Л.Оюун-Эрдэнэ: Төмөр замаар тээвэрлэх нүүрсний экспорт 165 сая тоннд хүрч, 1.5 тэрбум ам.доллароор орлого нэмэгдэнэ

Монгол, Хятадын Гашуунсухайт-Ганцмод боомтын хил дамнасан төмөр замын бүтээн байгуулалтын нээлт өнөөдөр /2025.05.14/ болж байна.

Нээлтийн үйл ажиллагаанд Ерөнхий сайд Л.Оюун-Эрдэнэ үг хэллээ.

Тэрбээр, "Засгийн газрын ажлын хэсгийн гишүүд та бүхэндээ Засгийн газрын нэрийн өмнөөс чин сэтгэлийн талархал илэрхийлье. Том төсөл хөдөлгөнө гэдэг бол том эрх ашгийг хөндөнө гэсэн үг. Төм төсөл хөдөлгөнө гэдэг том сорилтуудтай нүүр тулж, даван гарна гэсэн үг. 2014 оноос хойш 18 жил хэлэлцсэн хэлэлцээрт цэг тавин хөдөлгөж чадсан хоёр талын ажлын хэсгийнхэнд баяр хүргэе. Нүүрсний зах зээлийн дотоод гадаад өрсөлдөөний олон улсын тоглогчид энэхүү төмөр замыг тавиулахгүй байх нь өөрсдөд нь ашигтай гэж үзсэн явцуу эрх ашгаас маш их цаг хугацааг алдсан. Харин өнөөдөр хоёр улсын Засгийн газар гурав дахь этгээдийг оруулахгүйгээр олон жилийн үл ойлголцолд цэг тавьж чадлаа. Дэмжлэг үзүүлсэн Ерөнхийлөгч Ухнаагийн Хүрэлсүх, УИХ-ын чуулганаар хэлэлцээрийг соёрхон баталсан УИХ-ын дарга Д.Амарбаясгалан болон УИХ-ын эрхэм гишүүд, парламентад суудалтай улстөрийн намуудад талархал илэрхийлье.

Монгол Улс БНХАУ-тай мөнхийн хөрш орнууд билээ. Гашуунсухайт-Ганцмод боомтын хил дамнасан төмөр замын бүтээн байгуулалтын ажлыг эхлүүлж байгаа нь Замын-Үүд боомт, Энхтайвны гүүр, Улсын Их дэлгүүр зэрэг хоёр улсын найрамдалт харилцааны бэлгэ тэмдэг болсон ард түмний сэтгэлд хоногшсон нэгэн том бүтээн байгуулалт болж түүхэнд тодоор үлдэнэ гэдэгт итгэлтэй байна. Энэхүү хэлэлцээрийг хурдтай шийдвэрлэхэд хамтран ажилласан, дэмжлэг үзүүлсэн БНХАУ-ын Төрийн зөвлөлийн Ерөнхий сайд Ли Чянтай, Гадаад хэргийн сайд Ван И, Монгол Улсад суугаа элчин сайд болон бусад албаны хүмүүст Монгол Улсын Засгийн газрын нэрийн өмнөөс халуун талархал илэрхийлж байна. Өнөөдөр нээлтээ хийж буй Гашуунсухайт-Ганцмод боомтын өргөтгөл шинэчлэлийн бүтээн байгуулалтад буцалтгүй тусламж үзүүлсэн БНХАУ-ын Засгийн газарт талархал илэрхийлье.

Гашуунсухайт хилийн боомтын экспорт, импортын 22 гарцтай болгож, нэвтрүүлэх хүчин чадлыг хоёр дахин нэмэгдүүлснээр улсын эдийн засагт эерэг нөлөө үзүүлэхээс гадна орон нутгийн иргэдийн амьдралын чанар, орлогын эх үүсвэрийг шинээр бий болгож чадна гэж үзэж байна.

Эрхэм хүндэт зочид оо, өнөөдөр Монгол-БНХАУ-ын эдийн засгийн түншлэлд шинэ эрин, шинэ хуудас нээгдэж байна. Монгол Улс "Алсын хараа 2050" урт хугацааны хөгжлийн бодлогоо тууштай хэрэгжүүлж, "Монголын за бол андгай" хэмээх язгуурын зарчмаа хатуу баримтлах болно.

Нүүрсний экспорт 165 сая тоннд хүрч, жилд 1.5 тэрбум ам.доллароор орлого нэмэгдэнэ. Нэг хүнд ногдох ДНБ 10 мянган ам.долларт хүрэх Засгийн газрын зорилт хангагдаж, эдийн засаг тэлэх үндсэн нөхцөл бүрдэх юм. Тийм ч учраас бид 14 мега төслийн нэгдүгээрт эрэмбэлсэн.

Төмөр зам ашиглалтад орсноор дэлхийн гангийн үйлдвэрлэлийн талаас илүү хувийг үйлдвэрлэдэг БНХАУ-д нүүрсийг урт хугацаанд тогтвортой, найдвартай нийлүүлэх итгэлт түнш Монгол Улс байх боломж бүрдэж байна. Цаашдаа бид Шивээхүрэн-Сэхэ боомтоо холбох хэлэлцээрийг өнөөдөр үдээс хойш хийнэ. Бичигт-Зүүнхатавч, Ханги-Мандалын боомтуудыг урт хугацааны төлөвлөлтөд оруулах ажлыг өнөөдөр хамт ярилцана. Үлдсэн төслүүдээ хөдөлгөхийн төлөө хатуугаас хатуу зарчим барина.

Монгол Улс БНХАУ, ОХУ-тай гурван улсын төмөр зам болон байгалийн хийн хоолойн төслүүдийг явуулахын төлөө харилцан ашигтай хэлцлүүдийг идэвхтэй дэмжин ажиллах болно. Төмөр замын хил холбогдож нүүрс тээвэрлэх түүхэн өдөр эргэн уулзахын ерөөл дэвшүүлье. Мөнх хөх тэнгэрийн дор Монгол Улс мандан бадрах болтугай. Мөнхийн хөрш Монгол-Хятадын харилцаа хөгжин цэцэглэхийн ерөөл дэвшүүлье. Баярлалаа" хэмээлээ.

Энэ мэдээнд өгөх таны үнэлгээ

Хуваалцаарай Жиргээрэй