“Зайсан орчимд чоно орж ирсэн гэх бичлэг худал”

НЭМЭЛТ ЗАЛРУУЛГА:

Зайсангийн орчимд хоёр чоно орж ирсэн гэх мэдээлэлд Нийслэлийн Онцгой байдлын газар “Ийм дуудлага мэдээлэл ирээгүй” хэмээн тодруулга байр сууриа илэрхийлсэн. Иймд мэдээллийг үгүйсгээгүй гэж үзэн, тус мэдээг бэлтгэн хүргэсэн билээ.

Гэвч Зайсангийн орчимд чоно орж ирээгүй, тухайн бичлэг нь гадаадад болсон явдал гэдгийг Богдын захиргааны ан, амьтан хариуцсан мэргэжилтэн мэдээллээ. Иймд баримтыг нягтлан шалгах үйл явцад алдаа гарсныг хүлээн зөвшөөрч, энэхүү нэмэлт залруулгыг оруулж байна.

ӨМНӨХ МЭДЭЭ:

Өчигдөр /2022.10.23/ Богд уулын зам дээр хоёр чоно явж байгаа нь дүрс бичлэгт буусан байна.

Тус хоёр чоно суурьшлын бүсэд орж ирсэн тул иргэдэд аюул учруулсан эсэх талаар НОБГ-аас тодруулахад “Чонотой холбоотой дуудлага мэдээлэл ирээгүй” гэсэн хариултыг өглөө.

Тэгвэл чоно суурьшлын бүсэд нэвтэрсэн асуудал энэ  оны нэгдүгээр сарын 15-ны 05.00 цагт Сүхбаатар дүүргийн 20 дугаар хорооны нутаг дэвсгэрт буюу Бэлхийн төв замаар хоёр чоно явж байсан нь НБОГ-т бүртгэгдэж хоёр чоныг суурьшлын бүсээс гаргаж байсан.

Сүүлийн жилүүдэд Улаанбаатар хотод зэрлэг амьтан орж ирэх тохиолдол нэмэгдэж байгаа аж. Зэрлэг амьтан суурьшлын бүсэд орж ирсэн  дуудлага 2015 онд 30, 2019 онд 43, 2020 онд 116, 2021 89 удаагийн дуудлага бүртгэгджээ.

Харин зэрлэг амьтны тархац нутаг хумигдах, идэш тэжээлийн дутагдалд орсноор Улаанбаатарт зэрлэг амьтан орж ирэх тохиолдол нэмэгдсэн байна. Дэд бүтэц хөгжихийн хэрээр саарал чоно амьдрах орчны хуваагдалд ороод буй. Чөлөөтэй нүүдэллэх боломжгүй болж, идэш тэжээл хайж хотын суурьшлын бүсэд орж ирсэн гэж үзэж болохоор байна.

Энэ мэдээнд өгөх таны үнэлгээ

Хуваалцаарай Жиргээрэй