Агсал хүү арван ахтайгаа

Ерөнхий сайд Л.Оюун-Эрдэнийн Засгийн газрын тэргүүнүүдтэй уулзаж суугаа бичлэгийг хараад, ийм үг санаанд буув. “Агсал хүү”. Толь бичигт Торгууд ардын дуут биелгээг “Агсал” хэмээн нэрийдэн бичдэг. Нэг ёсондоо дуун авиа бүхий биет хөдөлгөөнийг “Агсалзах, сагсалзах” гэж утгачлан тайлбарласан нь энэ. Өчигдрийн тухайд тэрхүү агсалзан, сагсалзах дуут биелгээний гол дүрд Л.Оюун-Эрдэнэ тоглов.

Оролцон биелээчдэд цагтаа Л.Оюун-Эрдэнэд хөөгдөж спикерийн суудлаа өгсөн түүхтэй М.Энхболд, шударга ёс тогтоох тэмцлийнх нь хиншүү хярваст өртөн, шоронд суугаад гарч ирсэн С.Баяр, М.Энхсайхан, Засгийн газраа хийсэн тэмцлийнх нь үр шимээр орхин гарч байсан Ж.Эрдэнэбат. Одоо засах гэж үйл лайгаа үзэж буй гэх Оюутолгойн гэрээг нь үзэглэгчдийн нэг С.Батболд, түүний их дээрмийн схем хэмээн нэрийддэг “Эрдэнэт”-ийн 49 хувийг оруулж ирэхэд улс төрийн гол нөлөөллийг үзүүлсэн Ц.Элбэгдорж. Хүүд нь УИХ-д өрсөлдөх мандат өгч байж, Засгийн танхимаа хамгаалахад хүргэсэн Н.Энхбаяр, Л.Оюун-Эрдэнийг үг, үйлдлээрээ “Эвий, хүүхэд минь” гэж байнга шоолдог Н.Алтанхуяг нар оролцон тоглоцгоолоо. Амьдрал олон өнгөтэй гэж энэ л юм.

Сошиал дээрх тэдний уулзалтын сэтгэгдлүүдийг харахад “Бүгд хулгайч нар. Шорондоо хатаач ээ” гэхчлэн үгийн муухайгаар хөвөрчээ. Гэвч нэг агсал хүүгийн дэглэсэн гэлтэй эл биелгээнд оролцогчид өчигдөр зүрхэндээ эх орноо хайрлацгаасан гэдэгт туйлын итгэлтэй байна. Эрх биш тэд Монгол Улсын Ерөнхий сайдаар ажиллаж байсан улс. Тэд нэгэн үеийнхээ бүх эрчмийг тэр чигт нь асгаж, Ерөнхий сайдаар ажиллацгаасан. Жижиг орныхоо төвөгтэй ахуйн зовлонг хамгийн сайн мэднэ.  Улс орон нь тэрхүү үедээ яаж ганцаардаж, бусадтай хэрхэн нөхөрлөж, юун дээр алдаж оносноо, эдүгээ яагаад ийм зам туулж буйг ч тэд хөшигний ард хэлбэрдчихгүй л бол хамгийн зөвөөр тайлбарлаж чадах улс.

БНХАУ-ын талтай нэлээд сайн ажилласан уулзалтыг Ерөнхий сайд нь хийлээ. Маргааш нь харин эл уулзалтын амлалтаа эс тоож, Хятад хилээ хаав. Шатахуунаа хэвийн татахын тулд Оросын нэг ТӨХК-ийн захирлыг энд Ерөнхий сайд нь урьж залан уулзалт хийж байна. Элчингүүдийг нь мөнхийн тойглоостой. Харахад ажил хийх гээд л зүтгээд байх ч эвээ олохгүй агсалзаж яваа хүүд АСЕМ-ийг эх орондоо зохион байгуулж, “Дэлхийн удирдагчид хоолны цагаар ихэвчлэн онигоо ярьдаг даа” гэж өгүүлдэг Ц.Элбэгдорж, супер гарц гаргагч С.Баяр, М.Энхсайхан, Н.Алтанхуяг тэргүүтнүүд уужим зам, алсуур ухаан тэлэх үгсийг хэлэх учиртай.

Нөгөө талаар яг МАН-ын Их хурлын өмнөхөн, Оюутолгойн их хэлэлцээний цагаар агсалзсан залуу Ерөнхий сайд ахмадуудаас үг сонссон дүрсээ ил шидсэн нь улс төрийн тоглолт гэлтэй. Чимээгүй суугч М.Энхболд, МАН-ын хамаг л дотоод сүлжээнд хүчтэй оршсоор буй С.Батболд нар энэ уулзалтад оролцсон нь залуусаасаа бүр нэг цэрвээд буй дотоод уур амьсгалд нь эерэг нөлөө үлэмж их үзүүлэхээр. Уулзалтын  дүрсэд С.Батболд өнөөх л тогтож ядсан хайнга харцаараа, М.Энхболд дуугүй чигээрээ бичигджээ.

Түүнчлэн уулзалтын талаарх албан мэдээндээ “Оюутолгойн асуудлаар санал солилцлоо” гэж дурдсан нь зөв так тик гэж уншигдахаар. Баахан хэлбэр хийц, зургийн өнцөгтөө анхаарсан болчихгүй л бол энэ уулзалтыг яг сошиал сэтгэгдэл шиг буруутгах нь илүүц юм. Бас тэдний ихэнхтэй улс төрийн хоролмаа аргаар тоглож ирсэн Ц.Нямдорж сайд буландасхийгээд суучихсан зэрэг нь хачин донжтой харагдаж, ихийг өгүүлэв.

Уулзалтын талаар Ерөнхий сайд асан С.Баяр “Хувийн гоморхлоо төрийн өсөрхөл мэт ярих хүн гарсангүй. Монголчууд бид цөөхөн учраас мөр мөрөө түшихээс өөр аргагүй” гэж товч дүгнэж бичжээ. Үнэхээр ч залуу Ерөнхий сайдад уригдсан ахмадууд уулзалтын дараа хоол идээд салахдаа гоморхлын үг унагаагүй гэх яриа дуулдав. Уулзалтад оролцсон бүх хүн санал бодлоо ярьцгаасан бол Ц.Нямдорж сайд дуугаралгүй суусаар гарсан агаад хоолны үеэр нь ч ирээгүй гэх. Ингэж агсал хүү арван ахтайгаа уулзалт хийж, дурсгалын сайхан зураг татууллаа. Яаж ийгээд Засгаа авч үлдэхээр дотооддоо ажиллаж буй Л.Оюун-Эрдэнийн багийнхны бас нэг хачин стандарт бусдуу уулзалт нь энэ байв.

Алдаж бас онож байж болох ч Ерөнхий сайд нарын зөвлөл байгуулаад, үе үе тэдний үгийг сонсоно гэсэн нь МАН-ын ахмадуудаа гудманд гаргасан агуулгаас арай эерүү уншигдав. Мэдээж пи-артаа анхаарч, баахан патиар татуулсан нь ихэд тамтай. Гэхдээ л үе үеийн Ерөнхий сайд нар уулзсан нь ихэд эерүү үйлдэл болов. Бусад дүгнэлтийг танд үлдээе.

Энэ мэдээнд өгөх таны үнэлгээ

Хуваалцаарай Жиргээрэй