид ямар ч хүнтэй хүн ёсоор харилцах үүрэгтэй. Хийж байгаа ажлаараа дамжуулж сэтгэлийн дэм өгөхийг хичээдэг. Учир нь ихэнх нь хотод сайхан амьдрал байгаа гэж наашаа ирээд хазгай гишгэсэн, буруу явсан, амьдрал нь болж бүтэхгүйгээс болоод бууж өгсөн, архитай нөхөрлөсөн байдаг. Бид гэхдээ архи уусан хүнийг бол оруулдаггүй. Үүн дээрээ ч шаардлага тавьдаг.

Миний хувьд өдөр бүр олон хүний, их хоол хийдэг ч энэ ажлаасаа халширдаггүй. Ийм насны хүн гэртээ биеийнхээ амрыг хараад гэртээ сууж болно л доо. Гэхдээ надад эд нартайгаа бужигнаад байж байх нь гоё, таатай байдаг. Энэ хүмүүсийг автобус унаа суулгахгүй. Ихэнх нь хоолоо идэх гээд алхаж ирдэг, ялангуяа зун. Толгойт, Яармаг, Налайх, Дэнжийн мянга гээд хол хол газруудаас ирцгээдэг. Унаа тэрэг суулгадаггүй, авч явдаггүй учраас хоолны цагаасаа хоцрох тохиолдол их. Гэсэн ч би хүлээгээд л байж байдаг. Надад буцаах эрх байхгүй, сайхан хооллоод л гаргана. Эхлээд энэ хүмүүс маань баярлалаа гэж хэлдэггүй байсан. Харин одоо бол өөр. Баярлалаа, талархлаа гэдгээ байнга хэлдэг.

Манайх хүнсний ногооны хэрэгцээгээ өөрсдөө болгох зорилгоор гаднаа хоёр хүлэмж байгуулсан. Хавар тарьж ургуулаад намар ургацаа аваад агуулахдаа хураадаг. Одоо ч бидний хураасан ногоо дуусаагүй байгаа. Бид нарийн ногооноос гадна төмс, лууван зэргээ гадаа талбайдаа тарьчихдаг. Энэ маань бидний ажилд их дэм болдог гэсэн" юм.

Энэ хүмүүнлэгийн төв зорилтот бүлгийн хүмүүст бараа материал, эд зүйл, хоол хүнсээр туслах сонирхолтой хувь хүн болоод албан байгууллагуудтай нээлттэй хамтарч ажилладагийг энэ хэсэгт уламжилъя. Тиймээс уншигч та бүхэн "Бодь зул" ТББ-тай холбогдож, эдгээр хүмүүст туслах бүрэн боломжтой гэсэн үг юм.

Холбогдох утасны дугаар: 88002425

Видео:

Энэ мэдээнд өгөх таны үнэлгээ

Хуваалцаарай Жиргээрэй