Монголд, зөвхөн биеэ хамгаалах зорилгоор галт зэвсэг эзэмшихийг хуулиар зөвшөөрөхгүй

Хэсэг залуус автомашины жолоочийг замын голд бүлэглэн зодож, машиныг нь эвдлэн сүйтгэж буй бичлэг цахим орчинд цацагдаж олны анхааралд өртөөд буй.

Үүнийг тодруулбал, Гурав хоногийн өмнө буюу 2024 оны есдүгээр сарын 20-ны 03.00 цагийн орчимд нийслэлийн Баянзүрх дүүргийн тавдугаар хорооны нутаг дэвсгэр буюу 1000 оюутны байрны ойролцоо хэсэг залуус автомашины цонх хагалж, зодолдсон гэх дуудлага мэдээлэл ЦЕГ-т бүртгэгдсэн байна. Тухайн дуудлага мэдээллийн дагуу шалгахад зургаан хүн тус хэрэгт холбогдсон аж. Улмаар Нийслэлийн Баянзүрх дүүргийн цагдаагийн газраас холбогдох хүмүүсээс тайлбар мэдээлэл авч, шалгалтын ажиллагаа явуулж байгаа юм байна.

Харин тухайн бичлэг олон нийтэд хүрсний дараа иргэдийн зүгээс "Танхайрал, хүчирхийллээс өөрийгөө хамгаалахын тулд галт зэвсгийг хүмүүст эзэмшүүлэх ёстой" гэсэн хэлэлцүүлэг өрнөх болов. Өмнө нь мөн л аливаа танхай, бүлэглэн зодоон, хулгай дээрмийн асуудал хөндөгдөх бүрт галт зэвсгийн асуудал хөндөгддөг.

Тэгвэл "Галт зэвсгийн тухай хууль" манай улсад дараах байдлаар үйлчилдэг. Галт зэвсгийг ашиглаж байгаа зориулалтаар нь дөрөв ангилдаг байна. Үүнд,

• Иргэний;
• Харуул хамгаалалтын;
• Хууль сахиулах албаны;
• Байлдааны зориулалттай байдаг.

Дээрх дөрвөн ангиллаас иргэний зориулалттай галт зэвсгийг хуульчилсныг хүргэж байна.

• 5.1.Ан агнах, буудлагын спорт-сургалтаар хичээллэх, үзмэр, цуглуулгын зорилгоор Монгол Улсын иргэний өмчилж, эзэмшиж байгаа галт зэвсгийг иргэний зориулалттай галт зэвсэг гэнэ.
• 5.2.Ан агнах зорилгоор ашиглах галт зэвсэг нь автоматаар, эсхүл өөрөө цэнэглэгдэх боломжгүй, хүхээгт нь арав, түүнээс цөөн сум орох багтаамжтай, үйлдвэрийн хийцийг нь өөрчлөөгүй галт зэвсэг байх бөгөөд сумны хошуу нь зүрхэвчгүй байна.
• 5.3.Спорт-сургалтын зорилгоор ашиглах галт зэвсгийн сумны хошуу нь зүрхэвчгүй байна.
• 5.4.Хуульд өөрөөр заагаагүй бол хуулийн этгээд зөвхөн үзмэр, цуглуулгын болон спорт-сургалтын үйл ажиллагаа эрхлэх зорилгоор иргэний зориулалттай галт зэвсэг өмчилж болно.
• 5.5.Галт зэвсэгтэй адилтгах хэрэгслийн жагсаалт, түүнийг ашиглах журмыг цагдаагийн төв байгууллагын саналыг үндэслэн хууль зүйн асуудал эрхэлсэн Засгийн газрын гишүүн батална.
  

Өмчлөх, Хуульд өөрөөр заагаагүй бол 21 нас хүрсэн, иргэний эрх зүйн бүрэн чадамжтай, галт зэвсэг ашиглаж гэмт хэрэг санаатай үйлдэж байгаагүй, галт зэвсэг эзэмших, ашиглах, хадгалах аюулгүй ажиллагааны сургалтад хамрагдаж гэрчилгээ авсан Монгол Улсын иргэн иргэний зориулалттай галт зэвсэг өмчилж болно.

Эзэмших, Энэ хуульд өөрөөр заагаагүй бол 21 нас хүрсэн, иргэний эрх зүйн бүрэн чадамжтай, галт зэвсэг эзэмших, ашиглах, хадгалах аюулгүй ажиллагааны сургалтад хамрагдаж гэрчилгээ авсан ажилтан, байгаль хамгаалагчид харуул хамгаалалтын үйл ажиллагаа эрхлэх эрх бүхий хуулийн этгээд, төрийн эрх бүхий байгууллага гэрээний үндсэн дээр албаны үүрэг гүйцэтгэх хугацаанд нь галт зэвсэг эзэмшүүлж болно.

 Галт зэвсэг ашиглах тухайд,

• 11.1.Монгол Улсын иргэн, хуулийн этгээд өөрийн өмчлөл, эзэмшилд байгаа галт зэвсэг, галт зэвсэгтэй адилтгах хэрэгслийг бүртгүүлсэн зориулалтаар нь аюулгүй ажиллагааг ханган ашиглах эрхтэй. Иргэн өөрийн өмчилж, эзэмшиж, ашиглаж байгаа галт зэвсгээ амь бие, эд хөрөнгийг араатан, амьтнаас хамгаалах зорилгоор ашиглаж болно.
• 11.2.Нутгийн захиргааны байгууллагын шийдвэрээр золбин нохой, муур, гоц халдварт өвчин бүхий мал, амьтныг хот, суурин газарт галт зэвсэг ашиглан устгаж болно.
• 11.3.Нутгийн захиргааны байгууллага энэ хуулийн 11.2-т заасны дагуу шийдвэр гаргаж, ажиллах журмыг цагдаагийн байгууллагатай хамтран батална.
• 11.4.Галт зэвсэг өмчлөгч иргэн галт зэвсгээ энэ хуулийн 9.1-д заасан шаардлага хангасан иргэнд түр хугацаагаар ашиглуулж болно.
• 11.5.Хот, суурин газарт аюулгүй байдал хангасан буудлага үйлдэх байгууламж /тир/-д спорт-сургалтын буудлага хийж болно.
• 11.6.Галт зэвсэг ашиглахад харшлах өвчин, гэмтэл согогийн жагсаалтыг хууль зүйн болон эрүүл мэндийн асуудал эрхэлсэн Засгийн газрын гишүүд хамтран батална.
• 11.7.Галт зэвсэг, сум ашиглан спорт-сургалтын үйл ажиллагаа эрхлэх иргэн, хуулийн этгээд зориулалтын буудлага үйлдэх байгууламж /тир/-тай байна.
• 11.8.Галт зэвсэг, сум ашиглан спорт-сургалтын үйл ажиллагаа эрхлэх зөвшөөрлийг спортын асуудал эрхэлсэн төрийн захиргааны төв байгууллагын саналыг үндэслэн цагдаагийн төв байгууллага олгоно гэсэн байдаг.

Дээрх заалтад туссанчлан бууг эзэмшигч амь насаа хамгаалахын тулд хүн рүү бус амьтан руу буугаа чиглүүлэхийг зөвшөөрдөг. Хэрэв тус хуулийн заалтуудыг зөрчсөн тохиолдолд бууг хурааж, зөрчлийн хэмжээнээс хамаарч Эрүүгийн хууль, эсхүл Зөрчлийн тухай хуульд заасан хариуцлага хүлээлгэдэг байна.

Галт зэвсгийн тухай хуулийн дэлгэрэнгүйг энд дарж харна уу.

З.УЧРАЛ

Энэ мэдээнд өгөх таны үнэлгээ

Хуваалцаарай Жиргээрэй