FACT CHECK: Цэргийн сургуулилтад оролцсоноос болж Монгол-Японы харилцаа муудах уу

ОХУ-ын Алс Дорнодод болж буй “Дорно 2022” олон улсын цэргийн сургуулилтад Монгол Улс оролцож байгаа билээ. Энэхүү сургуулилттай холбоотойгоор Монгол-Японы харилцаа муудах мэт мэдээллийг нэр бүхий хүмүүс цахим орчинд түгээсэн юм.

Тухайлбал,

Юуны өмнө дээрх жиргээг хувь иргэний байр суурь гэж хүлээж авах ёстой юм. Монгол Улсад иргэн үзэл бодлоо чөлөөтэй илэрхийлэх эрхтэй. Гэхдээ олон нийтийн сүлжээ нь бусдад нөлөөлөх хэрэгсэл тул дурдагдсан мэдээлэл үнэн эсэхийг нягталж fact check хийв.

ГХЯ-НЫ ЗӨВЛӨМЖИЙГ ЗААВАЛ БИЕЛҮҮЛЭХ ЁСТОЙ ЮУ

Тараагдсан мэдээлэлд “Гадаад яам...сургуулилтад оролцохгүй байх сануулга өгч...” гэсэн үгс бий. УИХ хууль батлахад яамдаас заавал санал авдаг. ЗГ, бусад байгууллагууд шийдвэр гаргахдаа ерөнхий чиг үүргийн /Гадаад харилцаа, Сангийн, Хууль зүй, дотоод хэргийн/ яамнаас санал, зөвлөмж авч болно. Гэхдээ заавал биелүүлнэ гэсэн хууль байдаггүй аж. Ер нь төрийн бүтцүүд өөрийн салбартаа л эзэн байна уу гэхээс бусад салбарын ажиллагаанд санал өгөх хэлбэрээр оролцдог, шууд захирдаггүй жишигтэй. ҮАБЗ хүртэл заавал дагаж мөрдөх үүрэгтэй тушаал шийдвэр биш, зөвлөмж гаргадаг.

Жич: Улс орнууд ашиг сонирхлын олон бүлгийн эрх ашгийг хөндөх чухал асуудлыг шийдэхдээ хоёрдмол байдлыг зориудаар харуулах хандлага байдаг. Монгол Улс жишээ нь, Украины асуудалд түдгэлзэж байгаа ч иргэдийн түвшинд чөлөөтэй үзэл бодлоо илэрхийлж болж байна. Энэ нь Монгол Улс ардчилалтай, олон ургальч үзэлтэй гэсэн мессежийг өгч байдаг.

Сая АНУ-ын Төлөөлөгчдийн танхимын дарга Н.Пелоси Тайваньд айлчлахад Пентагон, Ерөнхийлөгч Жо Байден хүртэл хориглож “жүжиг” тоглосон нь хамгийн тод жишээ. Нэг талаар нэр хүнд муутай Ерөнхийлөгчөө намаасаа салгаж харагдуулах Ардчилагчдын сонгуулийн пи ар боловч эцсийн үйлдэл нь АНУ-ын төрийн бодлогын дагуу явагдсан байх жишээтэй.     

ГАДНЫН УЛСАД БОЛЖ БАЙГАА ЦЭРГИЙН СУРГУУЛИЛТ РУУ “ОРГОЖ” ЯВАХ БОЛОМЖ БИЙ ЮУ

Мэдээлэлд Ж.Энхбаяр хэдэн цэргийг ОХУ руу оргуулж авч явсан юм биш үү гэсэн өгүүлбэр бий. Босоо удирдлагын тогтолцоотой, хариуцлага өндөр батлан хамгаалахын салбарт хэн нэгэн дарга дур мэдэж цэрэг авч явах асуудал байхгүй. Мэдээлэл тараагсад зүгээр нэг Ж.Энхбаяр гэж хүн цэрэг оргуулж авч явсан мэт бичсэн нь иргэдэд ташаа ойлголт өгөхийг хичээсэн мэт харагдуулжээ. Дор нь бичсэн “Дураараа юм бэ” гэх мэтийн сэтгэгдэлд хариу өгсөнгүй.

ҮАБЗ-ийн Нарийн бичгийн дарга Ж.Энхбаяр гээд албан тушаалыг нь тавьчихсан бол асуудал газар авахгүй байв. Энэ нь Цэргийн сургуулилтад оролцох асуудал ҮАБЗ, Ерөнхийлөгчийн түвшинд шийдэгдсэнийг шууд харуулах байсан юм.   

Т.ШИМИЗҮГИЙН МЭДЭГДЭЛ, NHK-ИЙН МЭДЭЭ, ЦАГААН ОРДНЫ МЭДЭГДЛИЙН ТАЛААР...

Энэ сэдэвтэй холбоотойгоор:

“Монголд Элчин сайдаар олон жил суусан Такэнори Шимизү “Хоёр улсын харилцаанд санаа зовниж байгаа”,

БНСУ-ын Элчин сайд монголчуудад үйлчлэх визийн журмаа чангаруулж, дамжин өнгөрч буй монгол иргэдээс транзит виз шаарддаг болсон,

“NHK телевиз мэдээлэлдээ Монголыг онцолсон, ЭСЯ нь өдөөн хатгалга гэж үзсэн. Ерөнхий сайдад виз өгөхгүй байж магадгүй”

“АНУ сургуулилтад оролцсон Энэтхэгээс бусад улсыг дайныг дэмжигч гэж үзнэ гэж зарласан” зэрэг мэдээлэл тарсан. Тэдгээрт жижиг тайлбар хийх хэрэгтэй гэж бодож байна.

ТАКЭНОРИ ШИМИЗҮ САНАА ЗОВНИСОН НЬ ҮНЭН Ч ХӨНДЛӨНГИЙН ШАЛТГААНТАЙ

Японоос Монголд Элчин сайдаар олон жил суусан, монголчуудын хүндэт хүн Такэнори Шимизү “Блүүмберг” телевизэд өгсөн ярилцлагадаа “Хоёр улсын харилцааны цаашдын ирээдүйд санаа зовинож байгаа” гэдгээ илэрхийлсэн нь үнэн ч “Олон улсын нөхцөл байдалтай холбоотойгоор” гэж тодотгосон байгаа. Манай хоёр улс оюун санааны хувьд ойр ч Япон Улс барууны орнуудын бүлэглэлд хамаардаг. Манай улс төвийг сахих эрмэлзэлтэй ч барууныхны талд яагаад ч орж болохооргүй нөхцөл байдалтай. ОХУ, БНХАУ-ын “Олон туйлт ертөнцийг цогцлоох” зорилгоор байгуулагдсан гэх БРИКС-т элсэнэ гэсэн мэдээлэл ч сүүлийн үед гарах болсон. Такенори Шимизү гуайн санаа зовинол үүнд оршиж байгаа болов уу.    

БНСУ МОНГОЛЫН ИРГЭДЭЭС ТРАНЗИТ ВИЗ ШААРДААГҮЙ

Энэ мэдээлэл худал болохыг албаны эх сурвалж нотолсон.

NHK МОНГОЛЫГ ОНЦЛООГҮЙ

Ядоны төв телевиз цэргийн сургуулилтыг мэдээллийнхээ эхэнд гаргасан байж болох ч Монголыг онцлоогүй, тэр тусмаа өдөөн хатгасан гэсэн үг, өгүүлбэр хэрэглээгүй байна.

АНУ МОНГОЛЫГ ДАЙНЫГ ДЭМЖИГЧ УЛС ГЭЖ ҮЗЭЭГҮЙ

Олон нийтийн сүлжээнд “АНУ сургуулилтад оролцсон Энэтхэгээс бусад улсыг дайныг дэмжигч гэж үзнэ гэж зарласан” гэсэн мэдээллийг шалгахад илт худал байна. Цагаан ордны хэвлэлийн төлөөлөгч Карин Жан Пьер бусад улсад биш, харин ч Энэтхэгийг сургуулилтад оролцох гэж буйд илүү ихээр санаа зовж байгаа гэж мэдэгдсэн байна.

Тийм амар гардаг шийдвэр ч биш. Литва гэхэд хэдхэн хоногийн өмнө л ОХУ-ыг Дайныг дэмжигч улс гэж үзлээ.    

ЦЭРГИЙН СУРГУУЛИЛТААС БОЛЖ МОНГОЛ ЯПОНЫ ХАРИЛЦАА ХУРЦДААГҮЙ

Дээрх мэдээллүүд бүгд нийлээд ерөнхийдөө “Японтой харилцаагаа хурцатгачих вий” гэсэн санаа зовинолоос үүдэлтэй.

Үүнийг зөвтгөж болно. Гэхдээ хоёр улсын харилцаа ОХУ-д болж буй сургуулилтаас болж муудсан, муудна гэх ямар ч илрэл одоогоор алга байна. Энэ жил хоёр улс дипломат харилцаа тогтоосны 30 жилийн ой болж байгаа. Тэмдэглэн өнгөрүүлэх ажлууд төлөвлөгөөний дагуу явж буй. Цэргийн сургуулилтын тухайд, Украины дайн эхэлсэн нь манай Монгол Улсын гадаад бодлогод, тэр тусмаа батлан хамгаалах бодлогод ямар ч өөрчлөлт ороогүй. Цэрэг армиа чадваржуулахыг өмнө ч хичээж байсан, одоо ч хэвээрээ.

Олон талт гадаад бодлоготой гэдгээ харуулах нэг боломж нь цэргийн хамтарсан сургуулилт болчихоод байна. Уламжлалт сургуулилтуудынхаа нэгийг ч таслаагүй. АНУ-тай ч хийсэн, Энэтхэгтэй ч хийсэн, ОХУ-тай ч хийсэн. Тэр байтугай Японтой ч цэргийн хамтарсан сургуулилт хийсэн. “Зам 2022” хамтарсан сургуулилт өнгөрсөн сарын 1-нд эхэлж, 20 хоног үргэлжилснийг нээлттэй эх сурвалжаас харж болно.   

Энэ мэдээнд өгөх таны үнэлгээ

Хуваалцаарай Жиргээрэй