Г.Сайханбаярын оронд нөхөн нэр дэвшүүлэхгүй, саналын хуудсаас нэрийг нь ч хасахгүй

УИХ-ын сонгуулийн I тойрог Архангай, Өвөрхангай, Баянхонгорт нэр дэвшигч Г.Сайханбаярыг ухуулагчаар хуваарилагдан ажиллаж байсан П.О хүний амь насыг хохироосон хэрэг гарсан. МАН-ын төв штабаас түүнд ёс зүйн хариуцлага хүлээлгэн нэр дэвшигчээс нь эгүүлэн татаж байгаагаа дуулгасан.

Улмаар түүний оронд нөхөн нэр дэвшүүлэлт хийгдэх эсэх үйл явц цаашид хэрхэн өрнөх тухай эргэлзээтэй асуултууд гарч ирсэн юм.

Тэгвэл ямартай ч Г.Сайханбаярын оронд хэн нэгнийг нөхөн нэр дэвшүүлэх боломжгүй юм байна. Учир нь саналын хуудаст нэр нь хэдийн бичигдсэнээс гадна нөхөн дэвшүүлэх хуулийн хугацаа өнгөрсөн. Мөн намын төв штабаас ёс зүйн хариуцлага хүлээлгэж байгаа нь өөрөө нэр дэвшигчээс татах гол үндэслэл. Бүх шатны намын хөл ажиллахгүй болж байна гэсэн үг.

Иймд МАН энэ удаагийн УИХ-ын сонгуульд 125 нэр дэвшигчтэйгээр оролцох болж байна. Сонгуулийн тухай хуульд,

75.1.Нэр дэвшигч бүртгүүлсний дараа тухайн нэр дэвшигчийг бүртгэхээс татгалзах үндэслэл тогтоогдсон бол Сонгуулийн ерөнхий хороо тухайн нэр дэвшигчийг бүртгэсэн тухай шийдвэрээ хүчингүй болгож, нийтэд мэдээлнэ.

75.2.Нэр дэвшигч энэ хуулийн 35.3, 38.2, 48.1, 48.5.1, 48.5.2, 56.2-т заасныг зөрчсөн болох нь санал хураалтын дүн гаргахаас өмнө тогтоогдсон бол Сонгуулийн ерөнхий хороо тухайн нэр дэвшигчийг бүртгэсэн тухай шийдвэрээ хүчингүй болгож, нийтэд мэдээлнэ.

75.3.Саналын хуудас хэвлэгдэхээс өмнө нэр дэвшигчийг бүртгэсэн тухай шийдвэрийг хүчингүйд тооцсон бол түүний нэрийг саналын хуудаст бичихгүй.

75.4.Саналын хуудас хэвлэгдсэний дараа нэр дэвшигчийг бүртгэсэн тухай шийдвэрийг хүчингүйд тооцсон бол саналын хуудсыг дахин хэвлэх бөгөөд дахин хэвлэх боломжгүй бол уг саналын хуудсаар санал авч, хасагдсан нэр дэвшигчид өгсөн саналыг санал хураалтын дүнд оруулан тооцохгүй гэж заасан.

Энэ мэдээнд өгөх таны үнэлгээ

Хуваалцаарай Жиргээрэй