Ц.Туваан 50.000 ам.долларын лобби гэрээ байгуулсан уу, зорилтот УЛС ТӨРЖИЛТ ҮҮ

Яг одоо УИХ-ын чуулганаар Ерөнхийлөгч Х.Баттулга болон өмнөх Ерөнхийлөгч нар Ерөнхийлөгчийн сонгуульд дахин өрсөлдөх боломжгүй гэж үзсэн ҮХЦ-ийн дүгнэлтийг хэлэлцэж байна. Энэ үеэр нэгэн ноцтой зүйл яригдсан нь АН-ын даргыг түр орлон гүйцэтгэгч Ц.Тувааны гарын үсэгтэй АНУ-ын лобби компанитай 50 мянган ам.долларын лобби гэрээ байгуулсан гэх зүйлийг УИХ-ын гишүүн Ц.Мөнх-Оргил ярив.

Тэрбээр “Үнэндээ сонгууль будлиулах ажлыг АН хийж байна. Ц.Туваан гарын үсэг зурж, АНУ-ын  компанитай байгуулсан 50 мянган ам.долларын лобби гэрээ байна. Гэрээг дөрөвдүгээр сарын 12-оос зургадугаар сарын 12 хүртэл байгуулсан байна. Энэ ямар учиртай юм бэ Ц.Туваан гишүүн ээ” гэв.

УИХ-ын гишүүн Ц.Туваан “АН 50 мянган ам.доллар байтугай 50 ам.доллар ч хүнд төлөөгүй. Ц.Мөнх-Оргил гишүүн андуурсан байх. Андуурсан бол түүнийгээ хэлээрэй. Манайх тийм баян нам биш” гэх нь тэр.

-Х.БАТТУЛГЫН НАМЫГ “МОНГОЛЫН АРДЧИЛЛЫН МАНЛАЙ” ХЭМЭЭН СУРТАЛЧИЛГАА ХИЙЛГЭХ БОЛЖЭЭ-

Хэдийгээр Ц.Туваан ийнхүү үгүйсгэсэн ч гадаадын https://www.foreignlobby.com гэх сайтад энэ талаар мэдээлжээ.

Уг сайтад гарсан нийтлэлд “Монголын Ардчилсан нам Вашингтон хотод үйл ажиллагаа явуулдаг “DCI Group” нэртэй лоббидогч фирмийг хөлслөн Ерөнхийлөгч Х. Баттулгын намыг “Монголын ардчиллын манлай” хэмээн сурталчилгаа хийлгэх болжээ. Ирэх зургаадугаар сарын 9-ны өдөр Монгол Улсын Ерөнхийлөгчийн сонгууль болох бөгөөд тус 50 мянган ам.долларын үнэтэй гэрээ нь дөрөвдүгээр сарын 12-оос хэрэгжиж эхэлсэн байна.

Тус гэрээнд “DCI Group”-ийн захирал Дуглас Гудеир болон Ардчилсан намын дэд дарга Ц.Туваан нар гарын үсэг зуржээ. “DCI Group”-ийн гүйцэтгэх захирал Кэвин Айверс болон тус фирмийн хамтран ажиллагч Райан Грилло нарыг бүртгэсэн байна.

Ерөнхийлөгч Баттулга өнгөрсөн ням гарагт (2020.04.18) Монгол Ардын намыг тараах тогтоол гаргасан бөгөөд үндсэн хуульд Ерөнхийлөгчөөр сонгогдсон хүнийг дөрвөн жилийн ганц удаагийн бүрэн эрхээр хязгаарласан заалт байдгийг эсэргүүцэн өөрийгөө дахин сонгуульд өрсөлдөх  эрхтэй хэмээсэн” гэжээ.

Эх сурвалж: Foreign Lobby

Сүүлийн үед гадны  сайтуудад Монголын улс төр, улс төрчдийн талаар зорилго бүхий мэдээллүүд гардаг болчхоод байгаа. Өнөөдрийн энэ дүр зураг ч улс төржсөн худал мэдээллийг зориудаар гадны сайтад “нийлүүлсэн” байж болох тал бий. Учир нь өнөөдрийн чуулганы хуралдаанаар хэлэлцэж буй ҮХЦ-ийн шийдвэр Х.Баттулгатай, Ерөнхийлөгчийн сонгуультай холбоотой. Үүнийг ашиглаж эсрэг намаа муухай харагдуулах МАН талын төлөвлөгөөний эхлэлийг УИХ-ын гишүүн Ц.Мөнх-Оргил тавьж, дээрх асуудлыг анхаарлын төвд оруулсан ч  байхыг ч үгүйсгэхгүй.  Хэрсүү уншигч та бүхэн өөрсдөө дүгнэх буй за.

Энэ мэдээнд таны өгөх үнэлгээ

Хуваалцах Жиргэх