Ойрын өдрүүдэд дэлхийн тэрбумтнуудын нэг АНУ-ын бизнесмэн, мэдээллийн технологи болон компьютерийн програм хангамжийн үйлдвэрлэлээр дэлхийд тэргүүлэгч Майкрософт компанийг үүсгэн байгуулаг Билл Гэйтс Баян-Өлгий аймагт аялж яваа тухай мэдээлэл олны анхаарлыг татав.
Одоогоор түүнийг үнэхээр манай улсад аялаж яваа гэх албан ёсны мэдээлэл үгүй. Түүний хувийн онгоцнууд Монголд газардсан гэх талаар Гэйтс Фаундэшнд ч мэдээлэл байхгүй юм. Харин Монгол дахь эх сурвалжуудын мэдээлж буйгаар тэрбээр хотоос алс газар аялах зорилгоор хүрэлцэн ирсэн нь үнэн гэх товчхон мэдээлэл л бий.
Гэйтс яагаад Монголд ирэв, хэрхэн манай улстай холбогддог вэ гэх зэрэг асуултууд цахим орчинд өрнөж байна. Түүний Gates Foundation буюу өөрийнх нь үүсгэн байгуулсан сангаар дамжуулан дэлхийн олон улс оронд төсөл, хөтөлбөрүүд хэрэгждэг.
Уг сан нь дэлхийн эрүүл мэнд тэр дундаа вакцинжуулалт, эх хүүхдийн эрүүл мэнд, хоол тэжээл, ХАА, эмэгтэйчүүдийн эрх, жендерийн тэгш байдал, боловсрол, ядуурлыг бууруулах чиглэлд хөрөнгө оруулалт хийдэг. Тэгвэл тус сан нь Gavi буюу улс орнуудад вакцин нэвтрүүлэхэд шаардлагатай санхүүжилт, худалдан авалт, нийлүүлэлтийг зохион байгуулж, дэмжлэг үзүүлдэг олон улсын түншлэл бөгөөд 2000 оноос хойш хөгжиж буй болон, бага орлоготой орнуудад вакцины хүртээмжийг нэмэгдүүлэх зорилготой ажиллаж буй.
Гэйтс сан нь Gavi-гаар дамжуулан Вакцины санд 4.1 тэрбум орчим ам.долларын санхүүжилт өгсөн нь өдгөө Монгол тэргүүтэй улс орнуудад хямд үнээр вакцин авах боломжийг бүрдүүлсэн байдаг. Түүнчлэн Монгол дахь вакцинтай холбоотой зарим төрлийн судалгаануудын санхүүжилтийн эх үүсвэр мөн л Гэйтс сангаас Gavi-гаар дамжин санхүүжигджээ.
2026 оны 5 дугаар сарын 7-нд Melbourne Vaccine Education Centre буюу Австралийн Murdoch Children's Research Institute-ийн төв Монголд ирж ажилласан бөгөөд Монголын Дархлаажуулалтын Үндэсний Техникийн Зөвлөх Бүлэг болон Эрүүл мэндийн яамтай хамтран таван өдрийн сургалт зохион байгуулсан нь мөн л Гэйтс сангийн дэмжлэгтэй.
Өөрөөр хэлбэл Гэйтс сан нь дэлхий даяар явуулдаг санхүүжилтийн хөтөлбөрт нь Монгол Улс ч мөн хамрагддаг талаар тэр мэдээлэлтэй байх нь дамжиггүй.
Т.ГЭРЭЛТ-ИРЭЭДҮЙ
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.