Ерөнхий сайд асан С.Баяр төрөөс завшсан гэх дугаараа зарлаж, ₮50 мянгын бензинд дугаарлаж буй иргэдийг тохуурхав
УИХ-ын гишүүн Ө.Шижир энэ хавар төрийн өндөр албан тушаал хашиж байсан хүмүүс автомашины улсын дугаарыг хүртэл хувьдаа завшдаг талаар олон нийтэд мэдээлж, хэсэгтээ шуугиад намжсан. Тэгвэл Ерөнхий сайд асан С.Баяр өчигдөр цахим хуудсандаа "Машинаа 0009 УНҮ дугаартай нь зарна. Дугаарын асуудлаар бичээд байсан УИХ-ын гишүүнд хөнгөлөлттэй өгнө" хэмээн нийтлэв. Энэ нь нэр цохсон гишүүнийг бус нийт иргэдийг тохуурхсан үйлдэл боллоо.
Өнөөдрийн байдлаар 3333..., 2222... ижил цифртэй улсын дугааруудын дундаж үнэ хар захад 50 саяар яригдаж байна. Цаашлаад тэг нь олон болж тоо нь багасах тусам үнэ нь өснө. Өөрөөр хэлбэл, 0009 гэдэг дугаар бол 50 мянган төгрөгийн хязгаарлалттай бензинд оочерлож байгаа иргэдийн амьдралаас алсарсан тоо.
Төрийн тусгай хамгаалалтын газарт байх ёстой дугаарыг хувьдаа шилжүүлсэн хэргийн эхний эзнээр Ерөнхий сайд асан М.Энхболдын нэр тодорч байв. Түүнийг 0012 УНҮ дугаарыг хувьдаа шилжүүлсэн талаар Ө.Шижир гишүүн цахим орчинд бичсэн.
Түүнчлэн УИХ-ын гишүүн П.Батчимэг М.Энхболдын хүү өдгөө Монголбанкны Тэргүүн дэд ерөнхийлөгчөөр сонгогдоод буй Э.Анарыг "Аавынхаа төрөөс шилжүүлж авсан машины дугаарыг ашигладаг" гэх агуулгыг хөндөж байв.
Тэгвэл дараагийн хүн нь өөрөө нэрээ зарласан нь Ерөнхий сайд асан С.Баяр. Тэрбээр "Мөнгөний хэрэг гарав. Diesel Toyota LC 300-гаа УНҮ 0009 дугартай нь зарахаар шийдэв. Дугаарын асуудлаар хавар шуугиад асан УИХ-ын гишүүн хэн билээ: Хөнгөлөттэй өгнө" гэж бичсэн юм.
Ө.Шижир гишүүн хариу болгож "Танд хадган дээр тавьж өгөөгүй, улсаас унаж байсан машин, улсын дугаартай нь хамт булааж авсан баримтыг аваад гэрт чинь очьё. Нэг удаа хувьд ажиллаж үзээгүй насаараа төрд ажилласан таны бага тэнгэрт дэх хаусанд тань уу. Санзай дахь зуслангийн хаусанд тань уу. 0007 ҮНҮ Range Rover, 0009 УНҮ LC 300 машинуудаа гадаа нь ил тавьчихаарай" хэмээв.
МАН 10 гаруй жил тарсалтгүй эрх барьж буйнхаа ард ийн ард түмнээр даажигнах нь олны эгдүүцлийг хүргэсээр байна.
Д.ХАДААН
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.