Холимог тулааны "One" холбооны аварга, МУГТ Б.Энх-Оргилийг "Ховд аймгийн хүндэт иргэн” болгож, 20 сая төгрөгөөр урамшуулсан байна. Тодруулбал өнөөдөр /2026.01.09/ аймгийн ИТХ-ын дарга З.Эрхбаяр, аймгийн Засаг даргын орлогч М.Баярт тэргүүтэй аймгийн удирдлагууд Холимог тулааны дэлхийн аварга, Монгол улсын гавьяат тамирчин Б.Энх-Оргил, Дасгалжуулагч Ж.Нарантунгалаг, чөлөөт бөхийн тамирчин, Дифлимпийн 25 дугаар олимпын мөнгөн медальт Д.Чинзориг, Дэлхийн шатрын холбооны дэд мастер, Азийн аваргын мөнгөн медалт С.Тэнүүнбуян, Шатрын спортын Азийн аваргын алт, мөнгөн медальт Г.Эрдэнэбат нарыг хүлээн авч уулзан, хүндэтгэл үзүүлжээ.
Аймгийн ИТХ-ын 2025 оны 4 дүгээр тогтоолоор тамирчин, дасгалжуулагчдад урамшуулал олгох “АВАРГУУД” хөтөлбөрийг баталсан аж. Тус хөтөлбөрийн хүрээнд дэлхий, тив, улсын аварга шалгаруулах тэмцээнүүдэд амжилт гаргасан дараах тамирчдыг шагнаж урамшуулжээ.
Улмаар дэлхийн аварга, Монгол Улсын гавьяат тамирчин Б.Энх-Оргилийг Ховд аймгийн Хүндэт иргэн шагналаар шагнаж, 20 сая төгрөгөөр, Б.Энх-Оргилийн дасгалжуулагч Ж.Нарантунгалагт 5 сая төгрөг, Чөлөөт бөхийн тамирчин, Дифлимпийн 25 дугаар олимпын мөнгөн медальт Д.Чинзоригт 15 сая төгрөг, Дэлхийн шатрын холбооны дэд мастер, Азийн аваргын мөнгөн медальт С.Тэнүүнбуянд 5 сая төгрөг, Шатрын спортын Азийн аваргын алт, мөнгөн медальт Г.Эрдэнэбатад 5 сая төгрөгийн батламжийг гардуулан өгчээ.
Б.АЗЖАРГАЛ
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.
Спортоор явж амжилт гаргаагүй бол магад хүчингийн хэрэгт гүтгэгдээд шоронд хийгдэж магадгүй нийгэм шүү