НҮБ-ын Ерөнхий нарийн бичгийн дарга Антониу Гутерриш Азийн гурван улсад хийх айлчлалаа өнөөдрөөс эхлүүлжээ. Хэвлэлийн төлөөлөгч Стефан Дюжаррик нь энэхүү айлчлалын талаар товч мэдээлэл өгснийг хүргэж байна.
-Антониу Гутерриш Азид хийх айлчлалаа эхлүүллээ-
Тэрбээр өнөөдөр Японд очих бөгөөд тэнд байх хугацаандаа Ерөнхий сайд Фумио Кишида тэргүүтэй төрийн өндөр албан тушаалтнуудтай уулзалт хэлэлцээр хийж, Хирошима хотноо болох энхтайвны ёслолд оролцоно. Еслолыг АНУ Хирошима хотод цөмийн бөмбөг хаясан өдөр буюу жил бүрийн наймдугаар сарын 6-нд зохион байгуулдаг юм. Мөн тэрбээр Хирошима, Нагасакигийн бөмбөгдөлтөөс амьд үлдсэн иргэдийн төлөөлөлтэй уулзах юм байна.
Япон дахь айлчлалаа дуусгасныхаа дараа Монголд айлчилна. Айлчлалын үеэр Антониу Гутерриш Монгол Улсын байгаль хамгаалах чиглэлд гаргаж буй хүчин чармайлт болох “Тэрбум мод” хөтөлбөрийг дэмжиж, Улаанбаатар хотноо мод тарих ёслолд оролцоно. Түүнээс гадна нүүдэлчин монгол айлд зочилж, ахуй амьдралтай нь танилцах аж. Монгол дахь айлчлалаа дуусгаад энэ сарын 11-нд БНСУ-ыг зорих юм байна. БНСУ-д амжуулах ажлууд одоогоор тодорхойгүй, боловсруулж байна гэсэн мэдээллийг С.Дюжаррик өгчээ.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.