С.Амарсайхан: Манай эхнэр аав ээжийгээ ХӨСҮТ-д аваачаад, өөрөө аавынхаа гэрт 14 хоног тусгаарлагдсан

Шадар сайд С.Амарсайхан мэдээлэл хийлээ.

Тэрбээр "Өчигдөр УОК-ын хэвлэлийн хурал дээр надтай хамааралтай асуудлаар асуулт асуусан. Би товч хариулсан. Өнөөдөр тайлбар хийхдээ хэн нэгнийг буруутгаж, зөвтгөх гэсэнгүй. Бодит мэдээллээр хангах ёстой гэж үзлээ. Нэгдүгээрт манай эхнэрийн аав 100 хувь асаргаанд байдаг 80 гарсан хөгшчүүд. Хоёулаа халдвар авсан. Тиймээс манай эхнэр ХӨСҮТ-д халдвар хамгааллын дэглэмээ барьж хүргэж өгсөн.

Мөн ХӨСҮТ-ээс гаргасан заавар зөвлөмжийн дагуу 14 хоног өөрийгөө тусгаарлаж байна. Хэд хэдэн удаа шинжилгээ өгсөн. Хариу нь сөрөг гарсан. 4-5 хоногийн дараа тусгаарлалтын хугацаа дуусах ёстой. Энэ тэрүүгээр явсан зүйл байхгүй.

Манай эхнэр халдвар гарсан голомт буюу аав ээжийнхээ гэрт тусгаарлагдаж байгаа гэдгийг тодотгож хэлье. Мөн хадварын нөхцөл байдалтай холбоотой олон асуудал яригдаж байна. Үүнд улс төрийн агуулга, дэгсдүүлсэн зүйл байхгүй. Халдварын тоо улам ихэсч байгаа.

Ахмад настнуудад халдвар асар хүнд тусч байгаа. Би ч өөрийнхөө амьдралд үзэж мэдэрч яваа хүний хувьд хэлэхэд аав ээж ахмадуудаа асарч хамгаалж, халдварын эрсдлийг бууруулах тал дээр анхаарч ажиллах зайлшгүй шаардлага байна шүү.

Би албан тушаалтай зууралдахгүй. Би өөрийгөө цар тахалтай тэмцэж байгаа гэж бодож байгаа. Бид бие биетэйгээ тэмцэлдэх биш, эрсдэл багатай гарахын тулд хэн хэндээ дэмжлэг үзүүлэх ёстой. Хэн ч байсан дүрэм журмаа мөрдөөд явах ёстой. ” гэлээ.

Энэ мэдээнд өгөх таны үнэлгээ

Хуваалцаарай Жиргээрэй