Х.Нямбаатар нарын хэрэг шалгалт эрчимжсэн нь С.Амарсайхан ажлаа өгсөнтэй холбоотой юу

Хураангуй

• Х.Нямбаатарыг Эрүүгийн хуулийн 22.1 дэх зүйл буюу "Эрх мэдэл, албан тушаалын байдлаа урвуулан ашиглах" гэх үндэслэлээр яллагдагчаар татав
• Х.Нямбаатарын сургуулиасаа түр ирэхдээ "суллуулсан" Т.Даваадалай нарын хэргийг шүүхэд шилжүүллээ
• Мөн өнгөрсөн гуравдугаар сараас хойш 12 жил хүртэлх хорих ялтай "Үндэсний эв нэгдлийг бусниулах" зүйлчлэлээр шалгагдаж байгаа "Херо"-гийн Б.Баатарт хилийн хориг тавив.

Дэлгэрэнгүй

Дээрх гурван хүнд холбогдох хэргүүд өнгөрсөн хавар хуулийн байгууллагад шалгагдаж эхэлсэн. Харин эрчимжсэн огноо нь С.Амарсайханыг ХЗДХ-ийн сайдын суудлаа өгч, Л.Оюун-Эрдэнэ, Д.Амарбаясгалан нарын 30-ийн тал Н.Учрал нарын 38-ын талтай түнжин муу үед ийн таарав.

Хэрэг шалгалтын процессыг нь дурдвал,

Нэг. ₮6.6 тэрбумыг угаасан гэх хэргээр Т.Даваадалайг гурван сар орчим саатуулсан. Саяхан Х.Нямбаатар наадмын өмнө эх орондоо ирж хэд хонохдоо нэгдүгээр орлогчоор нь ажиллаж байсан Т.Даваадалайгаа "суллуулаад" буцсан. Улмаар АТГ-аас Т.Даваадалай, түүний дүү Т.Мөнхдалай болон эхнэрийнх нь дүү Н.Билгүүн нарт холбогдох хэргийг шүүхэд шилжүүлжээ.

83 хоног саатуулагдаад суллагдсан Т.Даваадалайг,

• ЭХ-ийн 22.4 дүгээр зүйл.Нийтийн албан тушаалтан хахууль авах
• ЭХ-ийн 18.6 дугаар зүйл.Мөнгө угаах гэмт хэрэгт холбогдуулан шалгаж буй.

Т.Даваадалайн хэргийн өрнөлийг ЭНД дарж унших боломжтой.

Хоёр. Т.Даваадалай нарын холбогдсон уг хэрэгтэй холбогдуулан Хотын дарга асан Х.Нямбаатарыг Эрүүгийн хуулийн 22.1 дэх заалтаар АТГ-аас яллагдагчаар татсан байна.

Гурав. АТГ-т зургаа, ТЕГ-т нэг зүйл ангиар шалгагдаж буй Херо-гийн Б.Баатарт хилийн хориг тавьжээ.

Б.Баатарт холбон шалгаж буй хэргийн процессыг ЭНД дарж унших боломжтой.

Л.Оюун-Эрдэнийн ах, “Херо энтертайнмент групп” ХХК-ийн гүйцэтгэх захирал  Б.Баатарыг өдгөө АТГ, ЭЦА, ТЕГ-аас Эрүүгийн хуулийн нийт долоон зүйл ангид хамаатуулан шалгаж буй. Хуулийн байгууллагад шалгагдаж эхэлсэн огноо нь өнгөрсөн гуравдугаар сар.

Тодруулан хэлбэл, түүнийг Увс аймагт "Монгол тулгатны 100 эрхэм" нэвтрүүлгийн зурагтай явахад нь ТЕГ-аас шалгаж буйгаа илэрхийлсэн ба даруй "Монгол хаан" жүжгийнхээ гэрээ зурах ажлаар Голланд улс руу явж, сар орчмын өмнө эх орондоо ирсэн. Ерөөс хилээр орж ирмэгц баривчлах нюанс байсан ч  "Broadway"-д тоглогдох сонгон шалгаруулалтад "Монгол Хаан" жүжиг тэнцэж, дэлхийд нэрээ гаргасан агуулгаар түр азнаад байсан. Гэтэл С.Амарсайханыг ажлаа өгч Г.Тэмүүлэн авмагц түүний хэргийг шалгах процесс эрчимжиж, дахин гэмт хэрэг үйлдэхээс урьдчилан сэргийлэх зорилгоор хилээр гарах эрхийг нь хязгаарлав.

Гэхдээ, шүүхийн тоймд дурдагдсан агуулгаас харахад түүнд холбогдох Эрүүгийн хуулийн 19.9 Үндэсний эв нэгдлийг бусниулах зүйлчлэл дурдагдсангүй. Херо энтертайментийн эзэмшилд буй Гэрэгэ тауэрын 14, 15 давхартай холбоотой агуулга дурдагджээ.

Тухайлбал, "Нийслэлийн прокурорын газраас яллагдагч “Херо”-ийн Б.Баатарт Эрүүгийн хуулийн тусгай ангид заасан “Хуурч зохиомол байдлыг зориудаар бий болгож бодит байдлыг нуух замаар бусдыг төөрөгдөлд оруулж эзэмшигч өмчлөгчийн эд хөрөнгийг шилжүүлэн авч залилах, мөнгө угаах, гэмт хэргүүдэд холбогдуулан эрүүгийн хэрэг үүсгэж яллагдагчаар татан мөрдөн шалгах ажиллагаа явуулж түүнд хязгаарлалт тогтоох таслан сэргийлэх арга хэмжээ авхуулах тухай санал ирүүлснийг шүүх 2026 оны 9 дүгээр сарын 25-ны өдөр хүлээн авч хянан хэлэлцлээ. Шүүхээс түүнийг дахин гэмт хэрэг үйлдэхээс урьдчилан сэргийлэх зорилгоор прокурорын саналыг хүлээн авч, яллагдагч Б.Баатарт 2026 оны 9 дүгээр сарын 25-ны өдрөөс эхлэн хилээр гарах хязгаарлалт тогтоох таслан сэргийлэх арга хэмжээ авч шийдвэрлэсэн" хэмээн дурдагдсан байна.

Дээрх хэргүүдийн үргэлжлэх нюансыг бид эргэн мэдээлсээр байх болно.

О.ОНОН

Өөрийн сэтгэгдлээ илэрхийл

Share Tweet