Дарья Дугинаг хөнөөсөн этгээд эмэгтэй хүн байжээ

ОХУ улс төр судлаач Дарья Дугинагийн аллагад Украиныг албан ёсоор буруутгажээ. 29 настай бүсгүй өнгөрсөн бямба гаригт автомашинтайгаа дэлбэрч амиа алдсан юм.

-ОХУ Дарья Дугинагийн аллагад Украиныг буруутгалаа-

Хэрэг гарсан даруйд хэвлэлүүд энэхүү хэргийн гол бай нь бүсгүйн эцэг, В.Путиний ойрын хүн гэгддэг Александр Дугин байсан байж болох талаар таамаг дэвшүүлэн бичиж эхэлсэн. А.Дугин өөрөө ч хуулийн байгууллагад өгсөн байцаалтдаа хэрэгт Украины үндсэрхэг үзэлтнүүдийг хардаж байгаагаа мэдүүлсэн байдаг. Тэгвэл ОХУ-ын Холбооны аюулгүй байдлын алба өчигдөр албан ёсоор мэдэгдэл хийж, Украиныг энэ хэрэгт буруутай, шууд хариуцлага хүлээлгэх субъект мөн гэжээ. Украины тал өөрсдийгөө энэ хэрэгт ямар ч буруугүй гэж өмнө нь мэдэгдсэнийг үл харгалзан Холбооны аюулгүй байдлын алба Украиныг буруутай гэж үзжээ.

Холбооны аюулгүй байдлын албаны хэвлэлд өгсөн мэдээллээр, алуурчин нь украин эмэгтэй. Бага насны охины хамт өнгөрсөн сард ОХУ-д дүрвэгчийн дүрээр ирсэн. Үнэндээ бол Украины тусгай албадтай холбоотой бэлтгэгдсэн хүн байсан гэнэ. Тэрбээр ОХУ-д ирээд Дарья Дугинагийн амьдарч байсан байранд байр хөлсөлж, халдлагад бэлтгэж эхэлсэн гэнэ. Улмаар гурван өөр дугаар бүхий Mini Cooper автомашин хөлөглөн Москва хотоор Дарья Дугинаг мөрдөж байсан, халдлага үйлдсэнийхээ дараа Эстон руу оргон зайлж, тэндээ бүгж байгаа гэдгийг ч Холбооны аюулгүй байдлын албаны мэдээлэлд тодорхой бичжээ. Дээрх мэдээллийг Д.Дугинагийн амьдарч байсан байр болон автозамын камерын бичлэг шүүн баталгаажуулсан аж.

Дарья Дугина цэрэг дайны сурвалжлагч, Төв телевизэд мэргэжилтнээр ажиллахын зэрэгцээ улс төр, гүн ухаан судалж, Кремлийг дэмжсэн нийтлэлүүдийг хэвлэлд бичдэг байсан юм. Ерөнхийлөгч В.Путин түүний оршуулгын зардлыг хувиасаа төлж, "Эр зоригийн төлөө" одонгоор нэхэн шагнасан байна.  

Өөрийн сэтгэгдлээ илэрхийл

Share Tweet