Б.Баярсайхан: Үндэсний сурын алтан шар зурхай дээр ханьтайгаа танилцаж байлаа

Алдарт эхийн одон гардуулах ёслолын ажиллагааны хоёр дахь өдөр. Д.Сүхбаатарын талбай өнгө өнгийн цэцэгс, цэцэгсээс үл дутах үзэсгэлэнт одонт ээжүүдээр дүүрэн. Гадаа бороо шивэрч жиндүүхэн байх хэдий ч ээжийгээ хүлээх хүүхдүүдийн инээд, цэцгийн баглаагаа цэрвүүхэн барьж ханиа харуулдан зогсох эрчүүд, бэрээ, охиноо хүлээх эцэг эхчүүдийн хайр ерөөлд "халуу төөнөнө".

Олны дундаас өмссөн дээл, малгайн тэмдгээрээ онцгойрох бүсгүйг С.Цэрэнбуу гэдэг. Тэрбээр энэ өдөр үндэсний сурын харвааны аймгийн мэргэн цол, цэргийн эмч хэмээх хариуцлагатай албаа "Алдарт эх-II" одонгоор чимж буй. Түүний хань Үндэсний сурын харвааны Улсын мэргэн Б.Баярсайхан аж. Гэргийгээ хошуучийн дүрэмт хувцастайгаа тосож, хайр дүүрэн харцаар ханьдаа ёсолж зогсоо нь энэ. Тэдэнтэй цөөн хором ярилцсанаа хүргэе.

Гэргий С.Цэрэнбуу: 20 жилийн хөдөлмөрийн үр дүнд алдарт ээж, аймгийн мэргэн цолтон болжээ

-Эхийн алдар одонгоор энгэрээ мялаасанд баяр хүргэе. Сэтгэгдлээсээ хуваалцаач?

Маш их баяртай байна. Дөрвөн хүүхэд, төрүүлж өсгөсөн хөдөлмөрийг минь үнэлээд төрөөс "Алдарт эхийн" одонгоор шагнаж байгаад талархаж байна. Нэгт иргэний үүргээ сайн биелүүлж байгааг минь урамшууллаа гэж бодож байна. Хоёрдугаарт, үр хүүхдээ сайн хүн болгож, өсгөж хүмүүжүүлээрэй гэсэн үүрэг хариуцлага гэж ойлгож байгаа. Цаашдаа илүү хичээж үр хүүхдээ улс эх орондоо хэрэгтэй сайн хүн болгож хүмүүжүүлнэ. Үр хүүхдүүдээ өсгөхөд тусалж дэмждэг гэр бүлийнхэндээ баярлалаа. Та бүхний минь ач тус, гавьяа их байдаг шүү.

-Төрийн ордонд овог нэрээ дуудуулаад одонгоо гардах мөчид юу бодогдсон бэ?

-Үнэхээр их огшдог юм байна. Манай гэр бүлийн төлөвлөгөө ингээд болсон. Тиймээс өнөөдөр бол бидний амьдралд нь ганц тохиох мөч. Төрийн тэргүүнээс одонгоо гардаж авсандаа баяртай байна. Монголын бүх ээж, эмэгтэйчүүдэд та бүгдийн минь нөр их хөдөлмөрийн улс орон хөгждөг шүү гэдгийг хэлье.

-Малгайн тэмдгийг нь харваа аймгийн мэргэн аж. Хэзээнээс үндэсний сурын харваагаар хичээллэж эхлэв

-Би 2008 оноос хойш Үндэсний их баяр наадамд харваж байгаа. Аймгийн мэргэн, спортын мастер цолтой. Хань маань улсын мэргэн цолтой. Улсад найман удаа айрагдсан. Бид хоёул "Алдарт" спорт хорооны тамирчин.

Энэ бол миний 20 жилийн хөдөлмөр. 10 жилд нь дөрвөн хүүхэд өсгөж хүмүүжүүлсэн, 10 жилд нь аймгийн мэргэн, спортын мастер цол хүртсэн. Нэмээд хоёр ромбо, нэг магистрын диплом байгаа /инээв/.

Б.Баярсайхан: Ханьдаа баярлалаа, илүү хичээж сайн сайхан амьдарна аа

-Хань "Алдарт эх"-ийн одонгоор энгэрээ мялаагаад гарч ирлээ. Сэтгэгдлээсээ хуваалцвал?

-Ханьдаа баярлалаа. Дөрвөн сайхан хүүхэд түрүүлж өсгөөд өдий дайтай явцгааж байна. Мөн дөрвөн сайхан ээж аавдаа баярлалаа. Үр хүүхдүүд нь илүү хичээж сайн сайхан амьдарна аа.

-Та хоёр маань анх яаж танилцаж байв?

-Би үндэсний сурын харваач, улсын мэргэн цолтой. Ханьтайгаа сурын зурхай дээр танилцсан. 2010 оноос гэр бүл болоод амьдралаа бүтээж байна. Үндэсний сурын харваа миний амьдралын салшгүй нэг хэсэг, бараг бүх зүйл маань юм. Биднийг алтан шар зурхай танилцуулж, амьдрал холбосон.

Д.ХАДААН

Өөрийн сэтгэгдлээ илэрхийл

Share Tweet