Ах нартаа сайдын суудал өгөөд, ҮХНӨ-ийн том агуулгуудаа "нойл"-д хийж урсгасан МАН-ын 80-аад оныхон

"М.Энхболд л төрөөс явчихвал улс орон цэцэглэн хөгжих гээд байна" гэж хашхирч явсан эмоцио эрх баригчид саяхан Үндсэн хуулийн 39.1 дээр ашиглав. Тэр нь, зөвхөн Л.Оюун-Эрдэнэ танхимаасаа таалагдахгүй сайд нараа гаргаж шидэхэд л чиглэв.

"МАН-ЫН 80-ААД ОНЫХОН АХ НАРААСАА ОГТ ЯЛГАРСАНГҮЙ"

Намынхаа толгойд яваа МАН-ын 80-аад оныхны зорилго ба алхам нь ийм богинохон эрх ашиг дээр гүйгээд л зогсчихлоо. Уг нь тэд,

• Ерөнхийлөгчөө парламентаас сонгодог болох,
• УИХ-ын гишүүдийн тоог нэмэх,
• Сонгуулийн тогтолцоогоо өөрчлөх зэрэг гал халуун сэдэв ярьж байсан билээ.

Монголд улс төржилт явсаар ерөөсөө хүн рүүгээ субъектив байдлаар чиглээд л дуусдаг.

Үүнийг Үндсэн хуулийн 39.1-ийг өөрчлөөд л бусад өөрчилнө гэж байсан агуулгаа нойл руу хийгээд, усыг нь татчхаж байгаа МАН-ын 80-аад оныхны шийдэл баталж харуулж өгөв. Эднийг ах нараас нь ялгаад, "Ээ, сайн зорилго руу тэмүүлж буй" гэж хөөргөх нь ч илүүц харагдана. Яг л ялгаагүй хүнд зориулсан хуулийн өөрчлөлтийг тэд хийлээ. Тэгээд л зогсчихлоо.

Юун нөгөө парламентад олон намын төлөөлөл орж суух боломжийг хангах замаар, нэг намын ноёрхлыг сааруулах. Юун гишүүдийнхээ төлөөллийн нэгжийг багасгаж, эрх мэдлийг нь хумиад сонгодог парламент хөгжүүлэх. Засгийн газартайгаа ижил тэнцүү эрх эдэлж, төсвийн нэг урсгал хамаад буй Ерөнхийлөгчийн сонгогдох хэлбэрийг өөрчлөх.

Эсрэгээрээ эдний улс төржилт нь бүр нэг биш болоод ирэнгүүт, насны ахаар У.Хүрэлсүх санаачилгыг гартаа авч, зарим талаараа Х.Баттулга, Ц.Элбэгдорж нараас ч давуу эрхийг нам дотроо эдлэх болжээ.

"АХ НАРЫН ДҮҮ НАР ИЙМ БАЙДАГ"

МАН дотор одоо хамгийн хүчтэй буй нь Л.Оюун-Эрдэнэ, Д.Амарбаясгалан, Д.Сумьяабазар, Х.Нямбаатар тэргүүтнүүд. Тэд үеийнхнээсээ яаж ийгээд, Т.Аюурсайхан, Г.Тэмүүлэн зэргийнхээ амыг барьж чаджээ. Харин эсрэгээрээ, ах нараасаа цэвэрлэх гэж байсан тогтолцоогоо ах нартаа тавьж өгөв.

Хошин жишээ авахад,

Л.Оюун-Эрдэнэ нарын идэвхийлэн хийсэн акцын үр дүнд Ж.Эрдэнэбатын тэргүүлсэн Засгийн газар огцроход Б.Чойжилсүрэн Сангийн сайдаас бууж байв. Түүнийг энэ цаг үед эргүүлэн улсын тусгаар тогтнолын далд амин судас болсон Эрчим хүчний салбарт сайдаар тавьчихлаа.

Ч.Хүрэлбаатар Сангийн сайд, УИХ-ын Төсвийн байнгын хороо ахалж, Хөгжлийн банкны жинхэнэ нам гүм "түгжил" үеийг удирдаж явсан. Гэтэл ах нарынхаа сааруулж, удаашруулж, хөгжлийн замыг нь гацааж байсан том төслүүд, зарим агуулгыг хөдөлгөх зорилготой байгуулсан Эдийн засгийн хөгжлийн яамаа Ч.Хүрэлбаатарт өгчхөж байх жишээтэй.

Ингэж дүү нар нь "Сайд нараа л солихгүй бол ажил явахгүй байна" гэж орилж байгаад, парламент дахь мөнгөтэй, лоббитой, бизнестэй ах нартаа сайдын суудал өгч найр тавилаа. Ард нь гарангуутаа өнөөх хийнэ гэж ҮХНӨ-өө бүр мартсан гэлтэй таг чиг болов.

СЭТГҮҮЛЧИЙН ТЭМДЭГЛЭЛ: Намын дарга нь намын генсектэйгээ ордонд суусан ийм үед МАН-аас яг ҮХНӨ-ийн тогтолцооны шинэчлэлтийг хүсч хүлээж нь зөв үү. Магад хэт романтик төсөөлөл болчих биш үү. Одоо ийм л асуулт гарч ирэв, олон нийтийн өмнө.

Хэдий ковид, дайны нөлөөнөөс дэлхийн эдийн засаг уруугаа яваа ч манай улсад нэг нам хэт удаан засагласнаас авлигын сүлжээ гаарч, хүний эрх, эрх чөлөө хумигдаж, демократ үзэл алсран хийцгүйрсээр байна. МАН ч үзэл санааны хувьд баахан төөрч, эдүгээ хүүхдийн мөнгөн дээрээ хүртэл маргаан үүсгэх хүртлээ доройтлоо.

Одоо тэднээс ҮХНӨ-ийн бусад агуулгуудыг ер нь нэхэх үү. Ийм чадамж тэдэнд яг байна уу. Энэ их эргэлзээ төрүүлнэ.

Сэтгэгдлээ илэрхийл

Share Tweet