"Сэтгэл санаа таагүй, цаашид амьдрахгүй" хэмээн унтаж буй ээжийгээ хөнөөжээ

27 настай эрэгтэй "Сэтгэл санаа таагүй, цаашид амьдрах хүсэлгүй болсон" гэх шалтгааны улмаас өөрийн төрсөн ээжийг онц хэрцгийгээр хөнөөсөн хэрэг гарсан байна.

Эл төрлийн гэмт хэргээс урьдчилан сэргийлэх үүднээс хэргийн процесс, шүүхээр хэрхэн шийдвэрлэсэн болохыг тоймлон хүргэж байна.

Энэ хэрэг /2024-11-07/-ноос /2024-11-08/-ныг шилжих шөнийн 04 цагийн орчимд гарчээ. Амь хохирогчийн хувьд 50 настай, 10 гаруй жил БНСУ-д ажилласан нэг хүүтэй эмэгтэй байжээ. Улмаар түүнийг унтаж байхад нь хүү нь "Сэтгэл санаа таагүй, цаашид амьдрах хүсэлгүй болсон" гэх шалтгаанаар 12 удаа хутгалж хөнөөжээ.

Мэс цээжний хөндий рүү нэвтэрч зүүн уушги, зүрхний баруун тосгуур, зүүн ховдлыг гэмтээсэн хатгагдаж зүсэгдсэн шарх, цээжний зүүн хөндий, үнхэлцгийн хөндий дэх цус хуралт бүхий гэмтэл учруулж амь хохирох шалтгаан болсон байна.

27 настай хүүгийнх нь хувьд их сургуулийн оюутан бөгөөд өвөө эмээгийнхээ гэрт бага насаа өнгөрүүлжээ. Гэрчүүдийн шүүхэд мэдүүлснээр "Ээж хүү хоёр хоорондоо маргалддаггүй, тун таарамжтай харилцаатай байсан. Яагаад ийм зүйл болсныг ойлгохгүй байна" хэмээжээ.

Харин Шүүгдэгч /хүү/-ийн найз охин " Тэр хувийн мэдээллээ бусдад алдаж 10 орчим сая төгрөгөө залилуулсан байсан. “Эгчтэйгээ, эмээтэйгээ муудалцчихлаа, намайг хүн биш юм шиг үзэх юм, миний саналыг тоохгүй юм” гэж хэд хэдэн удаа ярьдаг байсан. Энэ байдал нь сэтгэлээр унагаадаг байсан санагддаг. Ээжтэйгээ сайн харилцаатай байдаг юм шиг санагдсан. Хэрэг гарсан өдөр над руу "Ээжийгээ хөнөөчихлөө, би одоо амиа хорлолоо" хэмээн ярьсан. Сонсон даруй гэрийнх нь гадна ирээд цагдаа нарт дуудлага өгсөн” гэж мэдүүлжээ.

Цагдаагийн мөрдлөг, цогцост хийсэн шинжилгээ, шүүгдэгч болон гэрч нарын мэдүүлгээр онц хэрцгийгээр хүний амь насыг хөнөөсөн болохыг нь тогтоосон байна. Иймд шүүхээс Эрүүгийн хуулийн 10.1 дүгээр заалт буюу Хүнийг алах гэмт хэрэг үйлдсэн хэмээн үзэж 14 жилийн хорих ял оноосон байна.

Холбогдсон хэргийн хуулийн заалт: Эрүүгийн хуулийн 10.1. Хүнийг алах

1.Хүнийг алсан бол найман жилээс арван таван жил хүртэл хугацаагаар хорих ял шийтгэнэ.

2.Хүнийг:

• 2.1.онц харгис хэрцгийгээр;
• 2.2.олон хүний амь бие, эрүүл мэнд, эд хөрөнгөд хохирол учруулж болох аргаар;
• 2.3.захиалгаар;
• 2.4.өөр гэмт хэргийг нуун далдлах, хялбарчлах зорилгоор;
• 2.5.өөртөө, бусдад эдийн, эдийн бус ашигтай байдал бий болгох зорилгоор;
• 2.6.хоёр, түүнээс олон хүнийг;
• 2.7.хохирогчийн биеэ хамгаалж чадахгүй, жирэмсэн болохыг мэдсээр байж;
• 2.8.гэр бүлийн хүчирхийлэл үйлдэж;
• 2.9.эрхэлж байгаа ажил, албан үүрэгтэй нь холбогдуулж өөрийг нь, түүний ойр дотны хүнийг;
• 2.10.зохион байгуулалттай гэмт бүлгийн гишүүн зохион байгуулалттай гэмт үйл ажиллагааныхаа явцад;
• 2.11.бүлэглэж;
• 2.12.эрүүдэн шүүж;
• 2.13.цус, эд, эрхтнийг авах зорилгоор;
• 2.14.үзэл бодол, арьсны өнгө, үндэс, угсаа, шашин шүтлэг, бэлгийн, хүйсийн чиг баримжаагаар нь үзэн ядаж алсан бол арван хоёр жилээс хорин жил хүртэл хугацаагаар, эсхүл бүх насаар нь хорих ял шийтгэнэ.

3.Бага насны хүүхдийг алсан бол арван хоёр жилээс хорин таван жил хүртэл хугацаагаар, эсхүл бүх насаар нь хорих ял шийтгэнэ.

О.УНДРАЛ

Энэ мэдээнд өгөх таны үнэлгээ

Хуваалцаарай Жиргээрэй