ОХУ-ын Үндэсний аюулгүй байдлын зөвлөлийн Нарийн бичгийн дарга Николай Патрушевыг хордуулж, амь насыг нь хөнөөхийг оролдсон талаар барууны хэвлэлд мэдээлж эхэллээ.
Н.Патрушев өнгөрсөн сарын эхээр бие нь гэнэт муудаж, эмнэлэгт хүргэгдсэн нь бусдад хорлогдсонтой холбоотой байсан хэмээн дээрх мэдээлэлд бичсэн байна. Хор арьсаар дамжин биед нь нэвчсэн бөгөөд нэгд, хангалттай хэмжээнд байгаагүй, хоёрт, анхны тусламжийг цаг алдалгүй өгсний хүчээр тэсч гарсан гэжээ. Н.Патрушев бол 2008 оноос ҮАБЗ-ийн Нарийн бичгийн даргаар ажилласан, В.Путиныг залгамжлах магадлалтай кадр гэж тооцогддог. 1999 онд Холбооны Аюулгүй байдлын албаны даргын албан тушаалыг В.Путинаас залгамжлан авч, ҮАБЗ-д очих хүртлээ буюу 2008 он хүртэл хашсан нэгэн юм.
“Daily mail” тэргүүтэй барууны хэвлэлүүд Н.Патрушевын амь насанд халдсан явдлыг “ОХУ-ын дотоодод Кремльд эзэн суухын төлөөх тэмцэл хурцадсаны шинж” гээд “Цаашид энэ чиглэлээр болох олон том үйл явдлын эхлэл” хэмээн дүгнэсэн байв. Николай Патрушев өнгөрсөн сарын 5, 6-наас хойш олон нийтэд харагдаагүй аж.
Хэдэн жилийн өмнө барууны хэвлэлд В.Путин хорт хавдрын хагалгаанд орохоор болсон тухай мэдээлэл залгамжлагчаар нь Н.Патрушевыг нэрлэж байсан удаатай.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.