Б.Жавхлан: Нүүрсний биет хэмжээг нэмэгдүүлэхийн тулд компаниудад өртгийг бууруулах үүрэг өгсөн

Засгийн газрын ээлжит хуралдааны дараа Сангийн сайд Б.Жавхлан мэдээлэл өглөө. Өнгөрсөн долоо хоногоос хойш валютийн нөөц өндөр гарсан. Хувийн уурхайнуудаас хийгдсэн экспортын дүн нөлөөлж 40 гаруй сая ам.доллароор өссөн нь Төв банкны валютын нөөц нэмэгдэхэд нөлөөлж 5.2 тэрбум ам.долларт хүрсэн. Экспортын ажлын хэсэг ажилдаа орохдоо валютын нөөц чухал гэдэг дээр голчилж анхаарсан. Өнөөдрийн Засгийн газрын хуралдаанаар хоёр чиглэлээр яаралтай арга хэмжээ авахаар боллоо. Үүнд,

• Боомтууд дээр зөв эрэмбэлж, валютын нөөцийг нэмэгдүүлэхэд анхаарах
• Биет хэмжээг нэмэгдүүлж өрсөлдөх чадварыг сайжруулахын тулд төмөр зам дээр гартал өртгийг бууруулахыг тээврийн болон нүүрсний компаниудад үүрэг өгсөн.

Засгийн газрын болон Монголбанкны ч хийх ажил гэж бий. Нөөцийг нэмэгдүүлж, төлбөрийн тэнцлийг сайжруулах нь Засгийн газрын аижл. Интервенц хийх нь Монголбанкны ажил. Тал талаас хийх ажлаа хийж байна. Засгийн газрын зүгээс хийх ажлаа хийж, экспортыг нэмэгдүүлэх тал дээр ажилласаар байгаа.

Оросын талаас ЕАЭЗХ-той хийх түр хэлэлцээний асуудалд шамдуулаад байгаа юм биш. Бид өөрсдөө сүүлийн 20 жил шавдуулсан. Чөлөөт худалдаа гэдэг импорт, экспортын хоёр урсгалтай. Дотооддоо хангадаг олон бараа бүтээгдэхүүнийг хамгаалаад, том зорилго буюу ХАА-н гаралтай түүхий эдийг экспортлох бодлогоосоо ухарч болохгүй. Бүтээгдэхүүн нэг бүрээр нь хэлцэл хийж, дотоодын үйлдвэрлэлээ хамгаалж байгаа. Трамп тарифтай холбоотой энэ үед ЕАЭЗХ-той түр хэлэлцээ хийгээд үзье. Гурван жилийн хугацаанд болохгүй бол больж болно. Дулааны цахилгаан станцын тухайд бид ТЭЗҮ-тэй байх ёстой. Үнэлгээний хувьд зах зээлийн үнэлгээгээр л явна.

Т.БАТСҮРЭН

Энэ мэдээнд өгөх таны үнэлгээ

Хуваалцаарай Жиргээрэй