АН-ын фракцууд яамдаа хуваан авч, өөрсдийн томилгоонуудаа хийж эхэлжээ

Ардчилсан нам маш олон фракцтай. МоАХ, МҮДН, “Шонхор”, “Нэг ардчилал” зэрэг голлох хэдэн фракц бий. Хамгийн сүүлд гэхэд л "Нэг Монгол", “Морьтон”, “Од”, “Хийморь”, “АНчин”, “Монде” гэсэн улс төрийн клубууд байгуулагдсан. “Монде” клубт УИХ-ын гишүүн Б.Пүрэвдорж, Ж.Батсуурь тэргүүтэн багтаж буй бол“Од”-д О.Магнай, М.Тулгат нар байдаг.

Тэгвэл АН доторх хуучин фракцууд яамдаа хэрхэн хуваан авч хүмүүсээ байршуулсан байдлыг хүргэж байна.

Нэг, Э.Одбаярын Хяналт, үнэлгээний Үндэсний хороо руу Ц.Элбэгдоржийн угшилтай болон С.Эрдэнийн гарын хүмүүс очжээ.

АН-ын дарга асан С.Эрдэнийн туслахаар ажиллаж байсан н.Нямсүрэн гэгч нь сайд Э.Одбаярын зөвлөхөөр ажиллаж байгаа аж. Харин Ц.Элбэгдоржийг Ерөнхийлөгч байхад хуулийн бодлогын зөвлөхөөр нь ажиллаж байсан Ч.Өнөрбаяр тус хорооны харьяа Засгийн газрын хяналт хэрэгжүүлэх газрын даргын түр орлон гүйцэтгэгчээр томилогдон ажиллаж буй юм.

Хоёр, О.Алтангэрэлийн ХЗДХЯ, С.Одонтуяагийн Байгаль орчин, уур амьсгалын өөрчлөлтийн яам, Ц.Тувааны Аж үйлдвэр, эрдэс баялгийн яам руу Ерөнхийлөгч асан Х.Баттулгын хүмүүс орж байна.

2024 оны УИХ-ын сонгуулиар “Бор дээлт” гэдгээрээ нүдлэгдсэн Г.Болормаа ХЗДХ-ийн яаманд дарга болгосон гэх мэдээлэл бий. Түүний хувьд Ерөнхийлөгч асан Х.Баттулгын хүн гэгдэж байв. Мөн ХЗДХЯ-ны харьяа Төрийн тусгай албан хаагчдын нэгдсэн эмнэлэгт Н.Одонгоо очсон гэгдэж байна.

Гурав, Р.Эрдэнэбүрэнгийн 20 минтын хот, үндэсний хороо болон Ц.Баатархүүгийн Цахим хөгжил, инновац, харилцаа холбооны яам руу С.Баярцогтын хүмүүс болон МҮДН фракцынхан ирж байна.

Цахим хөгжил, инновац, харилцаа холбооны яаманд Ардчилсан залуучуудын холбооныхон төдийгүй Чингэлтэй дүүргийн АН-ынхан томилогдон ирж байгаа аж. Ц.Баатархүү залуусаа татаж байгаа гэсэн үг. Харин 20 минутын хот, үндэсний хороонд С.Баярцогтынхон үүрлэж эхэлжээ. Үүнийг "Шинэ Зуунмод хот"-ын томилгооноос харж болно.

Дөрөв, Л.Гантөмөрийн Эдийн засаг, хөгжлийн яам, Ж.Батсуурийн Хот байгуулалт, барилга, орон сууцжуулалтын яам руу "Нэг ардчилал" буюу Г.Батхүү агсны МоАН фракцынхан орж эхэлжээ.

“Нэг ардчилал” буюу өдгөө “МонДе” фракцид УИХ-ын гишүүн Б.Пүрэвдорж, Ж.Батсуурь, Хуульзүйн сайд асан Х.Тэмүүжин, хуульч Г.Эрдэнэбат, эдийн засагч Р.Даваадорж тэргүүтэй залуус багтдаг.

Хот байгуулалт, барилга, орон сууцжуулалтын яамны харьяа Барилгын Хөгжлийн төвд АН-ын дэд дарга Т.Пүрэвхатан очсон гэгдэж байна. Түүний хувьд, 2020 оны УИХ-ын сонгуульд АН-аас Э.Бат-Үүл, Ш.Батдэлгэр хоёртой ханьсаж нэр дэвшсэн ч өвдөг шороодсон. 2024 оны УИХ-ын сонгуулиар Х.Баттулгын дэмжлэгээр АН-ын дэд даргаар томилогдож байлаа. Мөн Эдийн засаг, хөгжлийн яамны харьяа “Төр, хувийн хэвшлийн түншлэлийн төв” ТӨААТҮГ-т Ууганаа очжээ.

Харин АН-ын дарга, Тэргүүн шадар сайд Л.Гантөмөрийн сайдаар нь ажиллаж байгаа Эдийн засаг, хөгжлийн яамны харъяа байгууллага болох Үндэсний хөгжлийн хүрээлэнгийн захирлаар Н.Алтанхуягийн “хүргэн” Г.Дэнзэн томилогдсон аж.

МҮДН фракцынхан болон хуучин гишүүд ч бас хүмүүсээ шахаж, томилгоонууд хийж байна.

“Шинэ дэвшилтэд холбоо” буюу МҮДН фракцид “Фортуна” Н.Батбаяр, Батж.Батбаяр, “Худалдаа Хөгжлийн банк”-ны Н.Мэдрээ, Р.Амаржаргал, Б.Гарамгайбаатар, Д.Зоригт, "Ажнай" Д.Бат-Эрдэнэ, Б.Наранхүү, Ц.Баярсайхан гэх зэрэг АН-ын аль л мөнгө хөрөнгөтэй улстөрчид хамаарагддаг байв. АН-ын үе, үеийн сонгуулийн мөнгийг босгодог бизнесийн голдуу төлөөллүүд гэсэн үг.

Сэтгүүлчийн тэмдэглэл: Ингээд харахад Ардчилсан нам нэгдэж, цөм болж чадсан эсэх талаар тодорхой бус. Задрал, өутрал нь хэвээр байсаар гэж хэлэхэд буруудахгүй бололтой. Учир нь, фракц, клубээрээ хуваагдсан олон бүлэглэлүүд, төрийн яаманд үүрлэсэн байдлыг нь зах зухаас нь сөхөхөд л ийм байна. Цаашлаад энд дурдагдсанаас гадна өчнөөн томилгоо хийхээр зэхэцгээж байгаа аж.

Энэ мэдээнд өгөх таны үнэлгээ

Хуваалцаарай Жиргээрэй