Монголын волейболын холбооноос жил бур уламжлал болгон зохион байгуулдаг хамгийн том, чансаа өндөр тэмцээн бол үндэсний дээд лиг билээ. Өнгөрсөн жилийн лигийн тэмцээнд эдгээр шилдэг, залуу тамирчид дөрвүүл медалийн тавцанд зогссон юм.
Мөн Т.Хангал Тайландын дээд лигт урилгаар тоглосон бөгөөд тус тэмцээнээс алтан медаль хүртэж, үнэ цэнтэй тоглогчоор шалгарч ирээд буй. Харин Б.Батсуурийн хувьд дөрвөн сар үргэлжилсэн Азербайжаны дээд лигт мөн л урилгааар тоглож, мөнгөн медаль хүртээд байна. Харин Б.Баярсайхан, Э.Энх-Эрдэнэ нарын хувьд БНСУ-д суралцдаг бөгөөд тус улсын оюутны лигт тоглодог чадварлаг волейболчид.
Тэгвэл энэ дөрвөн шилдэг тамирчин 2023 оны KOVO Asia Quarter буюу гадаад тоглогчдын сорилтод оролцохоор очоод байна. Энэхүү сорил нь БНСУ-ын волейболын дээд лигийн гадаад тамирчдын сонгон шалгаруулалт юм.
Тус сорилд нийт найман улсын 32 тамирчин өрсөлдөх юм байна. Тодруулбал, Тайван 9, Индонез 7, Монгол 4, Филиппин 4, Япон 3, Малайз 3, Хонконг 1, Тайланд 1. Эдгээр тамирчдаас шилдэг долоон тамирчныг тус улсын лигт шалгаруулж авах бөгөөд шалгарсан тамирчдыг Солонгосын лигийн долоон баг сугалаагаар багтаа элсүүлэх аж. Сонгон шалгаруулалт өнөөдөр эхэлж хоёр хоногийн турш үргэлжилнэ. Хэрэв тэд тэнцвэл монгол тамирчин БНСУ-ын лигт тоглох түүхэн гэж хэлж болох эхлэлийг тавих юм.
Харин эмэгтэй төрөлд зургаан улсын 24 тамирчин сорилтод орно. Тодруулбал, Тайланд 8, Филиппин 6, Япон 3, Индонез 3, Тайван 2, Хонг Конг 2 тамирчин тус тус өрсөлдөх юм.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.