САТ-1 хэвшлийн шүлхийн вакциныг ОХУ, БНХАУ-аас авахаар манай улс гэрээ байгуулж, захиалаад байна. Эхний ээлжийн вакциныг БНХАУ-аас өнөөдөр авчирна. Үүнийг энэ 7 хоногийн бямба гаргаас Баян-Өлгий, Ховд аймгийн салаа туурайтай малд хийж эхэлнэ. Үүний араас дараагийн вакциныг залган оруулж ирэх аж. Ингээд 7-р сарын эхээр уг 2 аймгийн малыг бүрэн вакцинжуулж дуусгахаар ХХААХҮЯ төлөвлөж байна.
Энэ талаар Ц.Идэрбат сайд “Шүлхийн тархалтыг вакцинаар л зогсооно. Гэхдээ хоёрхон газар үйлдвэрлэдэг учраас оочир дараалал, захиалга маш их байна.
Бид ОХУ, БНХАУ-д санал тавьсан. ОХУ долдугаар сарын 10 гэхэд эхний сая тунг үйлдвэрлэлээс гаргаж, нийлүүлнэ гэсэн. БНХАУ-аас өчигдөр эхний дээж нь ирж байна. Гурав дахь өдрөөс татаж авна. Зургадугаар сарын 20 гэхэд вакцинжуулалтаа эхлүүлээд, долдугаар сарын 3, 4 хавьцаа дуусгаад, 14 хоногийн дотор дархлаа үүснэ гэж байгаа. Шүлхий өвчин 7 хэвшилтэй. Үүнээс О хэвшлийн вакцин манайд гардаг. Энэ төрлийн вакциныг малдаа манай улс хийдэг. Одоо бол О хэлбэр дээр нэмээд САТ-1 хэвшлийн шүлхий нэмэгдсэн. Сэлэнгэ, Төв аймагт гарсан нь О хэлбэрийн шүлхий. Сэлэнгэ аймгийн Хушаат суманд хонинд гарсан. Баян-Өлгий, Ховд аймагт гарсан шүлхий САТ-1 хэлбэрийнх” гэж тайлбарлаад байна.
Х.ХУЛАН
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.