ГХО-ийг хохироосон түүх: Тэд Цүнэяки Харад хар тамхины хэрэг "тохож", газрыг нь "хувааж идсэн" хэргээр шалгуулж байна

Өдгөөгөөс зургаан сарын өмнө АТГ-аас Ерөнхий прокурор асан М.Энх-Амгалан болон түүний хамаарал бүхий хүмүүсийг албадан дуудаж, мэдүүлэг авч, обьектуудад нь нэгжлэг хийж эхэлсэн байдаг. Тухайн үед хэвлэлд маш бүдэг бадаг мэдээлэл байсан нь "Ерөнхий прокуророор ажиллаж байхдаа ҮАБЗ-ийн нарийн бичгийн дарга асан А.Гансүхийн хэргийг хэрэгсэхгүй болгосон" гэх шуум. Ингэхдээ оронд нь газар эзэмших эрх хахуульд авсан гэгдэж байв.

Гэтэл эл хэргийн, М.Энх-Амгаланг яагаад шалгах болсны учиг тайлагдаж байна.

Хэдхэн хоногийн өмнө ХЗДХ-ийн сайд Х.Нямбаатар мэдээлэл хийхдээ, "Гадаадын хөрөнгө оруулагчдыг хамтарч хувьцаа эзэмшиж байсан хүмүүс нь хууль хүчний байгууллагынхантай нийлж тонон дээрэмдсэн хэргүүд байна. Улсын Ерөнхий прокурор асан, ҮАБЗ-ийн нарийн бичгийн дарга асан, Тагнуулын байгууллагад ажиллаж байсан хүмүүс ч оролцоотой байна. Аравдугаар сарын 28-ны өдөр дэлгэрэнгүй танилцуулна гэдгээ хэлье. Олон жил бугшсан прокурорын дээд шатны, АТГ-т ажиллаж байсан хүмүүсийн үйл ажиллагаатай холбоотой хэргүүд учраас олон нийтийн дэмжлэг зайлшгүй шаардлагатай. Энэ бүхнийг ил болгож байж гадны хөрөнгө оруулагчид бидэнд итгэх итгэл төрнө" хэмээсэн.

ХЗДХ-ийн сайд Х.Нямбаатар эдгээр хүмүүсийг маргааш буюу энэ сарын 28-нд олон нийтэд ил зарлахаа мэдэгдээд буй.

-Тэд Цүнэяки Харад хар тамхины хэрэг тохсон уу-

Тэгвэл эл нэр дурдагдаад буй албан тушаалтнууд нь Улсын Ерөнхий прокурор асан Б.Энх-Амгалан, ҮАБЗ-ийн нарийн бичгийн дарга асан А.Гансүх, ТЕГ-ын дарга асан Б.Хурц нар гэдгийг баттай эх сурвалжууд мэдээлж байна.

Тэд гадны ямар хөрөнгө оруулагчийг тонон дээрэмдэв.

Цүнэяки Хара гэх 60 гаруй насны япон эзэнтэй "Суруга монгол" ХХК 2003 оноос эхлэн Монгол улсад үл хөдлөх хөрөнгө, барилгын бизнес эрхэлж эхэлжээ. Тус компани энэ хугацаанд Хан-Уул дүүрэгт “Japan Town” төслөө хэрэгжүүлж, “Дөрвөн улирлын цэцэрлэг” нэртэй байшин хороолол барихаар төлөвлөж, төслөө эхлүүлээд байжээ. Гэтэл нэг л өдөр Цүнэяки Хара хар тамхины хэрэгт холбогдож, зовлонгийн зам нь эхэлсэн байна.

Тодруулбал, тэрбээр Хан-Уул дүүрэг дэхь Палас зочид буудалд амьдардаг байв. Гэвч 2012 оны хоёрдугаар сарын 28-ны өдөр Цүнэяки Хараг "хар тамхи хэрэглэж байхад нь үйлдэл дээр нь баривчилсан" гэх хэргээр эрүүгийн хэрэг үүсгэж, дөрвөн сар шахам хорьсон байдаг. Улмаар 2012 оны зургадугаар сард шүүх хурал нь болж, түүнийг хар тамхи хэрэглээгүй гэж үзээд, хэргийг нь хэрэгсэхгүй болгосон юм.

Өөрөөр хэлбэл гэрээсээ баригддаг өдөр хамт ууж наргиж байсан хүмүүсээс нь гэрт нь ууттай хар тамхи үлдээж, улмаар цагдаад дуудлага өгснөөр тэрбээр гүйцэтгэх ажиллагааны, зохион байгуулалттай гэмт хэргийн золиос болсон байж болзошгүй хэмээн мэдээлэгдэж байлаа. Тэгвэл Х.Нямбаатар сайдын яриад буй дээрх хүмүүс Цүнэяки Харад хар тамхины хэрэг тохож, Монголоос дайжихад хүргэх ажиллагааг толгойлсон байж болзошгүй гэх хардлага байна.

Энэ явдлаас болж айж балмагдсан Цүнэяки Хара гэх эр эндэх компани, бүх ажлаа орхиод төрсөн нутгаа зорьсон. Тэрбээр нутагтаа очоод удаагүй нас барсан харамсалтай үйл явдал болж байв.

-А.Гансүх, М.Энх-Амгалан нар энэ хэрэгт ямар оролцоотой байж болох вэ-

А.Гансүх үүнд ямар оролцоотой вэ. Тэрбээр Зам, тээвэр, барилга хот байгуулалтын дэд сайд, сайд байхдаа “Суруга Монгол” ХХК-ийн барилгын тусгай зөвшөөрлийг цуцалж байжээ.

Улмаар “Суруга Монгол” ХХК тухайн үед “Монгол корпорэйшн” ХХК-д 37 га газраа шилжүүлж байж тусгай зөвшөөрлөө сэргээлгэж байжээ. Хожим нь 37 га газар авсан “Монгол корпорэйшн” ХХК А.Гансүхийн дүү А.Ганболдын мэдэлд ирсэн бөгөөд ингэснийхээ дараа “Суруга Монгол” ХХК-иас дахин 23 га газар авч, нийтдээ 60 газрыг авсан гэх мэдээлэл байна.

Харин эл хэрэгт Ерөнхий прокурор асан М.Энх-Амгалан хэрхэн холбогдов. Нийтлэлийн эхэнд дурдсан. А.Гансүхийг шалгуулж байсан Төмөр замын хэргийг хэрэгсэхгүй болгосныхоо төлөө газар эзэмших эрх хахуульд авсан гэх асуудал. Эх сурвалжийн мэдээллээр А.Гансүх "төмөр зам"-ын хэргээ аргалуулахын тулд Улсын Ерөнхий прокурор М.Энх-Амгаланд “Нью даун таун” ХХК-ийн 16 хувийн хувьцаа буюу 1.4 га газар санал болгосон гэх. Улмаар М.Энх-Амгалан зөвшөөрснөөр өөрийн дүү М.Бат-Амгалангийн нэр дээр “Нью даун таун” ХХК-ийн 16 хувийн хувьцааг эзэмшжээ.

“Нью даун таун” ХХК-ин гүйцэтгэх захирал нь УИХ-ын гишүүн Б.Наранхүүгийн хүү Н.Эрдэнэ. 2017 оны аравдугаар сарын 17-нд байгуулагдаж, “Суруга Монгол” ХХК-иас 10 га газар авсан бөгөөд долоон хувьцаа эзэмшигчтэй, бүгд яг ижил 16 хувийн хувьцаатай анх үүсгэн байгуулагдаж байжээ.

Хувьцаа эзэмшигчид:

1. Баатархүүгийн Энхчулуун
2. Магванноровын Бат-Амгалан-Улсын Ерөнхий прокурор асан М.Энх-Амгалангийн төрсөн дүү.
3. Наранхүүгийн Эрдэнэ-УИХ-ын гишүүн асан Мон-Ураны гэх тодотголтой Наранхүүгийн төрсөн хүү
4. Бибишийн Билэгсайхан-Анод банкны хуулийн мэргэжилтэнээр ажиллаж байсан
5. Цогоогийн Уугангэрэл-Цагдаагийн хурандаа цолтой үүрэг гүйцэтгэж байгаад 2014 онд Хууль Зүйн яамны Дэд сайдаар 2016 он хүртэл ажиллаж байсан.
6. Цэрэнбатын Чинбаяр-Одоогийн Суруга Монгол ХХК-ийн гүйцэтгэх захирал.
7. Маньбадрахын Ганболд-2006-2008 оны хооронд ЦЕГ-ын даргаар ажиллаж байсан. Генерал цолтой.

Тэгэхээр эл хэрэгт өөр ямар хүмүүс холбоотой байсан талаар маргааш ХЗДХ-ийн сайд Х.Нямбаатарын хийх мэдээллийг хүлээж, анхааралтай сонсох үлдлээ. 2021 онд Хууль зүй, дотоод хэргийн сайд Х.Нямбаатар твиттер хуудаснаа “Жапан тауны газрыг булааж авсан хүмүүсийн булхай удахгүй дэлгэгдэх байх аа” хэмээн жиргэж байсан билээ.

Энэ мэдээнд өгөх таны үнэлгээ

Хуваалцаарай Жиргээрэй