Наймаачдын агуулах байрладаг газрыг С.Амарсайхан ХУДАЛДААНЫ ТӨВ барихаар худалдаж авчээ

Өдгөө Шадар сайдын албыг хашиж буй С.Амарсайханы эрх мэдлээ урвуулан ашиглаж, Улаанбаатар хотын хэд хэдэн байршилд газар авсан гэх мэдээлэл анхаарал татсаар ирсэн. Учир нь тэр Нийслэлийн Засаг даргаар ажиллаж байв.

Сэтгүүлч М.Тэнгис нийтлэлээ доорх бичлэгт тайлбарлаж, ярилаа.

Энэ хүрээнд С.Амарсайханыг "Оюуны ундраа групп" компанийнхаа нэр дээр, Сүхбаатар дүүргийн нутаг дэвсгэр дэх 745 м2 газрын худалдаа, үйлчилгээний төвийн зориулалтаар худалдаж авсан баримтыг танилцуулж байна.

ХОТЫН ДАРГА БАЙХДАА 101 САЯ ТӨГРӨГӨӨР ХУДАЛДАЖ АВЧЭЭ

Сүхбаатар дүүргийн 10-р хороонд байрлалтай 17-р цэцэрлэгтэй залгаа 20 ширхэг дулаан граш бий. Зурагт дүрслэгдсэнчлэн, уртаашаа үргэлжилсэн энэ нарийн газар өдгөө "Оюуны ундраа групп"-ийнх буюу С.Амарсайханых болжээ. Энэ газрыг 2017 оны зургадугаар сарын 30-нд түүний нэр дээр бүртгэсэн байна. Өөрөөр хэлбэл хотын даргаар ажиллаж байх үед нь.

Үнэлгээний тухайд, нийт 101 сая төгрөгөөр худалдаж авчээ. Газар эзэмших эрх нь 2032 он хүртэл хүчинтэй.

ГРАШУУД ЭЗЭНТЭЙ Ч ХУДАЛДАА ҮЙЛЧИЛГЭЭНИЙ ЦОГЦОЛБОР БАЙГУУЛАХ ЗОРИЛГООР ЭЗЭМШЖЭЭ

Өдгөө энэ 745 м2 уртаашаа сунасан хэлбэртэй газарт 20 ширхэг дулаан граш байгаа. Анх амины зориулалтаар баригдсан байж болох энэ грашуудад одоо 100 айлын барилгын материалын худалдаачид бараагаа хадгалдаг. Өөрөөр хэлбэл худалдаачдын барааны агуулах болсон гэсэн үг.

Энэ утгаар С.Амарсайханы худалдаж авсан энэ газарт иргэд үйл ажиллагаа явуулж байна. Худалдаачид грашийг хууль ёсны дагуу, бичиг баримттай эзэмшдэг эсэх нь тодорхойгүй ч шуудхан нураачхаж болохгүй нөхцөл байдал байгаа юм.

Харин энэ газрыг худалдаж авахдаа зориулалтыг нь "Худалдаа үйлчилгээний төв, цогцолбор" гэж бүртгүүлсэн байгаа нь анхаарал татна. Эндээс, тус газарт грашуудыг буулгаж, оронд нь худалдааны төвийн барилга барих зорилго агуулсан мэт харагдаж байна.

"ОЮУНЫ УНДРАА ГРУПП"-Д С.АМАРСАЙХАН ХУВЬЦАА ЭЗЭМШДЭГ ХЭВЭЭР

Энэхүү 745 м2 газар нэр дээр нь шилжсэн "Оюуны ундраа групп" ХХК бол Шадар сайд С.Амарсайханы үүсгэн байгуулсан компаниудын нэг. Тэр одоо ч тус компаниас хувьцаа эзэмшдэг нь улсын бүртгэл дэх мэдээлэлд бий.

Түүнчлэн, Зайсангийн ам орчим дахь долоон байршлын нийт 15.02 га газрыг ахынхаа нэр дээр худалдаж авсан гэх баримтыг бид өмнө нь дэлгэж байв. Өдгөө тус газруудын бүртгэлтэй компаниудаас ах С.Ганбат нь нэрээ хасуулсан байдаг. Гэхдээ тухайн үед С.Ганбатын хамаарал бүхий компаниуд дээр 15.02 га газар бүртгүүлж, төлбөрийг нь "Оюуны ундраа групп"-ээс төлж байсан гэх. Энэ 15.02 га газарт түүний амьдардаг харш, Zaisan Hill Complex барилгууд нь баригдсан байдаг.

ӨМНӨХ КОНТЕНТ:

Зайсангийн ам: С.Амарсайханы харш төрсөн ахынх нь дангаар эзэмшдэг гэх 15.02 га газрын нэг хэсэгт баригджээ

Дэлгэрэнгүйг энд дарж уншина уу.

Сэтгэгдлээ илэрхийл

Share Tweet