Л.Оюун-Эрдэнийн тархинд гүйсэн "чөтгөрийн бодол"

"НАМ ДОТРОО ХУВЬ ХҮМҮҮСИЙН ХҮСЭЛ БИЕЛҮҮЛЭХ ҮҮ, ӨӨРИЙН САНАСНААР ХИЙГЭЭД ҮЗЭХ ҮҮ"

МАН-ын удирдлагуудын тархи Үндсэн хуулийн 39.1 дэх заалтаас нэг өгүүлбэр хасах, эргээд түүнийгээ ёсчлох долоо хоногийн хугацаанд хэдэнтээ эргэж, манарч, өөр сувгууд дээр жирэлзэж, тогтож байсан цэгээсээ ч холдов.

Даваа гаригт шинэ Засгийн газрын бүтцээ зарлаж, сайд нарынхаа нэрсийг оруулж ирэх учиртай. Тэр хүртэл хоёр амралтын өдрөөр сувгаа яг тогтсон цэгт тааруулах шардлага үүсчээ. МАН дангаараа засгаа бүрдүүлэхээр сайд нарын тойм зургаа гаргачхаад байсан.

Гэтэл өчигдөр үдээс хойш Л.Оюун-Эрдэнэ У.Хүрэлсүх, Г.Занданшатар нартай уулзаж, дараа нь МАН-ын генсек тэргүүтэй хүмүүстэй зөвлөлдөх маягаар "Ер нь намуудтай хамтарцгаая" гэдэг иш үндсээ тулгажээ.

Ерөнхийлөгч нь таван сайдын суудал нэхэж, спикер нь өөрийн зассан заалтаа унагаж буйдаа баахан уньж туньсан байдалтай. Баахан бизнес гишүүд сайдад дугаарлачихсан.

Ийм нөхцөлд намаасаа засгаа бүрдүүлэхээр хэт хувь хүмүүсийн хуслийг биелүүлчих юм шиг бодол Л.Оюун-Эрдэнэд санагдаад, зөрчилдөөд яваад байсан бодлоо албажуулсан дүр зураг харагдав.

Намуудын парламент дахь гишүүдийн тооны харьцаа 62:3:1 байгааг давхар сануулъя.

-ГЭВЧ АН, ХҮН-ААС САЙД ОРЖ ИРВЭЛ МАН-ЫН БИЙЛЭГЧҮҮДЭЭС ЯМАР АШИГТАЙ ВЭ -

Ц.Туваан, С.Одонтуяа, Н.Ганибал, Ш.Адьшаа нар АН-аас сайд болох талаар яригдаж эхлэв. ХҮН-аас Т.Доржханд ихэд дургүйцсэн гэх ч өнгө мөнгө, захиалгаас буцдаггүй тэр эрхмээс ихэнхдээ "муухай үнэр" л ханхалдаг. Иймэрхүү бүтэц орж ирвэл Цэцэд гомдол өгсөн хүмүүс шагналаа авлаа л гэж харагдана.

Л.Оюун-Эрдэнэд эдгээр хүмүүс намынх нь сайдад яригдагсдаас юугаараа илүү ашиг тустай байх вэ. Түүний яриад буй,

• Үндсэн хуулийн бусад нэмэлт өөрчлөлт оруулах агуулгууд,
• "Шинэ сэргэлтийн бодлого"-ыг урт хугацаанд хэрэгжүүлэх,
• Дэлхийн шинэ геополитик орчинд шинээр тоглож эхлэх,

Эдгээртээ улс төрийн бусад намуудын хүчийг давхар хадгалж, ялангуяа АН-ын барууны үзлийг хүчтэй баримтлагчдаас төлөөлөл оруулж ирэхийг чухалчилсан дүр зураг харагдана. Барууныхан манайхыг анхаарч буй цикл үе таарч байна. Нөгөө талд ОХУ-тай хамтарч Эгийн голын УЦС-аа ярих агуулга эхлэлээ дөнгөж тавьсан. Урагшлуулах ёстой.

Одоо хамтарсан Засгийн газруудын үед л "Оюутолгой" төсөл хөдөлж, хотын томоохон бүтээн байгуулалтууд өрнөсөн зэрэг үүнийг ойлгуулах мессeжүүдээ өгч эхэлнэ. Ерөөсөө 2024 оны сонгуулийн үр дүн ямар байлаа ч өөрийнх нь автороор нэрлэгдэх "Шинэ сэргэлтийн бодлого"-ын нурууг хугалчихгүй явуулах амбиц түүнд бий.

Тэр ч учраас 2024 оны сонгуулийн өмнө ч "Бид хамтарч зүтгээд энэ хүрлээ" гэх хэлэх үгтэйгээ сууж байхыг давхар тооцсон гэх логик харагдана. Гэхдээ их хамтралын дараа манай томчууд газарт наалдатлаа унасан түүх бэлэн бий.

"Ийм зорилгод хүрэх гэж байна" гэж хэлээд замаараа таарсан бүхэнтэй хуулиас давж тоглодог. Ардчилсан нийгмийн чөлөөт эдийн засгийн хэлбэршлээ ч дагахгүй. Айлын хоттой хонийг шуудхан төр нь хураагаад давхичихдаг. Ийм төр ба засагтай байж болохгүй. Үүнийг олон нийтээрээ сануулж байх учиртай юм.

СЭТГҮҮЛЧИЙН ТЭМДЭГЛЭЛ: "МАН бусад намуудтай хамтрах гэж байна. АН-аас ийм дорой, үлгэн салган сайд нар томилогдоно гэж олон нийт жаал шуугих. Гэвч үнэндээ 18 сайд дээрээ 2-3 сайдын бүтэц нэмээд, үүнээсээ 2-4 ширхгийг МАН-аас гадуурх намуудад өгөхөд нэг их хотойгоод явчхаар асуудал биш юм. Үүний ард Л.Оюун-Эрдэнэ нарынхны илүү том амбиц л нуугдаж байгаа.

Аа, бас Үндсэн хуулийн давхар дээлтэй холбогдох 39.1-ийг өөрчлөөд л цаашаа явахгүй зогсвол МАН засаглалын төлөө улайрсан л болж харагдана. Тэдэнд үүнд бас хань хэрэгтэй байгаа. Цаашид ҮХНӨ үргэлжлэхгүй бол нам дотроос Ж.Сүхбаатараас өгсүүлээд эрх биш зарчмаа ярина. Өөрчлөх үед тэд бас ямар ханьтай байхаа өнөөдөр бодсон мэт.

Ер нь АН, ХҮН-ынхан хөөрөх хэрэггүй дээ. Хэдхэн сайдын суудлаар нь тэдний ирээдүйд явах замын үзэл бодлыг МАН халаасандаа авч хийж байгаа юм.

Сэтгэгдлээ илэрхийл

Share Tweet