БНСУ ажлаа өгсөн 7 мянган резидентийн лицензийг түдгэлзүүлэх арга хэмжээ авч эхэллээ

Өмнөд Солонгост резидент эмч нар болон засгийн газрын хооронд зөрчилдөөн үүсээд буй. Тодруулбал БНСУ-ын засгийн газар хоёрдугаар сарын эхээр жилд авах анагаахын оюутны тоог 3058 байсныг 2 мянгаар нэмэх шийдвэр гаргасан юм.

Үүнийг эсэргүүцэж эмч нар ажил хаяхаа мэдэгдсэн. Мөн 9 мянга гаруй резидент эмч нар ажлаас чөлөөлөгдөх өргөдлөө өгч, ажлын байраа орхисон байна. Ийм учир эмнэлгүүдэд үйл ажиллагааны доголдол үүсээд буй.

Резидентүүд олноороо ажлаа өгөх болсны хариуд БНСУ-ын Эрүүл мэндийн сай Чо Кёо өнгөрсөн долоо хоногийн мягмар гарагт /2024.02.27/ мэдэгдэл хийхдээ дадлагажигч эмч нар гуравдугаар сарын нэгнээс өмнө эргэж ажилдаа орохгүй бол хуулийн хариуцлага тооцно гэж мэдэгдсэн юм.

Хугацаа дуусахаас өмнө 565 резидент эмч ажилдаа эргэж очсон бол 8,945 дадлагажигч эмч нар ажлаа өгөх шийдвэрээ өөрчлөөгүй байна

Тэгвэл Өмнөд Солонгосын Эрүүл мэндийн яам тушаалыг нь биелүүлээгүй 7 мянга гаруй резидентийн лицензийг цуцлах арга хэмжээ авч эхэлхээ мэдэгдэж, цуцалсан тохиолдолд буцаах боломжгүй гэдгийг анхааруулжээ.

Тус улсын Эрүүл мэндийн хоёрдугаар дэд сайд Пак Мин Сү “Энэ арга хэмжээг буцаах боломжгүй. Засгийн газар зөрчил илрүүлэхийн тулд газар дээр нь шалгалт явуулж хууль, зарчмын дагуу хариу арга хэмжээ авна. Эрүүл мэндийн салбарт эмч замбараагүй байдал үүсгэхэд хүргэсэн энэ ажиллагаатай холбоо бүхий албан тушаалтнуудад хариуцлага хатуу, шуурхай тооцно” хэмээсэн юм.

Ажлаа өгсөн эмч нарын лицензийг нэг жил хүртэлх хугацаагаар түдгэлзүүлэх, 30 сая вонн хүртэл торгууль оногдуулах эсвэл гурван жил хүртэлх хорих ял оноох боломжтой аж.

Эх сурвалж: Korea Times

Энэ мэдээнд өгөх таны үнэлгээ

Хуваалцаарай Жиргээрэй