Цар тахал, хөл хориотой холбоотойгоор иргэдийг хотоос гарах хөдөлгөөнийг хязгаарлаад байгаа. Энэ талаар УОК-ын дарга Я.Содбаатар Засгийн газрын хуралдааны мэдээллийн дараа хариулт өглөө.
Тэрбээр "Улаанбаатар хот болон төмөр зам дагасан суурин газруудын гэсэн хоёр голомт бий. Үүсээд буй нөхцөл байдалтай холбогдуулан Улаанбаатар хотод ч төмөр замын ажилчдаас шинжилгээ авч байна. Нэг ажилчнаас халдвар илэрсэн. Тийм учраас хотоос орон нутаг руу гарах иргэдийн асуудал хойшлогдож байна. Оношлогоо хийлгэх, бүртгэлжүүлэх, нийслэлээс гараад орон нутагт очих хүртэл нь бүх хяналтыг хийх журмуудыг бэлдсэн. Цаг үеийн нөхцөл байдалтай холбогдуулан шийдвэр гаргана гэдгийг иргэдэд би хэлсэн. Одоогоор орон нутгийн иргэдийг хотоос гаргаж болохгүй байна. Халдвартай хүн эсвэл ойрын болон дам хавьтал өөр аймаг руу очвол тэр аймаг сумын хэмжээнд маш том эрсдэл үүснэ. Иймээс иргэдийг хүлээцтэй байхыг уриалж байна. Улаанбаатар хотод албаны шугамаар ирсэн 500 хүн бий. Хувийн шугамаар ирсэн хүмүүсийн тоо баримтыг гаргахаар ажиллаж байна” гэлээ.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.