Иргэн "Г" нь хашуулж явсан ч шатахуун авч хөдлөхөд байрлал өөрчлөгдөн цуваанд орон явах үед осолджээ
"Талын салхи-2026” мотоциклийн олон улсын наадамд оролцон цуваанд нэгдэж Төв талбайгаас хөдөлсөн иргэн "Г" өчигдөр /2026.06.06/ 13:00 цагийн үед СХД-ийн 20-р хороо "22-ын товчоо пост" орчимд осолдож нас барсан. Монгол Улсын ерөнхийлөгч тэргүүлж гарсан тус цуваанд явж байсан иргэн осолдож нас барсан хэргийг "Цуваа Чингисийн талбайгаас 11:00 цагт хөдөлж, СХД-н 21-р хороо "Говь ресорт" амралтын газарт цуваа ямар нэгэн осолгүйгээр очсон. Бүртгэгдсэн осол нь цуваанд явж байгаад Архангай аймаг руу салдаг зам руу салж, эмээлт орчимд осолдсон байна" гэж ТЦА-наас мэдээлсэн.
Амь хохирсон иргэн "Г" нь хувийн эзэмшлийн "МТ-09" маркийн улсын дугаартай мотоцикл жолоодож яваад "Баруун турууны даваа" гэх газарт замын зорчих хэсгийн төмөр хашлага мөргөж нас барсан байна. Эх сурвалжийн мэдээлж буйгаар иргэн "Г" нь мотоцикл мэргэжлийн түвшинд унах туршлагагүй учир хамт зорчиж явсан хүмүүс голдоо оруулан явж байжээ. Харин ШТС-аас шатахуун авч хөдлөхдөө дундаа оруулж явсан байрлал өөрчлөгдөж хоорондоо 100-200 метрийн зайтай цуваа үүсгэн явах үед хашлага мөргөн осолджээ. Иргэн "Г" нь "мотоциклийн клубээрээ явж байсан" гэх мэдээлэл нь ташаа бөгөөд ямар нэгэн клубт харьяалалгүй аж.
Б.АЗЖАРГАЛ
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.