БОАЖЯ-ны захиалгаар байгаль хамгааллын “Туул ижий сан” ТББ-ын санхүүжилт, "JCI прогресс"-ын дэмжлэгтэйгээр ШУА-ийн Газарзүй-Геоэкологийн хүрээлэнгийн эрдэмтэн, судлаачдын хамтын ажиллагааны дүнд энэ онд амжилттай үржүүлсэн 90,000 загасыг Туул голд тавилаа.
Орхоны Хөндийн БЦГ-ын хамгаалалтын захиргаатай хамтран үржилд тэнцэх 21 атуу, 20 атуухыг Орхон голоос барьж, эх сүрэг зөөвөрлөх зориулалтын саванд тээвэрлэн авчирч түрс, сунг авсны дараа Туул голд буцаан тавьсан юм. Туршилт судалгаанд Ховдын Их сургууль, МУБИС-ийн оюутан залуусыг дадлагажуулан, мэргэжил аргазүйн зөвлөмж өгч хамтран ажиллажээ.
Уг төсөл хэрэгжсэнээр Туул гол болон цутгал голуудын загасны нөөц нэмэгдэн, хүн амыг амралт чөлөөт цагаа зөв зохистой өнгөрүүлэх, спорт загасчлал, эко аялал жуулчлалыг хөгжүүлэхэд чухал нөлөө үзүүлэх юм.
“САЯ ЗАГАС” ТӨСЛИЙН ХҮРЭЭНД 10 ЖИЛИЙН ХУГАЦААНД 617,000 ЗАГАС ТАВИАД БАЙНА
Мөн Монгол Улсын Засгийн газраас хэрэгжүүлж буй “Welcome to Mongolia” арга хэмжээний хүрээнд "Нэг жуулчин - Нэг загас" загас үржүүлгийн хөтөлбөрийг явуулах уг ажлыг үр дүнд хүргэхээр БОАЖ-ын Сайд Б.Бат-Эрдэнэ "JCI прогресс"-тэй хамтран ажиллах санамж бичигт гарын үсэг зурлаа.
Д.УЛСАА
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.