Хөгжиж буй 24 орны бүлгийн дарга Тайво Ойэделе мягмар гарагт /2026.10.13/ Тайландын нийслэл Бангкокт болж буй Олон улсын валютын сан (ОУВС), Дэлхийн банкны жил тутмын уулзалтад оролцохдоо, өрийн дарамт нэмэгдэж буй нь хөгжиж байгаа орнуудын хувьд хүртээмжтэй өсөлтийн замд нь томоохон саад болж байгааг онцолжээ.
Нигери улсын Сангийн сайдаар ажилладаг Тайво сэтгүүлчдэд мэдээлэл өгч байхдаа, төсвийн алдагдал нэмэгдэж буй нөхцөл байдалд хөгжиж байгаа орнууд хөгжингүй улсуудтай харьцуулахад өр зээлийн төлбөрт ойролцоогоор 500 тэрбум ам.доллароор илүү зардал гаргаж байна гэсэн юм.
Тэрбээр “Хөгжиж буй 24 орны бүлгийн гишүүн улсууд, ялангуяа Африк зэрэг Африк тивийн орнуудын хувьд дан ганц өрийн хэмжээ өндөр байхаас гадна хүүгийн төлбөр ч их байгаа нь асуудлыг улам хурцатгаж байна” хэмээв.
Өрийн асар том дарамтад орсон хөгжиж буй орнууд энэ жил Ойрх дорнодод эхэлсэн дайнаас үүссэн эрчим хүчний хямрал, супер Эль Ниньо үзэгдлээс шалтгаалсан хүнсний үнийн өсөлт, инфляц нэмэгдсэний улмаас зээлийн хүү өссөн зэрэг хүчин зүйл нь нөхцөл байдлыг дордуулах болсон байна. Тайво энэ талаар ярихдаа “Эдгээр хүчин зүйл хөгжиж буй зах зээл болон хөгжиж буй орнуудын хүртээмжтэй, ажлын байр бий болгох эдийн засгийн өөрчлөлтөд хүрэх ахиц дэвшилд сөргөөр нөлөөлж байна” гэсэн юм.
Ийм учир Хөгжиж буй 24 орны бүлэг ОУВС болон Дэлхийн банкийг эмзэг нөхцөл байдалтай орнуудад ойрын хугацаанд илүү хүртээмжтэй, боломжийн нөхцөл бүхий санхүүжилт олгохыг уриалсан байна. Тус бүлгийн хэрэг эрхлэх газрын дарга Ияабо Маша “Өр зээл бол өсөлтийг хязгаарладаг хүчин зүйл. Учир нь өрийн улмаас улс орнуудад цаашдын өсөлтөө санхүүжүүлэх хангалттай нөөц үлддэггүй. Эсвэл нөөцийнхөө ихэнх хэсгийг зөвхөн өрөө төлөхдөө зарцуулахад хүрдэг” гэжээ.
Гэхдээ улс орнуудын өрийн асуудлыг шийдвэрлэх тогтолцоонд сүүлийн үед гарсан сайжруулалт нь өрийн хямралыг илүү хурдан шийдвэрлэхэд тусална гэж үзэж байгаагаа Ияабо илэрхийлсэн байна. Тэрбээр Сенегал улсыг жишээ татаж, тус улс зээлдүүлэгч нартайгаа эцсийн тохиролцоонд хүрэхэд их ойрхон байгаа гэсэн юм.
Өрийн асуудлаас гадна хөгжиж буй орнууд дэлхийн технологийн хөгжлийн хамгийн анхаарал татаж буй талбар болох хиймэл оюуны хэрэглээг нэвтрүүлэх үйл явцаас хоцрох эрсдэлтэй байна. ОУВС мягмар гарагийн өглөө Латин Америк болон Карибын тэнгисийн бүс нутгийн эдийн засгийн өсөлтийн таамгаа бууруулжээ. Учир нь тус сангийн үзэж буйгаар Ойрх дорнодын мөргөлдөөнөөс үүссэн эрчим хүчний хямралыг зөөлрүүлэхэд зарим орнуудад тус болсон хиймэл оюуны салбар тэдгээр бүс нутагт төдийлөн нөлөөлөхгүй байгаа аж.
“Хиймэл оюун тэгш бус байдлыг улам нэмэгдүүлэх вий гэж хүмүүс санаа зовж байна. Хөгжлийн тодорхой түвшинд хүрээгүй байгаа орнууд бүгдийг эхнээс нь эхлэх шаардлагатай болно. Одоогоор тэдгээр орнууд хиймэл оюуны үр шимийг тийм ч ихээр хүртэж чадахгүй. Эдгээр орнууд цахилгаан эрчим хүчний найдвартай хангамжтай болж чадвал мэдээллийн төвүүдэд хөрөнгө оруулах боломжтой болж магадгүй. Гэхдээ ийм нөхцөл бүрдээгүй цагт үр шимийг нь хүртэж эхлэхэд их хугацаа шаардана” хэмээн Ибаяо тэмдэглэн хэлжээ.
Эх сурвалж: Reuters
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.