“Jeju Air” компанийн онгоц осолдсон шалтгааныг хар хайрцгийн мэдээллээс олж мэднэ

Ням гаригийн өглөө Тайландаас Өмнөд Солонгос руу буцаж байсан “Jeju Air” компанийн боинг онгоц Муан хотод газардах үед онгоцны дугуй дэлгэгдэлгүй байсаар хашлага мөргөн дэлбэрсэн ноцтой осол гарсан билээ.
Ослын улмаас онгоцонд зорчиж явсан 181 хүнээс 179 нь амиа алдаж, онгоцны багийн хоёр хүн л амьд үлдсэн юм. Онгоцны дугуй дэлгэгдэхгүй байсан шалтгааныг систем рүү нь шувуу орсонтой холбон тайлбарлаж байсан ч одоогоор эцсийн байдлаар батлагдаагүй байна. Ослын дараа БНСУ даяар долоо хоногийн гашуудал зарласан бөгөөд амиа алдагсдын ар гэрийнхэн ослын шалтгааныг үнэн зөвөөр тодруулж, мэдээлэл өгөхийг шаарджээ.

Онгоцны нисгэгч агаарт явахдаа онгоцыг яаралтай газардуулах нөхцөл байдал үүссэнийг мэдэгдэж, буух хүсэлт явуулсан даруйдаа зурвасын буруу талаас газардаж, улмаар дугуй нь дэлгэгдэлгүй элгээрээ гулссаар онгоцны зурвасаас холгүй байрлах хашаан мөргөж дэлбэрсэн байна. Шинжээчдийн дүгнэж буйгаар хэрвээ тухайн зурваст хашаа байгаагүй бол онгоц хурдаа сааруулах хүртлээ гулсаж, аажмаар зогсох боломж байсан гэжээ.

Онгоцонд зорчиж явсан зорчигч ар гэр рүүгээ “Онгоц газардаж чадахгүй байна. Шувуу онгоцны далавчид орсон бололтой…” гэж бичсэн нь олны анхаарлыг татсан юм. Одоогоор онгоцны осолтой холбоотойгоор боинг онгоцыг үйлдвэрлэгч компани болон, БНСУ-ын цагдаа, тагнуул, аюулгүйн албаныхан АНУ-ын холбогдох албаныхантай хамтран ажиллаж байгаа аж.
Ослоор амиа алдагдсын ар гэрийнхэн мөрдөн шалгах ажиллагаа удаашрах нь хэргийн мөрдлөгийн хариу үр дүнтэй байх эсэхэд эргэлзэж буйгаа ч илэрхийлэв.

Боинг компанийн энэ төрлийн буюу 737-800 онгоц нь 1957-2023 он хүртэл 10 хүний амь нас хохирсон осол л бүртгэгдэж байжээ. Нийт нислэгийн тоогоор нь үзвэл энэ нь түүхэн дэхь хамгийн бага үзүүлэлт гэсэн байна.
Мөн Өмнөд Солонгосын бүх агаарын тээврийн компаниуд бүгд аюулгүй байдлын удирдлагын системтэй, хяналт шалгалтыг тогтвортой, маш сайн хийж ирсэн хэмээн БНСУ-ын Нислэгийн аюулгүй байдлын газрын ерөнхийлөгч мэдэгдсэн байна. Мэргэжилтнүүдийн хэлж буйгаар онгоцны хар хайрцгийн мэдээллийг нягтлан шинжилсний дараа л ослын шалтгааныг тодорхойлох боломжтой болно гэв.
Энэхүү ослын дараанаас “Jeju air” компанийн нислэг өдөрт хэдэн мянгаар цуцлагдсаар байна.

Эх сурвалж: CNN

Т.БАТСҮРЭН

Энэ мэдээнд өгөх таны үнэлгээ

Хуваалцаарай Жиргээрэй