Д.Сумъяабазар дарга аа, 10-р хорооллын 7000 гаруй өрх ГУРВАН ӨДӨР халаалт, халуун усгүй өнжлөө

Улаанбаатар хотын баруун бүсийг дулаанаар хангах үүрэгтэй 8А магистраль шугамд арваннэгдүгээр сарын 26-наас хойш нийт дөрвөн удаагийн гэмтэл гараад байна.

Өчигдөр гарсан гэмтлийг албаны хүмүүс зассаар өнөөдрийн үүрээр, оршин суугчдын халаалт сая нэг 04.00 цагийн үед иржээ. Гэвч дахин гэмтэл гарсан тул 12.00 цагийн үеэс эхлэн эргээд түгээлтийг зогсоосон байна.

Ингээд аванхоёрдугаар сарын 10-нд гарсан гэмтлийг засах гэж ажилласан цагаас хойш өнөөдрийг хүртэл нийт 65 байрны айл 50 гаруй цагийг халаалтгүй, халуун усгүй өнгөрүүлжээ.

Урд шөнийн байдлаар Улаанбаатар хотын менежер Т.Гантөмөр “Сүүлийн гэмтлийг засаж дууссан, дүүргэлт хийх явцад одоогоор гэмтэл ажиглагдаагүй байна. Дахин гэнэтийн аваар гарахгүй бол өнөө шөнөдөө УГТЭ-ээс Улаанбаатар палас хүртэлх 61 байр, 7000 айл өрхийг дулаанаар хангана” гэж мэдээлээд байв. Гэсэн ч ийн дахин гэмтэл гарчээ.

Тус 8А магистралийг 1997 оноос хойш нэг ч удаа солиогүй гэдэг мэдээлэл байна. Харин оршин суугчид холбогдох албаны хүмүүсээс тодруулахад энэ жил хөл хориотой байсан учраас засварыг эрт хийж чадаагүй гэдэг тайлбар өгчээ.

Дахин дахин ирж засах ч эргээд л эвдэрч хагарах нь тус магистраль бүрэн солих шаардлагатай болтлоо элэгдсэнийг илтгэж байна. Жил бүр шугам сүлжээний засвар нэрээр төлөвлөгөөт хугацааг хэтрүүлж засвар хийдэг ч олон мянган айл өрх хөхөө өвлийн хүйтэнд, ийм эрсдэлтэй нөхцөлд оржээ.

-30 хэмийн хүйтэнд гурван өдөр халаалтгүй, халуун усгүй байна гэдэг цар тахлын үед оршин суугчдын эрүүл мэндэд хэр халтай байх вэ. Нялх хүүхдүүд, өндөр настнууд, хүнд өвчтэй хүмүүс эдгээр айл өрхүүдэд цөөнгүй байгаа нь мэдээж.

Нэгэн оршин суугчаас нөхцөл байдлыг тодруулснаа нэрийг нь нууцлан сийрүүлэхэд:

“БГД-ийн 6-р хорооны 65 байр, 21 ААН-ийг хамарсан өргөн талбайд дулааны шугам сүлжээний гэмтэл гарснаас үүдэн гурав дахь хоног дээрээ ямар ч халуун ус, дулаангүй хүнд нөхцөл байдалд байна.

Нийслэлийн захирагчийн ажлын алба тэргүүтэй холбогдох байгууллага руу удаа дараа хандаж байгаа боловч тодорхой үр дүнд хүрсэнгүй. Шугам сүлжээг засварлах ажил жил бүр хийгддэг. Ялангуяа “Efes” дэлгүүрийн урд талын шугамыг байнга л сольж байдаг. Төлөвлөгөөний дагуу биш хоног сунгаж л засвар үйлчилгээгээ хийдэг. Гэтэл хоолойнууд зэвэрч, хагарч, бүтнээр нь солихоос өөр аргагүй нөхцөл байдалд хүрсэн нь илэрхий байна.

Бидний ойлгож буйгаар нэгт, төсөв мөнгөгүй учраас 1 км хүрэхгүй дулааны хоолойг солих боломжгүй байгаа бололтой. Хоёрт, шийдвэр гаргах түвшинд шуурхай, уялдаа холбоотой ажиллаж чаддаггүй юм байна. Бид дулааны хэрэглээний мөнгөө сар бүр төлж байна. Гэтэл эрүүл аюулгүй орчинд амьдрах эрхээ эдэлж чадахгүй байна.

Нөгөө талд эдгээр өдрүүдэд эрчим хүчний хэрэглээ эрс өсөж байна. Ингээд дээрээс нь эрчим хүчинд хэд дахин илүү мөнгө төлөх болчихлоо. Энэ хэдэн мянган хүн дунд маш олон нялх нойтон хүүхдүүд, архаг хууч өвчтэй, өндөр настангууд байгаа шүү дээ. Эрүүл хүмүүс хүртэл энэ хүнд нөхцөлд өвдөөд эхэлчихлээ”.

Д.Сумъяабазар даргыг зөвхөн коронавирус, хөл хорионд анхаарлаа хандуулж, твиттерт жиргэж суух хооронд 10-р хороололд жинхэнэ утгаараа онцгой нөхцөл үүсжээ. Тэр Нийслэлийн захирагчаас гадна Нийслэлийн Онцгой комиссын ч дарга. Ёроолдоо тултлаа элэгдсэн дулааны шугамыг засаж, сэлбэсэн болоод орхих нь үр дүнд хүрэхгүй нь харагдаж байна. Дахиад хэзээ хагарч, гэмтэхийг, энэ нөхцөл байдал эргэн давтагдахыг хэлж мэдэхгүй байдал бий болжээ.

Уг асуудалд анхаарлаа хандуулж, 7000 гаруй өрх, 21 ААН-ийн эрүүл, аюулгүй орчинд, Нийслэл хотдоо амьдрах эрхийг шуурхай хангаж хэрэгжүүлээч, хотын дарга аа.

Сэтгэгдлээ илэрхийл

Share Tweet